زبدةالاشعار

یثربده بشیرون سسی هنگامه یاراتدی #ورود_مدینه_حافظی_تبریزی

بازگشت به مدینه
.
✍️ زبدة الاشعار ✍️
.
🆔: @nohe_torki
.
مرحوم حافظی تبریزی
.
یثربده بشیرون سسی هنگامه یاراتدی
شهر اهلینه غم مژده سی برنامه یاراتدی
.
بُلدی هامی شاماته گیدن قافله گَلدی
بیر سلسله لی سلسله بی سلسله گَلدی
.
.
تا گَلدی سسه دیر صفت زنگی بشیرون
اجرام فضایه دگوب آهنگی بشیرون
گون تک سپیلوب مژدۀ شبرنگی بشیرون
جان گوشینه آواسینی هر مستمع آلدی
دلدن دله سوز دوشدی گویه شیون اوجالدی
.
.
محشر گونی تک شهر اوزینه آلدی قیافه
پیغمبر ئولن عالم اولوب آل منافه
بو ضایعه دن خرد و کبار اولدی کلافه
بلکه هیجان خلقیده اونداندا باش اولدی
داغ اوسته آلان داغ دلی داغ و داش اولدی
.
.
بو اولدی بشیرون ازل عنوان کلامی
هند اوغلی جسارتله یغوب لشکر شامی
ئولدوردی حسین ابن علی تک بیر امامی
لب تشنه شهید ایلدی انصار حسینی
یتمیش ایکی جانباز و فداکار حسینی
.
.
دوندردیله یوز روضۀ طاهایه جماعت
سوگ شهداده هاموسی ایتدیله شرکت
بو همهمه دن زمزمه دن قوپدی قیامت
پیغمبر حق روضه سینه قاره چکیلدی
کعبه کیمی قاره در و دیواره چکیلدی
.
.
زینب اوزینی قبر رسول الَلهه سالدی
گوزیاشی آخوب ناله سی قلبینده اوجالدی
عرض ایتدی بابا طاقتیمی غصّه لر آلدی
توضیح نه لازمدی که معلوم اولا معلوم
ئولدوردوله لب تشنه حسین اوغلیوی مظلوم
.
.
گُلسوز نیه لازمدی جهان سطحی باغ اولسون
قلبونده گرکمز گینه داغ اوسته داغ اولسون
باشوندا حسینون طرفیندنده ساغ اولسون
زهرا آناما صبر عطا ایلسون الله
چوخ ایلمیه نالۀ جانکاه او دل آگاه
.
.
اوندان صورا یوز دوتدی او جمعیّته زینب
نسوان حجازی او خانم ایتدی مخاطب
ملزومیدی تا سیزلره روشن اولا مطلب
دین اوسته پوزولدی حشم و جاهی حسینون
اودلاندی حرمخانه و خرگاهی حسینون
.
.
بیر بیر بویانوب قانینه انصاری یخلدی
اکبر کیمی بند دلی دلداری یخلدی
یاتدی علمی قولسوز علمداری یخلدی
اردوسی داغلدی، پوزولوب لشکری سیندی
صفلر داغیدان عسکرینون سنگری سیندی
.
.
بیر چرخ دولی مهر و مه و اختریدوخ بیز
افلاکیده سیّاره لره زیوریدوخ بیز
بیر رشتیه بیر بیر دوزولن گوهریدوخ بیز
بو رشته اولوب پاره بیابانه داغلدی
چون دانۀ سبحه هره بیر یانه داغلدی
.
.
بیر نچّه بالا خیمه یانان وقیتده یاندی
بیر نچّه سیده آتلی قوواندا یارالاندی
بیر نچّه سینه اوخ توخونوب قانه بویاندی
بیر نچّه سی وحشت زده اولدی تلف اولدی
مین تیر بلایه دل زینب هدف اولدی
.
.
او چولده ئولن ئولدی، قالان اولدی گرفتار
آزاده لری باغلادیلار قول قولا اشرار
باغلاندیلار عریان دوه لر اوسته اوشاقلار
یول باشلادی غم قافله سی کوفیه ساری
قلبیم دولی قان اولدی گورنده او دیاری
.
.
نصب اولموشودی نیزه لره گون کیمی باشلار
بیر قانلی باشی گوردوله کهف آیه سی باشلار
قرآن اوخویان بیر باشی کیم داشیله داشلار
بیر بیله مصیبت یارالی بیر باشا یتمز
ظلم و ستمِ آل امیّه باشا یتمز
.
.
سوز گَتدی سوزی، یاده غم کوفه سالندی
آرام و توان غصّه لی دللردن آلندی
شامه گیده کوچ ایلماقین زنگی چالندی
بیر قافله دل داغلی یولا دوشدی تمامی
گوندوز بیزه شام اولدی گیدینجه ره شامی
.
.
غم قافله سی شامه یتن وقتیده خسته
بایرام گونی تک بُلدی هامی روز خجسته
پیشوازه چخوب پیر و جوان دسته به دسته
بیر عدّه اولوب شوریله دف چالماقا مشغول
بیر جمعیده بیر سمتیده کف چالماقا مشغول
.
.
بیر نوعی یهودیلر او گون ایلدی رفتار
آل اللهه روشن گونوز اولدی گئجه تک تار
ناگه دله گَلدی بو سوزی عابد بیمار
ای کاش آنامدان دوغولونجا من ئولِیدیم
بو حالت و وضعی نه گورِیدیم نه بُلِیدیم
.
.
رنگ غمه خمخانۀ محنتده بویاندوخ
هر جهل و شماتت اودونا ظلمیله یاندوخ
بیر ایل گونوزی کوچه و بازاری دولاندوخ
شام اولدی ویروب یر بیزه ویرانه ده دشمن
ویرانه نه ویرانه نجه شرح ایلیوم من
.
.
گوگلوم کیمی ویرانه نی ویرانه دی گوردوم
بی لانه و پر مرغ دله لانه دی گوردوم
غم چولقالیوب غملیه غمخانه دی گوردوم
تاریکیدی سوز یوخ یوخودی وضع رفاهی
روشن ایلدوخ صبحه کیمی مشعل آهی
.
.
هر قیز سارالان گُل یوزینی قویدی ترابه
رشک چمن خلد برین اولدی خرابه
شبنم کیمی گوزیاشلاری بنزردی گلابه
ویرانه اولوب عطر و گلابیله معطّر
ریحان و گُل و غنچۀ نابیله معطّر
.
.
اولدوخ بیر اوزون مدّت او ماواده زمینگیر
احوالیمیزی ایتدی حوادث متغیّر
هیچ غم بیزه دل یاره سی تک ایتمدی تاثیر
یخمازدی بیز آل اللهی اندوه فراوان
شام اهلی ووران دل یاراسی سالدی ایاقدان
.
.
بیر گون آتا مرگین ایشیدوب باخبر اولدی
مین تیر غمه قلب رقیّه سپر اولدی
بیر قوش کیمی سیندی پری، بی پال و پر اولدی
نیلر او قفس بلبلی که دانه سیز اولسا
ناچار قوری یرده یاتار لانه سیز اولسا
.
.
هجران قوتاروب عالم وصلی اله سالدی
گوردی آتا باشین بالا آغوشیوه آلدی
بیر منظره یوز ویردی، گویه ناله اوجالدی
باش بیر طرفه دوشدی اوزی بیر یانا دوشدی
فوج شهداده او بالامدا سانا دوشدی
.
.
گرچه غمی چوخ مایۀ حزن و تعب اولدی
امّا او قیزون ئولماقی امر عجب اولدی
کاخ ستمی یخماقا عمده سبب اولدی
پرگار یزیدی او قیزون همّتی یخدی
شالودۀ کفری او گونون نهضتی یخدی
.
.
هند اوغلی گوروب آز قالور اولسون ایوی برباد
مجبور اولوب آزاده لری ایلسون آزاد
ویرانه ده یاتدون دیدیم اولسون ایوین آباد
ای قلبیمون آرامی رقیّه گیدیروخ بیز
غربت بو ولایتده سنی ترک ایدیروخ بیز
.
.
یغدیم داغیلان سلسلۀ آل عبانی
هودجلره میندیردیم اوزوم خرد و کلانی
آغلار گوزیله قصد ایلدوخ کرب و بلانی
میعادگه حضرت جانانه یتیشدوخ
قربانگه حق کوی شهیدانه یتیشدوخ
.
.
گوردوخ که بلا دشتی دگل گلشن جاندور
افسوس او طراوتله بهارینده خزاندور
هر لاله سینون باغری بو باغریم کیمی قاندور
اشکیم کیمی بیر باش سو باش آلموشدی آخاردی
اوددان باش اودی دللره سالموشدی آخاردی
.
.
چشم اسرا دوشدی قبور شهدایه
یوز ویردی وله عالمی گویا اسرایه
بیر قبر که چوخ اشبهیدی عرش خدایه
مندن سوروشوبلار نیه شش گوشه دی بو قبر
جان نکهتی وار جانه عجب توشه دی بو قبر
.
.
بو سوزده گوزوم اشکیله تر ایلدی دامن
لازم اوزومه بُلدوم ایدم مطلبی روشن
وار علّتی شش گوشه دوشوب طرحه بو مدفن
اوچ گوهره گنجینه دی بو قبر مطهّر
اکبردی، حسین ابن علیدی، علی اصغر
.
.
هر کس که اوز ایستکلیسینون تاپدی مزارین
آچدی باشینی، باش داشنا قویدی عذارین
گُل تک ئوپوب ایگلردی قرار دل زارین
بیر دسته بو آق زلف سریمدن اله آلدیم
گُل تک یارالی قارداشیمون قبرینه سالدیم
.
.
سجّاد گَلر باخدی غم اوستن غم تازه
گر قیزلار ادامه ویره لر سوز و گدازه
ممکندی ئولوب گیتمیه لر بیرده حجازه
غم یتسه گینه غملی دله طاق اولی طاقی
امر ایلدی ترک ایلماقا مُلک عراقی
.
.
توفیق عنایت ایلیوب خالق سبحان
وحدن یارادا صالحینن حافظ قرآن
شرکتله یازوب تاپدی گوزل طرزیله پایان
هر کس اولاری باندی بُلوردی گینه بُلسون
غالب ایکی بیر جاندی بُلوردی گینه بُلسون
.
#یثربده_بشیرون_سسی_هنگامه_یاراتدی
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  البشارت اهل جهان بزنوبدی کون و مکان #حیدریه_محمدی_ولایی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی