حالات طفل شیرخوار
.
#زبدةالاشعار
.
: @nohe_torki
.
سیفی اردبیلی
.
یوخلا قربانون اولوم گلمه چوخ افغانه على
ورما دیرناقلاروی بو قوری پستانه على
.
.
گنجه کئچمش یاریدان یات بالا یورما ئوزوی
نه دیلون وار دیه سن دردوی گیزلین سؤزوی
قوی ئوپوم لبلروی اشکیله دولمش گوزوی
توکمه مرجان کیمی گوز یاشوی دامانه على
.
.
دست ظلمیله اوغول خانه ی بختیم تالانوب
اولموسان نیمه نفس ساغر صبریم جالانوب
یانورام حالوه چوخ، گل دوداقون پارچالانوب
نه سو واردور نه صودوم سن کیمی جیرانه علی
.
.
محنتوندن دلیمه آتش حرمان یایلوب
تللرون آلنوا باخ گور نه پریشان یایلوب
دؤشومه دیرناق آتان اللریوه قان یایلوب
یوخ توان منده گورم سن باتاسان قانه على
.
.
اولموسان دست غمون قوش کیمی دوستاقی بالا
گوینَدَر هر آنانون قلبین اوغول داغی بالا
آز نفس چال سارالوبدور گوزوون آغی بالا
نیلیوم چاتمور الیم مرهم و درمانه على
.
.
آلتی آی سینه ده من هی سنه جان جان دئمیشم
بو شیرین جانی اوغول دردوه درمان دئمیشم
سحره چخسون اگر نذریده قربان دئمیشم
گوندرم من صدقه مذبح جانانه على
.
.
ایسته آهونله مدد خالق داوردن اوغول
آتووا صود وئرن انگشت پیمبردن اوغول
سنی سیراب ائلسون بو قوری دوشلردن اوغول
بیر فقط چاره قالوب معجز یزدانه علی
.
.
گُل رُخساروی چوخ غرق ائلمه شبنمه یات
آز قالور صبح آچیلا تاب ائله درد و غمه یات
سارالان صورتوی قوی آلشان سینمه یات
سنه لایلای سولیوم منده یانا یانه علی
.
.
#اصغریه_سیفی_اردبیلی
#اصغریه_شهادت #شب_عاشورا
#یوخلا_قربانون_اولوم_گلمه_چوخ_افغانه_على
#ترکی
.
#زبدةالاشعار
.
: @nohe_torki
نظر دهید