حلول ماه محرم
اشاره به حالات و رویای مقبل اصفهانی
..
..
..
رضا غلامپور (دلپاک)
..
..
..
یاللعجب دوباره دوشوب عالمه شرار
مرآت دل دوتوبدی گئنه غصه دن غبار
..
ذی الحجه آیی سیر ائلدی تاپدی خاتمه
ماه محرم اولماقا آی چکدی گویده جار
..
عرش خدایه قاره چکیب حارسان عرش
افلاکیان اولوبدی بو ماتمده سوگوار
..
سمع کواکبه یئتیشیب بانگ تعزیه
قطب فلکده جلوه ی خورشید اولوبدی تار
..
طوفان غم ووروبدی سماواتی بیربیره
صیاد غم ائدیبدی دل عالمی شکار
..
سکان عرش و فرشه یازیبلا شعار غم
اولموش حسین آدی او مرقومه زرنگار
..
تشکیل ائدیب فلکده عزا بزمی قدسیان
میکائیل ائتدی عطریله اول بزمی مشکبار
..
جبریل نوحه باشلادی ای وای حسینیله
قلب جهانی ائتدی غمه ناله سی دچار
..
گلدی عزایه اهل سماوات صف به صف
لاهوتیان اولوبدی عزا ایچره بی قرار
..
غبرایده سالوبدی محرم بیر آیری شور
بیر شوریلن کی شوری سالیب دللره شرار
..
گوللر دییوبله بیربیرینه گلستانیده
بو آیدا بیر گوزل گولی پرپر ائدیبدی خار
..
بلبل آچیبدی دل اوخوری غملی نغمه لر
گویا خزان ووروبدی گولی موسم بهار
..
قاره چکیلدی کوچه و بازاره بیر به بیر
تاپدی ملال سید حق بیرده اشتهار
..
هر شهریده قورولدی عزاخانه لر تمام
شهر ملالت اهل ولایه اولوب دیار
..
دسته به دسته شوریله باغلاندی دستجات
نظمه دوشوبدی کوچه و برزنده چون قطار
..
بیر دسته بو سیاقیله بیرگون دوشوب یولا
سینه ووروب ائدردیله هر لحظه آه و زار
..
آغلاردیلار مصیبت آل پیمبره
ائیلردیلر ملال دله اشکی سازگار
..
ناگه او جمعی گوردی مسیر اوسته بیر جوان
آچدی دلین اوزون ائلدی خوار و شرمسار
..
بیر نوعیله تمسخر ائدیبدور کی صبریله
نآشنا اولوب داخی هر قلب بردبار
..
بیر آز زمان گئچیبدی دوتوب سخت بیر مرض
هرگون وئریبدی حالینه اوز حال انکسار
..
شهر اهلی اولدی چوخ متنفر او حالیدن
کیم حالینی گوروبدی تاپیب حال انزجار
..
ممکن دگول گوروب داخی شهر ایچر قالماقی
ناچار محنتیله اولوب شهریدن کنار
..
بیر مدت انزوائیله مأنوس درد اولوب
ائسی غذا نه گوردی نده آب خوشگوار
..
بیر ائیل گچوب محرم آیی گلدی تازه دن
اولدی دوباره دن دل احباب داغدار
..
اگلشمشیدی قلبی سینیق بیر خرابده
بیر هیئتی گوروبدی او یئردن ائدور گذار
..
گوزلرده اشک سینه وورولار شکسته دل
بو شعری ورد ائدوبدوله اول جمع باوقار
..
بوگون نه کربلای نه چوخدور بلا بوگون
بوگون حسین باشینی تندن آیردیلار
..
تا بو سوز ائشیدی یانیب آتش غمه
بو سوز دلینده ناله ائدیب اولدی دلفگار
..
بو گون عزا عزادی بوگون جان بلاده دور
محشر بوگون فغانیله کرببلاده وار
..
یاتدی گوروب همان گجه رویاده مهریله
دورموش برابرینده رسول ملک تبار
..
فرمایش ائتدی مرسل سبحان که ای جوان
عفو ایلدوق گناهیوی به إذن کردگار
..
مقبل لقب وئریلدی سنه چون‌کی متصل
آخدوقجا اشکین ائتدی گناهوندان اعتذار
..
آلدی شفا حسین غمینده یازیبدی شعر
سر سفره ی حسینه داخی اولدی ریزه خوار
..
نظمه چکیبدی بیر گجه امر شهادتی
ائتدی قرائت اوز دلینه یاتدی اشکبار
..
آغلار گوزیله یاتدی ولی گوردی خوابیده
اولموش ضریح شاه شهیدانه همجوار
..
پیغمبر خدا دایانیب گوزده اشک آل
ایلور نظاره قبر حسینه طرف نزار
..
حاضر اولوب حضور پیمبرده محتشم
اوز دوندریبدی سمتینه پیغمبر کبار
..
فرمایش ائتدی منبر دین اوسته ائت مقام
بیر شعر اوخی حسینیمه آچ نطق درّ بار
..
اوّل مقامه تکیه ائدن لحظه محتشم
حضرت بویوردی پله ی آخرده تاپ قرار
..
القصه منبر اوسته ادبله ائدیب جلوس
بو نوعی باشلادی سوزون اول مرد نامدار
..
تا گوردی قارداشین یارالی زینب حزین
قلبی اولوبدی تیغ نوادن جریحه دار
..
دوتدی اوزون مدینه ی پیغمبره دئدی
گل گور حسینیوی بابا نه حاله سالدیلار
..
مقبل دئیور قوتاردی سوزون تا کی محتشم
بیر خلعتی وئریبدی اونا غملی شهریار
..
بو سوز خطور ائدیبدی خیالیمدان اولزمان
درّ کلامین اولمادی گویا کی خوش عیار
..
اشعاریوین ملاحتی اولسیدی بیگمان
امر ایلیردی سنده اوخی شاه تاجدار
..
بیر پیک وارد اولدی او مأوایه ناگهان
بیر مطلبی پیمبر ایچون ائتدی انتشار
..
عرض ایلدی بتول دئیور إذن وئر بابا
مقبلده دلده شعرین ائده بیر به بیر شعار
..
تا دل آچیبدی رخصته پیغمبر نبیل
مقبل چاتب مرامینه ختم اولدی انتظار
..
سرعتله دوتدی منبرین اوّل یئرینده یئر
بو سوزلریله ائتدی مرامون بیانه یار
..
واردور خبر که عرصه حسینه چون اولدی تنگ
قالمیبدی ذوالجناحیده جولانه اقتدار
..
نه قالدی جنگ ائتماقا طاقت حسینیده
نه ذوالجناحه قالدی داخی حال استوار
..
چکدی ایاق چکیده ی خلقت رکابیدن
دوشدی یئره نجیکی یئره گون ایشیق سالار
.
عالم قرالدی باد مخالف هواسینا
زهرا عزیزی اولدی آت اوستن نگونسار
..
دوشدی بلند مرتبه شه صدر زینیدن
اولماز غلط دئسم یئره گر عرشی سالدیلار
..
تا سوز یئتشدی بو یئره آز قالدی ایلسون
شیون صداسی عالم امکانی تارومار
..
بیر کس اشاره ایلدی مقبل دایان داخی
بو سوزلر آلدی فاطمه قلبیدن اختیار
..
وئرمه ادامه اود دوتوب اولاندی فاطمه
وئردی یانیقلی قلبینه میزان غم فشار
..
دوشدوم اشاقه منتظر اولدوم عطا ائده
خلعت منه شهنشه وادی اصطبار
..
گوردوم ولی او حینیده منشق اولوب ضریح
یئر تتردی آچلیدی بیر اعجازیله مزار
..
بیر سید جلیل چیخیبدیر مزاریدن
نه پیکرینده اللری واردور نه باشی وار
..
باشدان ایاقه یاره لیدور یوخدی ساغ یئری
گویا چکیبدی پیکرینه یاره لر حصار
..
گوردوم آچیبدی گل کیمی بیر یاره قلبینی
پیکان ووروبلا قلبینه بولدوم کی اهل نار
..
عرض ایلدیم نهایت درد و ملالیله
کیمسن یارالی جانیوه جانیم اولا نثار
..
ناگه گلیبدی حنجر منحوریدن بو سس
الده ئولن حسینم اولان دردی بیشمار
..
دوردوم ایاقه خلعتیوی من اوزوم وئرم
بزم سخنده تا اولاسان سنده کامکار
..
مقبل اوگونکی گونده منی ووردی هر گلن
قانیم یئر اوسته بس کی آخیب اولدی جویبار
..
تا دوشدی قتلگاهه وجودوم بلا گونی
هرکیم یئتیشدی ووردی منی ائتدی زخمدار
..
شمشیر و نیزه و اوخا امکانی اولمین
ائتدی منی جفائیله مقتلده سنگسار
..
بیر حاله سالدی قوم ستمگر وجودیمی
احوالیمی گورنده یانیب قلب روزگار
..
چوخ اولدی قتلگاهه او لحظه گلیب گئدن
چوخ اولدی باشیم اوسته او اثناده گیرودار
..
آخیرده گلدی شمر منیم کسدی باشیمی
سالدی ازل اوز اوسته منی لیک او نابکار
..
تا کسدی ووردی باشیمی فخریله نیزیه
ظلم و جفا و کینه سینه ائتدی افتخار
..
زینب یارالی پیکریمی دفن ائدنمدی
قول باغلی اولدی حسرتیله شامه رهسپار
..
دلپاک آغلا محنت سلطان محشره
محشر گونی شفاعتینه اول امیدوار
..
هر یاره کی حسینه دگوبدی یقین ووروب
سر لوحه ی قیامینه مین مهر اعتبار
..
..
#ورود_محرم #دلپاک #ترکی #زبدةالاشعار
نظر دهید