یا علی اوصافیوی هر نامسلمان آنلاماز #حیدریه_دلریش

مظهرالعجایب و مظهرالغرایب امیرالمؤمنین
.
✍️ #زبدةالاشعار ✍️
.
🆔: @nohe_torki
.
مرحوم دلریش
.
یا علی اوصافیوی هر نامسلمان آنلاماز
آری آری رتبه انسانی حیوان آنلاماز
منکره قرآنی ائت مین دفعه تبیان آنلاماز
لا دیوب روز ازل آیات قرآن آنلاماز
چون شراکت ایلیوب ذاتینده شیطان آنلاماز
.
.
وصف ائدوب بو سروری خالق اوزی روز ازل
ایلیوب دور رهنما مخلوقه حی و لم یزل
ای زنا اولادی منکر ایلمه بحث و جدل
هر کیمون ذاتینده اولسا عیب و نقصان و خلل
مدح مولادن گتورسن هر نه برهان آنلاماز
.
.
ذکر اولان یرده علی اوصافی روحه جان وئرور
باش و جان جانان یولیندا طالب جانان وئرور
مادح مولانون اجرین خالق سبحان وئرور
ناصبی دیناری ایستر دین وئرور ایمان وئرور
جیفۀ دنیادن اؤتری دین و ایمان آنلاماز
.
.
اولماسیدی خلق اگر نور محمد مرتضى
خلق اولونمازدی بو نه افلاک عرش کبریا
پنج تندن اوتری خلق اولدی تماماً ماسوا
بو امانت کوهساره عرض اولوب ائتدی ابا
حاملی انسانیدور امّا هر انسان آنلاماز
.
.
فضلیوه اقرار ائدیدی كل عالم یا على
خالق عالم یاراتمازدی جهنم یا على
مصطفی دن غیری یوخ سندن مقدم یا علی
واریدون خلق اولمامیش حوا و آدم یاعلی
عالم معناده کی شانون مسلمان آنلاماز
.
.
عزم سینا ایلینده چون حکیم ذوالجلال
ربّ ارنی کلمه سین ربّیندن ایلردی سؤال
نور اولاندا جلوه گر موسی اولوب محو جمال
تاب ائدر موسی سنون نورون گورن وقته محال
قرب حقده قربیوی فرعون و هامان آنلاماز
.
.
نار دوزخدن محبّون ائتمز اصلا واهیمه
اسم پاکون سو سپر هر لحظه سوز آهیمه
غرق عصیانم سنون مدحوندی توشه راهیمه
سن مدد قیلدون اود ایچره حضرت ابراهیمه
دوتسا هر کیم دامنون هئچ نار سوزان آنلاماز
.
.
رسمیدور هر طالبه عالمده بیر مطلوب اولور
هر بلایه تاب ائدن عاشق بلی ایوب اولور
جور جاناندان هر عاشق اینجیه معیوب اولور
ایستین یوسف وصالین الغرض یعقوب اولور
ایلسه مین ایلده ناله رنج هجران آنلاماز
.
.
وار ازلدن عشق میداننده سنگ امتحان
امتحاندان چیخمادی والا شه لب تشنگان
ایلدی جانان یولیندا ترک جاه و باش و جان
عشق میدانینده قربان ائتدى اكبر تک جوان
جان فدا ائتماق او کس کیم وئرمیوب جان آنلاماز
.
.
بیر جوان کیم مهر اولا هر کیم گورنده صورتین
بینوا لیلا دیلینده قویدیلار طوى حسرتین
ائتدیلر غلطان اونون القانه سرو قامتین
بیر خیال ایلون حسینون کربلاده حالتین
غم غم اوستن چکمیوب هر کیمسه هر آن آنلاماز
.
.
بیر وجودی که وجودی عالمه اولسون سبب
نه روا کسسونله باشین سو یانیندا تشنه لب
پیکر پاکینده آت چاپسون گروه بی ادب
خارجی آدی اونون اولادینه وئرسون لقب
آل طاهانون بلی شأنینی عدوان آنلاماز
.
.
چک عنان طبعیوی «دلریش» چوخ ائتمه خطاب
ایلمه شرح مصیبت عالم اولدی دلکباب
سویلمه خولی غمین سالما جهانه انقلاب
خیزران ظلمین دئمه یوخدور بو ظلمه دلده تاب
اوزلقین بو ماجرادہ بول ثناخوان آنلاماز
.
.
#حیدریه_مدح
#یا_علی_اوصافیوی_هر_نامسلمان_آنلاماز
#ترکی
.
✍️ #زبدةالاشعار ✍️
.
🆔: @nohe_torki