یثربده ابوالفضل سنه یالقوز آنون آغلار #حضرت_ام_البنین_نصرتی

حالات حضرت ام البنین (س)
.
.
نصرتی
.
.
یثربده ابوالفضل سنه یالقوز آنون آغلار
گوز یولدا قولاق سسده اوغولسوز آنون آغلار
.
.
شهلا گوزووی قامتووی یادیمه سالّام
بیکس بالووی گورّم اوغول بهتیده قالّام
آغوشه آلاندا اونی من عطرووی آلّام
اشکیم توکولنده یوزومه گوز بولاغیندان
آغلار، اؤپرم تئز تئز اونون گل دوداقیندان
.
.
بو سؤزلری زینب دئدی یاندی دل عالم
عباسیمون احوالی سالوب عالمه ماتم
قولسوز یخیلاندا یخیلوبدور یره پرچم
حیف اولسون اوغول اولمامیشام کرب و بلاده
آغ ساچلاری قانه بوئیام کوه مناده
.
.
محرابیوه باخدوقجا اوغول اشگ الرم من
قارداشلاروا هم سنه هر گون ملرم من
گونلر قاباقیندا گزرم دربدرم من
عزّلی گونوم گئتدی داخی عزّتیم اولماز
احوالیوه گوش ایلمگه طاقتیم اولماز
.
.
هر مجلسه دعوت اولام آسان سانورام من
آغلالّا اوغولّار آناسی من یانورام من
لیلانی ربابی گورورم اودلانورام من
گورجک منی لیلای حزین با دل خسته
گوزیاشی توکور اوندا یانان صورتی اوسته
.
.
چیخماز بو یادیمدان بالا اول روز ولادت
آغوشینه آلدى سنی تا شاه ولایت
قولّارون اؤپوب آغلادی دوتدی اونی رقّت
گیزلین سنه اول وقته اوزوم آغلارام اوغلوم
بو سینه می هر گون غمووه داغلارام اوغلوم
.
.
آغلاتدون اوغول سن او زمان شیر خدانی
سالدون غم هجرانه بو بیچاره آنانی
یاندیردون عجب نار غمه آل عبانی
دوز یول گئدن اوغلوم او گوزل یولّارا قربان
آغلار گوزوم حقّ اوسته دوشن قولّارا قربان
.
.
سن ئولدون اوغول گرچه منیم باشیم اوجالدی
عالملری شأن و شرفون حیرته سالدى
بو مادر بیچاره یامان گونلره قالدى
آغلار گوزومی اوخشادارام بارش ابره
سینه مده اوغول داغی گیدر خانۀ قبره
.
.
ای امّ بنین ای رشید عباسون آناسی
بو نصرتینون واردی سنه بیرجه دعاسی
قلبینده کی دردین اولار عالمده دواسی
دردیم بودی سن ایله دعا مادر بی یار
بو هیئتیمیز قبر حسینه اولا زوّار
.
.
#حضرت_ام_البنین #نصرتی #ترکی #زبدةالاشعار