زبانحال حضرت قاسم (ع) با امام حسین (ع)
.
.
مرحوم انور اردبیلی
.
.
یولا سالدون اکبری مقتله
منه تنگ اولوب خیم ای عمو
آتاسیز دی قلبی شکسته دی
ائله قاسمه کرم ای عمو
.
.
کول اولیدی نامه یازانلارون
باشنا بلایه دوشوب باشون
نه اطاعت ائتدیلر امریوه
نه غمونده اولدولا یولداشون
قانون خیامیده بیر منم
بیر ئوزون و بیرده که قارداشون
اودا منتظردی شهادته
اولا قوللارى قلم ای عمو
.
.
باخورام بلا چولینه قوشون
گورورم که دولدوروب هر یانی
ایکی عالمون سن امیدی سن
قوشونون هانی کمکون هانی
ائله قلبیمه هیجان گلوب
قزیشوب دامارلاریمون قانی
نجه قارداش اوغلی دوام ائدر
عمو اولسا قدّی خم ای عمو
.
.
دئمورم مصاف یزیدیده
عملاً نظیرۀ اکبرم
ولی حیدری نسبم_
_نبیرۂ پاک فاتح خیبرم
نه اسیر اهل جفا اولوب
نه قوشون کمندینه دوشمرم
پوزارام نظام سپاهی من
یخارام بو گون علم ای عمو
.
.
ندور علتی منی قاتموسان
بو بلا چولونده سپاهوه
نظر ایله بیر آتاسیز گلوب
سخلوبدی ظل پناهوه
عمو قارداش اوغلی سوزی قالوب
منی قوش غلام سیاهوه
نه دلیله قاسمون ارزشی
هامودان اولوبدی کم ای عمو
.
.
سن امیر دین اولوالامرسن
منیچونده امر جهاد ائله
دئمه سنّی آزدی یتیمدی
یولا سال انیس مراد ائله
آنامی قوش اوغلى ئولنلره
آتاموندا روحینی شاد ائله
بیر ئولوم که نعمت و ناز اولا
ائله مرگیدن نه غم ای عمو
.
.
کیمون اولسا معرفتی یقین
یتیشوبدی حدّ کمالینه
چاتار ارزشه سوزی صحبتی
نه باخالّا سنّ و نه سالینه
گیدورم عباده عم أوغلومون
باخورام او قانلی جمالینه
اورگیم یانور دایانانمورام
اولا جانوه قسم ای عمو
.
.
او گونیکه زهری ایچوب آتام
اوزومه سنی آتا بیلمیشم
سخلوب پناهوه اون بیر ایل
بو بویا گلوب چاتا بیلمیشم
قوشونون داغلدی کچن گیجه
دئمه صبحه جک یاتا بیلمیشم
یوزه سیل اشکیم اولوب روان
گوزومی سیلوب ننم ای عمو
.
.
نچه ایلدی اکبره یولداشام
ائلیوبدی چوخ منه احترام
کیچیگم وظیفه دی حرمتین
اورگیمده دائمی ساخلارام
اونی قطعه قطعه ائدوب قوشون
نجه یولداشام هله من وارام
نه صفاسی وار منه عالمون
سنی ایلورم حکم ای عمو
.
.
او قدر جهاده هوس واریم
که اوچام منایه پر ایستورم
نه کمان و تیر اله آلمیشام
نه کمند و نه سپر ایستورم
اولانی فدا ائدرم سنه
نه تن ایستورم نه سر ایستورم
گرک عشقیله ره عشقه من
گوتورم بو گون قدم ای عمو
.
.
شهدا سانندا چوخ عیبدور
منیچون گلوب سانا یاتماسام
قانیمون نه ارزش و قیمتی
بویانوب اگر قانا باتماسام
قوشولوب عم اوغلوما خیمه لر
قاباقندا یان یانا یاتماسام
پوزولوبدی طرّه لری گرک
اولا کا کلیم بهم ای عمو
.
.
عموجان قسم وئرورم سنی
بشیگینده جان وئرن اصغره
آنامون گوزونده کی اشکینه
بی بیمون باشندا کی معجره
ته طشته کینۀ جعدہ دن
توکولن او ریزه جگرلره
ئوزومه سعادتون آچ یولون
منی ایله محترم ای عمو
.
.
نظریمده سفرۀ جودوون
بو وظیفه دور نمکین دوتوم
وئر اجازه یوخسا وساطته
آنامون گرک لچگین دوتوم
آناموندا دوشسه سوزی یره
بی بیمون گیدیم اتگین دوتوم
اونا باخماسون الوی اؤپوب
نجفه گرک گئدم ای عمو
.
.
.
#قاسمیه #انور_اردبیلی #قاسمیه_شهادت #ترکی #زبدةالاشعار #یادگار_انور
نظر دهید