یزید چیده ائدوب بیر بساط شاهانه #مجلس_یزید #حقیر_خویی

مجلس یزید
.
#زبدةالاشعار
.
: @nohe_torki
.
مرحوم میرزا عبدالوهاب حقیر خویی
.
یزید چیده ائدوب بیر بساط شاهانه
مرتّب ایلدی بیر مجلس ملوکانه
.
دوتوب غروریله تخت مرصّع اوسته قرار
ائدوب اعاظم و اعیانی مجلسه احضار
.
مشیرلر اُمرالر صولوندا صاقینده
غلام لر هامی صف چکدیلر قباقینده
.
سالوب جوانب اطراف مجلسه یوزونی
سریر سلطنت اوستونده گوروب اؤزونی
.
خیالینه گتوروب دفعتاً بیر اؤزگه خیال
فرنگ ائلچی سینه ایلیه ظهور جلال
.
بو مجلسین دئدی بیر جزئی ناتمام قالوب
او جز ٕ اولماسا ناقص بو بزم عام قالوب
.
گئدون دیون گله بو مجلسه حجازی لر
گلوب جلالینی بو شام امیرینین گوره لر
.
گوروم خراب اولاسان روزگار سفله نواز
نجه روادی خواتین پرده ی اعزاز
.
دوروب قاباقدا تماماً مقیّد و مغلول
قمار و شربه یزید لعین اولا مشغول
.
قاباقدا تختهٔ شطرنج الینده ساغر می
وئرور دوامیله ساقی پیاله پی در پی
.
ائدردی سیر بوحاله سر امام شهید
گوروب اؤزون ایتوروب بسکه مست اولدی یزید
.
غرور و کبریله کم اعتنا اهانتیله
باخور اسیرلره دیده ی حقارتیله
.
غریب عیالینین احوالینه اولوب دلگیر
که بلکه مجلسین اوضاعینه وئره تغییر
.
نظاره اهلینی مشغول ایلیه اؤزینه
گوز اولمیا باخالار اهل بیتین یوزینه
.
فصیح لحن حجازیله باشلیوب اوجادان
تلاوت ائتماق قرآنی ناطق قرآن
.
گوتوردی مجلسی بهت و سکوت و خاموشی
بیری بیرینه دیوب مجلس اهلی سرگوشی
.
عجیب امریدی قرآن اوخور کسیلمیش باش
یزید خوفه دوشوب سرّمیز مباد اولا فاش
.
دئدی بو باش منه باش اگمیوبدی اوّلدن
گورون باشی کسیلوب دوشموری گنه دلدن
.
اون ایکی یاره دگوب گرچه رأس انورینه
هنوز چوب جفا دگمیوبدی لبلرینه
.
اشاره ائتدی وئرون چوب خیزرانی منه
گوروم اوخور گنه آیات حق لِسانی منه
.
او دم جفائیله بیر چوب خیزران اؤ لعین
آلوب اله یوخاری قوزیوب شل اولموش الین
.
الین قویوب گوزینه هولیدن خانم زینب
دئدی الین قوروسون ای لعین گوزتله ادب
.
تجاوز ایلمه حقدن اوتان حیا ایله
یارالیدور گوروسن وورما آز جفا ایله
.
باخور حرملری آز قالدی غشّ ائده کلثوم
نه ایلیوب سنه ظالم بو سرور مظلوم
.
ندور گناهی وورورسان بو شاه عطشانی
مگر دوگلّه سیزون مذهبوزده مهمانی
.
یوخوندی شرم حیا ائتموسن پیمبردن
اوتان بو پرده دالیندا دوران حرملردن
.
بو دستگیرلر آخر بونون عیالیدیلار
توکلّه گوزیاشی دینمولّه چون حیالیدیلار
.
ملاحظه ائله حقّ پیمبری ظالم
اؤپوبدی جدّی مکرر بو لبلری ظالم
.
مگر قالار بولارین آه و ناله سی یرده
نتیجه سین گوره جاقسان بو ظلمین آخرده
.
ائدوب یزید جفاسینده هر قدر اصرار
ولی ائدلله تماشا آدی مسلمانلار
.
دوتوب تمامی حضّاری غفلت و حیرت
او مجلس ایچره نصارایه ال وروب غیرت
.
خیال ائدردی مگر خواب یا خیالیدی بو
او یالوارور بو ویرور باش اوخور نه حالیدی بو
.
دولاندیرور سؤز اورکده دیردی اؤز اؤزینه
ائدوب مسیح فلکدن نزول یر یوزونه
.
اگر دیوم بو باشا حضرت مسیحادور
غلطدی من گوررم شأنی اوندان اعلادور
.
زبس که باشه او باشین محبتی دوشدی
باشیلا ایلدی کرنش باشیدن گشدی
.
دئدی یزید منی قیل بو سرّدن آگاه
بو باش کیمیندی اوخور متصل کلام الله
.
دئدی سوروشما بو باشین حکایتی چوخدور
سنون که بو باشیلا آشنالیقون یوخدور
.
آتاسینون آدی حیدر آناسی زهرادور
آدی حسیندی جدّی رسول طاهادور
.
شرافتینده نسبده کیمین سوزی واردی
سریر سلطنتیمده ولی گوزی واردی
.
اؤدور که گؤزلمدیم احترام و حرمتینی
ریاست امریدی قویدوم گوزونده حسرتینی
.
ائشیتدی بو سوزی دوردی یریندن ائلچی روم
دئدی دئمه داخی کیم اولدی اولدوقی معلوم
.
مقام شأنی منه اولدی کُون کیمی روشن
بو سرورین آدی انجیلیده گلوب هاشن
.
ائدوب محبت دنیا نقدر مست سنی
بویوک خطایه سالوب نفس خودپرست سنی
.
پیمبرین قیزینین اوغلونی اؤزینی شهید
اسیر عیالین ائدوب ایلینده فخر یزید
.
بو کفر ظاهریله بیرده دعوی اسلام
قبیحیدور سنه اسلامی ایلمه بدنام
.
گلوب یزید لعین خشمه سسلدی جلّاد
دولاندیروب گوزونی اول جوان پاک نهاد
.
که سرگذشتی کسوب باشدان آلوب تعلیم
حسین حسین دیوب ائتدی جانینی تسلیم
.
«حقیر»قصّه ی بزم یزیدی ایله تمام
که صبح اهل حرم اولدی شام شومیده شام
.
.
#یزید_چیده_ائدوب_بیر_بساط_شاهانه
#ترکی
.
#زبدةالاشعار
.
: @nohe_torki