یا فاطمه تاپشور بیزی سردار حسینه #عباسیه_علی_تیموری

توسل به حضرت ابوالفضل العباس (ع)
..
..
..
تیموری اردبیلی
..
..
..
یا فاطمه تاپشور بیزی سردار حسینه
ائتسون نظر لطفینی زوّار حسینه
..
..
..
..
قویسون قدم عشق عالمی بو بزم ولایه
باخسون نظر رأفتیلن اهل عزایه
سالسون گوزل عاشقلرینون باشینه سایه
لطف ایله سون عبّاسون عزادار حسینه
..
..
..
..
لطف ایله سه بیر شخصه اگر باشینه چالماز
قلبینده حسین نوکرینون عشقی آزالماز
مشکلده ابوالفضل آقامون عاشقی قالماز
دردین دییر همواره علمدار حسینه
..
..
..
..
عبّاس نه عبّاس عجب عزّتی واردی
دنیاده مقدّس آدینون حرمتی واردی
هر بزم عزاده آقامون صحبتی واردی
سرداریدی چون دولت بیدار حسینه
..
..
..
..
کیم درده دچار اولماسا بومطلبی بیلمز
عشقین حرمینده اورگیندن توزی سیلمز
قلبینده اولان خصلتی هرگز دیشیلمز
قویماز‌ قدمین عشقیله بازار حسینه
..
..
..
..
عاشق اودی دنیایه گوره دینینی ساتماز
عالمده یقین اهل شرف قارداشین آتماز
عاقل بلی بیهوده ئوزون هر ایشه قاتماز
غبطه ائله مز عزّت سرشار حسینه
..
..
..
..
عزت تاپار عالمده اولار پیرو مسلک
ایلر دل اعدانی توانیله مُشبَک
دشمن قباقیندا قالار عبّاس علی تک
قربان ائلیر جانینی ایثار حسینه
..
..
..
..
دنیایه عجب شور و نوا سالدی ابوالفضل
دشمن قباقیندا ائله کی قالدی ابوالفضل
آل لُلّهی زیر پرینه آلدی ابوالفضل
امداد ائلدی عترت اطهار حسینه
..
..
..
..
جان بذل ائلیوب جانینی جانانینه خاطر
بیرگوز ایکی قولدان کچوب ایمانینه خاطر
نهراوسته دوشوب قوللاری قرآنینه خاطر
عاشق اولوب عالم اودی سردار حسینه
..
..
..
..
عشّاقی اولوب عشقینون عالمده اسیری
یوخ عالم امکانیده غیرتده نظیری
سردار شرفدور، شرفین مرد دلیری
فخر ایلیر عشّاق سزاوار حسینه
..
..
..
..
تیموری نی عفو ایله اگر اولسا قصوری
عبّاسووه خاطردی اولان باشدا کی شوری
کانون ولایتدن آلوب درس شعوری
جان بذل ائلیه صبح ومساء یار حسینه
..
..
..
#عباسیه #علی_تیموری #عباسیه_مدح #ترکی #زبدةالاشعار