در حالات حضرت معصومه (س)
۲۵۵ بیت شامل مقدمه مدح و حالات ، نامه امام رضا به حضرت و آمدن قاصد به مدینه ، خروج حضرت معصومه از مدینه و حالات راه و ورود به قم و شهادت ایشان – #گریز به #کوفه ، #ورود_شام ، #خرابه_شام ، #زینبیه_شهادت ، #قتلگاه ، #حضرت_رقیه_شهادت
.
.
مرحوم حسینی سعدی زمان
.
.
بو سوز که نظم ائلیوب ناظم وفا کردار
یازور همین خبری راویان خوش آثار
.
تصرف اولسا بیر آز لفظ ده دگول غفلت
زبان حالیدی اولماز منافی عصمت
.
که شهر طوسیده بیر گون شهید زهر جفا
قالان عیالینه حسرت غریب امام رضا
.
ز بسکه تنگه گلوب ابتلای غربتدن
دولوبدی قانیله گوگلی بلای غربتدن
.
او شاه دین وطن و عترتین سالوب یاده
توکوب سرشک بصر, نی کیمی گلوب داده
.
سالوب مدینه پیغمبری خیاله امام
مجسم ایتدی بنی هاشمی نظرده تمام
.
ویروبدی یوز غم و محنت او شاه مهمومه
علاوه یادینه دوشدی باجیسی معصومه
.
بلوب که آز قالوری عمر گلشنی سولسون
یاخوندی گلسون اجل حال احتضار اولسون
.
بو فکره دوشدی او حالین باجیسی بلسون
که زهر وئرسله معصومه نی گوروب اولسون
.
یانیقلی قلبیله آلدی الینه بیر خامه
یازوبدی باجیسینا گوز یاشیله بیر نامه
.
نه نامه صفحه قرطاسی اودلانان دلیدی
دواتی گوزلرینون جامی گور نه نسگلیدی
.
مرکبیدی گوزیندن آخان جگر قانی
او نامه نین غمیله باشلانوبدی عنوانی
.
ایدوم ننوعیله تقریر او حالی یا الله
مطالیبیدی همان نامه نین فغانیله آه
.
وفا خطین او زمان لوح سینه سینده قازدی
زبانحالیله معصومیه بیله یازدی
.
.
.
✔️ نامه و زبانحال امام رضا (ع) به حضرت معصومه (س)
#رضویه_شهادت
.
گل ای بلاکش دور زمانه معصومه
منه آنامدان اولان بیر نشانه معصومه
.
گتوردی ای باجی مامون منی خراسانه
عداوتین گتوره تا عیانه معصومه
.
آیوردی دور فلک ظلمیله منی سندن
بو غصه دن جگریم دوندی قانه معصومه
.
منی بو اهل جفا آخر ئولدورله یقین
که آختارولا منه چوخ بهانه معصومه
.
ویره له زهر جفا عاقبت آنام باجی
قویار سنی بو غمیم یانه یانه معصومه
.
دوشوبدی یادیمه اوغلوم تقی یانار جگریم
واریمدی شوق لقا اول جوانه معصومه
.
باجی اماندی اوزون تیز یتور خراسانه
یاخوندی گلشن عمریم خزانه معصومه
.
ویرنده جان آنان تک گوزلریمی سن باغلا
که حسرتم گوزیمی باغلیانه معصومه
.
آتام قراسینی باشوندان آچماقوی قالسون
یاخوندی دونماقا قدون کمانه معصومه
.
او قدر قالموری قارداش قراسینی گیئه سن
تیز اولگلان بو دیاره روانه معصومه
.
غرض او نامه نی یازدی امام کون و مکان
مدینه سمتینه بیر قاصدیله ایتدی روان
.
.
.
✔️ آمدن قاصد به مدینه
.
گلوب مدینیه قاصد یتوب تمنایه
یتوردی نامه نی دولت سرای والایه
.
کنیز آلوب اونی معصومیه او دم یتوروب
خانم گورنده همان نامه نی اوزون ایتوروب
.
هنوز نامه آچیلموب اوخنمیوب سطری
او نامه دن گلوری گوردی قارداشین عطری
.
باسوبدی باغرینا اول توکوب یوزه قانیاش
چکوب بیر آه جگردن دیدی که جان قارداش
.
اوپوب دوباره قویوب گوزلرینه ائتدی فغان
یانا یانا دیدی جان عطروه باجون قربان
.
امام نامه سین آچدی او برج عصمته ماه
اولوب او وقتیده مضمون نامه دن آگاه
.
سفر تدارکی گوردی اوزینه چون لازم
اولوب وفالی خانم طوس شهرینه عازم
.
قرار و صبرینی قارداش محبتی آلدی
امام عترتی گتدی اونی یولا سالدی
.
.
.
✔️ خروج حضرت معصومه (س) از مدینه
.
چخوب مدینه دن عزّتله اول نجیبه دهر
خیال وصلیله گزدی دولاندی شهر به شهر
.
ایدوبدی محنت هجران ز بس دل افسرده
اولوب مریض خانم گون به گون گلوب درده
.
گلوب او حالیله تا ساوه شهرینه یتدی
امید وصلینی دست فراق یاس ایتدی
.
حیات گلشنینی غم سمومی سولدوردی
رضا دیدی گوزی اشک تریله دولدوردی
.
قضا الی خانیمی قویمادی وصاله یته
دیار طوسه گیده دلده کی خیاله یته
.
تب عارض اولدی گل باغ احمدی سولدی
بهار عمری او تازه گولون خزان اولدی
.
گون اولدی شدت تبدن قرا گئجه گوزینه
جوانلیقیندا قونوبدور اولوم تری یوزینه
.
نهال قدّین ایاقدان سالوب تب لازم
دوشوب بو فکره اولا قم دیارینه عازم
.
بو بیر خبردی اوزی قصد ایدوب قما گیتسون
که بلکه اوردا تب لازمه علاج ایتسون
.
ولی بیر آیری خبر وار اَصحّدور بوندان
دئیم گرک اونی بو قول قالمیا پنهان
.
#قم اهلی باخبر اولدی که اخت حجت حق
ویروبدی یمن قدومیله ساویه رونق
.
توافق ایلدیله آل سعدیله یکسر
او شهره عصمت علیانی دعوت ائتسونلر
.
بیوک کیچیک هامی ائتسونله ساویه هجرت
ولیَّة اللهی ایتوسونله میهمان دعوت
.
همان مخدریه ایلسونله چوخ اجلال
گلنده شهره اولونسون بویوک بیر استقبال
.
بو امر خیره اولوب آل سعددن سبقت
که ایلسونله تشرّفله کسب حیثیت
.
تشیّعین شرفین ایلدی جهانه عَلَن
ازل حضورینه موسی بن خزرج اولدی گلن
.
بولوردی فاطمه شمس الشموسه سویگولودی
ز بس عفیفه دی موسی بن جعفرین گولودی
.
بلوردی وار او خانمدا نجه عُلُوّ مقام
خبر بو مطلبی ویرمیشدی آلتی منجی امام (۱)
.
ری اهلینه بیله فرمایش ایلمشدی او شاه
که کردگاره حرم دور جهاندا بیت الله
.
رسول حقّه ده وار بیر حرم بو دنیاده
آدی مدینه دی جدّیم یاتوب او ماواده
.
آتام علیّ ولی نینده واردی بیر حرمی
دیه لّه کوفه بی بیم زینبین محل غمی
.
.
.
✔️ #کوفه
.
همان او شهریدی کوفه آدی گلنده دله
گورور اورک گوزی بیر قانلی باش باتوبدی کوله
.
نه باش که طعنه ورار نوری مهر رخشانه
محاسینی بلشوب تل به تل قیزیل قانه
.
نه باش که نطقی قویوب اهل عالمی حیران
جداده قانه باتان لبلری اوخور قرآن
.
نه باش جداده یوزه قانلی گوز یاش آخوری
آچوخدی گوزلری اوز اهل بیتینه باخوری
.
نه باش صبا یلی دگدوقجا آرترور رقت
ایدورصاقا صولا قانلی محاسنی حرکت
.
نه باش که چولقالیوب گر چه یولدا گرد و غبار
ولی گینه یوزینون نوری مهره طعنه ویرار
.
نه باش او باشدان اولور نور گوگلره ساطع
باخان دیر سر نی دن اولوبدی گون طالع
.
نه باش که نیزه ده کهف آیه سین ایدوب ازبر
اوخور معاینه آیات کهفی پیغمبر
.
باخان دیور بو نه هنگامه دور نه مطلبدور
بو قانلی باش اوزی اول ماجرادن اعجبدور
.
توکور صحیفیه بو نظمدن شراره قلم
«حسینی» قویما که سوزده چکه کناره قلم
.
.
.
✔️ سفارش امام صادق (ع) به اهل ری
.
رئیس مذهب حق یعنی جعفر صادق
ری اهلینه بو بیاناتیله اولوب ناطق
.
خدای عالم و آدم , قدیر و فرد و امین
بیز اهلبیتینه ایلوبدی بر حرم تعیین
.
او #قم دی آزدی نظیری جلال و عفتده
او یردی دفن اولاجاق بیر بالام او تربتده
.
منیم همان بالامین اسم پاکی فاطمه دور
آناسی تک اونا حور بهشت خادمه دور
.
زیارت ایلسه هر کیم اونی او تربتده
بهشت واجب اولار اول کسه قیامتده (۲)
.
ز بس عفیفه دی عصمتلیدور او مهمومه
اولار ملقبه خلقین ایچینده معصومه
.
همین بو فکریله موسی بن خزرج اعلم
مشرّف اولماقا پابوسینه اولدی پیش قدم
.
مهار ناقه سین آلدی اله محبتدن
یر و گوی اهلینه فخر ایلدی بو خدمتدن
.
او اون آقاج یولی که گیتدی گاه دینجلدی
تمام عزّتیله قم دیارینه گلدی
.
یتیشدی شهره چون اول خواهر ولیّ الله
بو حالدن اولوب اول ساعت اهل شهر آگاه
.
تقدّم ایلدی تکریمه جمله خورد و کبار
چکلدی جار همان گونده باغلانوب بازار
.
امام باجیسینی سرفراز ایلدیلر
غریبه عزّتیله پیشواز ائلدیلر
.
او گون اولوندی او علیا جنابه چوخ حرمت
آپاردی محملینه عرش کبریا حسرت
.
گلوب تکلّمه موسی بن خزرج آگاه
دیلینده ازبر ایدوب لا اله الا الله
.
ووراندا باشینه شوق ولایتین شوری
اوخوردی لحن حجازیله آیۀ نوری
.
امام باجیسی هر یردن ایلینده عبور
چکردی جار اوجا صوتیله او مرد غیور
.
بیلون بو کیمدی بو فردوس عدن زیوریدور
اوزی امام قیزی هم امام خواهریدور
.
نهال باغ امامتده تازه بیر بَردور
باباسی ختم رسلدور آتاسی حیدردور
.
باباسی ماه مغارب شه مشارقدور
رئیس مذهب شیعه امام صادقدور
.
گل بهشتیدی خاتون دار عقبادور
آتاسی موسی کاظم آناسی زهرادور
.
بو سوزلری ایشیدوب اهل قم صغیر و کبیر
ویروبله سس سسه بیردن دئیردیله تکبیر
.
کجاوه سین گورن ایلردی یاخشی حرمتلر
چخوبلا بام لره گل سپردی عورتلر
.
.
.
✔️ احوالات #ورود_شام
.
آلیشدی یاندی جگر آه یا امام زمان
بیلنمورم نیه بس شام اولمادی ویران
.
امام باجیسی گر اولسا بیر نفر عورت
اونا زمانه ده ایلله بئله بیر حرمت
.
امام باجیسی یوخسا دگولدی زینب زار
گیرنده شامه او خاتون روزگار مدار
.
اونادا ایتدیله شام اهلی یاخشی حرمت لر
سیزیلدیاندا خانم کول توکردی عورتلر
.
یاناندا قلبی توکنده عذارینه قانیاش
سیزیلتیسین ایشدوب بامیدن آتاردیلا داش
.
یول اوستونه دوزولوب شامیان صف اندر صف
آچوب شماتته دل وجدیله چالاردیلا دف
.
اونو کجاوه سینه قُمّیان آتاردیلا گول
بونون کجاوه سینه شامیان توکردیله کول
.
اونی گورنده اولوردی نثار عطر و گلاب
بونی گورنده ولی دف چالاردی اهل عذاب
.
اونا دئیردیله بو تیره شام گوندوزیدور
بونا دئیردیله شام اهلی خارجی قیزیدور
.
نه یوز ویروب دیه بُلمم او زار و مهمومه
غرض دیوم نه اولوب وضع حال معصومه
.
.
.
✔️ ورود به قم
#حضرت_معصومه_ورود_قم
.
یتوبدی شهر قما اخت سرور باذل
ایدوبدی خانه موسی بن خزرجی منزل
.
مخدّرات خبردار اولوب که دخت امام
او یرده منزل ایدوب گلدیلر حضوره تمام
.
مشرّف اولدولا پابوسه ازدحامیله
اوپوبله ال ایاقین جمله احترامیله
.
نوازش ایتدیله حالین سوروشدولار یکسر
ایاقینه یوزینی قویدولا مخدره لر
.
همیشه صانع بی چون عالم امکان
مصون بلادن ایدوب ایلسون قمی آباد
.
بونون مقابلی خلّاق عالم امکان
گوروم همیشه ایده شام شهرینی ویران
.
گوروبدی حضرت معصومه قُمدا چوخ اجلال
ولیک زینب اولوب شامده پریشانحال
.
.
.
✔️ مصیبت حضرت زینب در شام
#خرابه_شام
.
قوناقیدی او خانمدا اهالی شامه
هزار حیف که دوندردیلر گونون شامه
.
غریبه ایتدیله حرمت او فرقۀ باطل
عَقیلَةُ العَرَبَه ویردیلر عجب منزل
.
گتوردولر او دلِ داغدیده سین درده
اسیر گوردوله یر ویردیلر قوری یرده
.
بُلوبله خسته دی یولدان گلوب او دلخسته
گلوبله دیدینه شام اهلی دسته به دسته
.
نه حرمت ایتدیله یوخ دلده شرحینه یارا
چوخ اعتذاریله بسدور اشاره یا زهرا
.
بُلوردیلر که ئولوب قارداشی باتوب محنه
ویره لَّه تسلیت عالمده قارداشی ئولنه
.
گله گله دل آچوبلار تمام تسلیته
امام عصر یانار ایندیده او تعزیته
.
عزیزۀ حرمه یاخشی خوش صفا دیدیلر
شماتته دل آچوب حرف ناسزا دیدیلر
.
بُله بُله بونی خاطرلیدور او مظلومه
حنالی اللری گوستردیلر او مهمومه
.
امام عصرین آلار بو قضیّه طاقتینی
آچوخ ، گر عمه سینین عرض ایدم مصیبتینی
.
ویرولسه شرح خانم زینبون مصائبینه
یتر مصیبت و غم ذوالفقار صاحبینه
.
.
.
✔️ادامه حالات حضرت معصومه (س)
.
گیچاخ بو مطلبی یتمز تمامه محنت شام
گرک قضیه معصومه نی ایداخ اتمام
.
اولوبدی دیدۀ معصومه ده جهان تاریک
مرض اریتدی اولوب جسمی نی کیمی باریک
.
گوزینده غم بو جهان وسیعی تنگ ایلدی
خانم او شهرده اون یدّی گون درنگ ایلدی
.
وفالی قارداشینا عشقینی نشان ویردی
رضا دیدی گوزی مروین یولوندا جان ویردی
.
رضا یولوندا قالان منتظر گوزین یومدی
شناگرِ یَمِ غم بحر رحمته جومدی
.
عزا بساطی قوروب اهل شهر اناث و ذکور
و لیک ایلیوب عورتلرین نواسی وفور
.
باخوب جنازیه رخصت ویروبله گوز یاشنا
گوروبدیلر که ایلیوب اللرین ئورک باشینا
.
ایکی الین گوتوروب ردّ ایدنده جامه سینی
اورک باشندا گوروبلر امام نامه سینی
.
.
.
✔️ گریز به حضرت زینب (س)
#زینبیه_شهادت
.
زمانه ده باجی قارداش اگر چه چوخ چوخدور
بئله وفالی باجی هئچ نشان ویرن یوخدی
.
اولان بونون کیمی قارداشینا وفا کردار
منیم زمانه ده بیر باجیدا سراغیم وار
.
او کیمدی حالینی من ایلینمرم تحریر
ولی وفاسینی بیر شمّه ایلیوم تقریر
.
بلالره آچیلان گونده مکتب تعلیم
او گون اولوب بونا تشکیل مدرسه تسلیم
.
خدای عشق بلوردی اوزی لیاقتینی
جهانیانه ولی بیلدیره جلالتینی
.
بلا و محنت عشقه گوروب ز بس که جَدیر
گتوردی ایلدی دارالفنون عشقه مدیر
.
بیری گر ایستسه تعلیم آلا کتابت عشق
گرک گلوب آلا بوندان زمانه ده سر مشق
.
وفاسینی ایشیدوب قلبون اولدی چوخ مشعوف
اولوم مُعرّف اونا تا سنه اولا معروف
.
آدین صریح دیوم قالماسون نهان مطلب
عَقیلةُ العَرب عُلیا مُکرّمه زینب
.
وفا و مهر یولوندا جلالیدن اَل اوزوب
تمام غملره قارداش محبتینده دوزوب
.
دیریلیقیندا وفاسین بونون هامی بُلدی
ئولن زماندادا فکر حسینیله ئولدی
.
ضعیف اولوب اَریوبدور وجود مجروحی
حسین دیه دیه جسمیندن آیریلوب روحی
.
جهانی حیرته سالدی بو درد و محنتلر
یغیشدیلار ویره لر تا که غسل عورتلر
.
خیال ایدردیله درد دل مکدّرینی
گوروبدولر که باسوب سینه سینه اللرینی
.
بیریسی دیده ده موج سرشگی سدّ ایلدی
تکان ویروب خانمون اللرینی ردّ ایلدی
.
ایدوب او حالتی قلب جهانیانه اثر
گوروبله اوردا کی عورتلر ایلینده نظر
.
نقود عشقیی یغوب ذرّه تک خزینه سینه
باسوبدی قارداشنون کوینگینی سینه سینه
.
.
.
✔️ پیراهن امام حسین (ع)
#حسینیه_شهادت
#قتلگاه
.
نه کوینک عالم امکاندا رتبه ده تک دور
آناسی فاطمه نی آغلادان او کوینک دور
.
نه کوینک عالم آرا یوخ نظیری عزتده
بهشت عدنده ده یوخ لباس او قیمتده
.
نه کوینک البسۀ خلددن گوزل یلمق
نظیر اولانماز اونا سندسیله استبرق
.
نه کوینک ایلر اونا غبطه گیسوی حورا
گلنده حشره سالار باشینه اونی زهرا
.
نه کوینک اولموش اونون تار و پودی مایۀ غم
تیکر او کوینگه گوز حشرده هامی عالم
.
نه کوینک اولسا کلیسایه بیر تلی زیور
شرفده بیت خدایه کِنِشت فخر ایلر
.
نه کوینک عالمه او، نشر ایدوبدی قرآنی
مین اوچ یوز ایلدی سویوبلار یوولمیوب قانی
.
نه کوینک آغلادار عصرین امامین اول کوینک
سویولموب ایمدیه دین بیر لباس او کوینک تک
.
نه کوینک اولماز اونون قیمتی ایکی دنیا
حسین او کوینگی گیمیشدی روز عاشورا
.
نه کوینک عالمیانه مُبشّر رحمت
او کوینک اوسته حسینه یتیبدی چوخ محنت
.
نه کوینک اوخ یاراسیندان اولوبدی صد پاره
همان او کوینک ایدوب زینبی گونی قاره
.
نه کوینک اولسا اجازه بتول عذرادن
آچار منیم قلمیم پرده بو معمادن
.
او قدر صاحبینه اوخ قلج وروب اعدا
اولوب مشبّک او ثوب عتیق سر تا پا
.
اجازه ویرسن اگر یا بَقیّةَ الاَخیار
اشاره سین ایدرم خاکپایوه اظهار
.
یارالارین قانی یکسر قمیصی دوتموشدی
گون ایستیسی بدنه ضمّ ایدوب قوروتموشدی
.
یانان دلی اویولوب جدّیوین او کوینگیله (۳)
دری لری سویولوب جدّیوین او کوینگیله
.
او پیرهنده نه وار ای تمام عالمه رب
فقط اوزون بیلوسن بیرده بینوا زینب
.
باسوبدی باغرینا علت ندور او مظلومه
ویریلسه شرح قالار شرحِ حالِ معصومه
.
.
.
✔️ ادامه حالات حضرت معصومه (س)
.
او گونکه قمدا گل باغ بوتراب سولوب
جوار رحمته معصومه روحی واصل اولوب
.
.
.
#حضرت_معصومه_شهادت
.
ایشیتدیلر که ئولوب خواهر امام غریب
گوروندی شهریده بیر شور و ازدحام غریب
.
مخدّرات گلوب نی کیمی نوا دلده
ویروبله غسل اونا وا محمّدا دیلده
.
عزا بساطی قوروبلار غریب ئولن خانما
تمام عزّتیله ایتدیلر کفن خانما
.
دیدیله قارداشی یوخ بوردا اشکبار اولسون
گلون عزاسینی بیز قویمیاخ که خوار اولسون
.
ویروبله سس سسه آهیله سینه داغلادیلار
دویونجا اوخشادیلار بیر دویونجا آغلادیلار
.
اولا جنازه سینین احترام و تجلیلی
اوجالدی اهل قمین جمله بانگ تهلیلی
.
نوا و نالۀ تهلیلیله فضا دولدی
گوتوردولر جسدین بابلانه نقل اولدی
.
بو «بابلان» هارادور عرض ایدوم اولون آگاه
همان او یردی که ایندی اولوب زیارتگاه
.
همان او یردی گوزل گنبد و مناره سی وار
باخان دئیر که فلک دور مه و ستاره سی وار
.
همان او یردی گیدر پاک شیعه فوج به فوج
او یردن ایلر اذان و دعا سسی گویه اوج
.
او نعش طاهره نی گتدیلر اورا احباب
درست ایتدیله دفن ایلماقه بیر سرداب
.
بو مطلب اولدی ولی آل سعده مایۀ غم
ذکور طائفه سیندن یانیندا یوخ محرم
.
بو بیر خانیمدی که بوندا بویوک جلالت وار
بونی مزاره قویا کیمده بو لیاقت وار
.
او کیمدی رخت علایق وجودیدن سویسون
گیروب مزاره آچوب صورتین یره قویسون
.
بو باره ده چوخ اولوب صحبت و سوال و جواب
صلاح کاری گوروب بوندا عاقبت احباب
.
که وار قبیله ده بیر خادم فرشته ضمیر
تَقیّ و اَورَعِ اهل قبیله چوخ چوخ پیر
.
مطیع قادر قهّاردور آدی قادر
سفارش ایلیه لر تا گلوب اولا حاضر
.
قویا امام قیزین قبره قالمیا یرده
گینه گتوردی بو سوز غملی قلبیمی درده
.
.
.
✔️ #گریز به حضرت رقیه (س)
#حضرت_رقیه_شهادت
.
ندن امام حسینون قیزی رقیه نی بس
خرابه ده قویا قبره تاپولمادی بیر کس
.
باخوب او حاله یانوب اهل عالم لاهوت
نه بیر کفن گتورن نه تاپولدی بیر تابوت
.
.
.
✔️ ادامه حالات حضرت معصومه (س)
.
غرض سفارش ایدوب اهل قم گله قادر
وَلیّةُ اللهی دفن ایتماقا اولا حاضر
.
بو حالده نه گوروبلر که رَمله سمتیندن
غبار قوزانوب اولدی ایکی سوار عَلَن
.
او نعش جانبینه گلماقا ایدولَّه شتاب
و لیک هر ایکیسی صورته سالوبلا نقاب
.
گلوب یتیشدیله تعجیل بی نهایتبله
پیاده اولدولا چوخ وقریله شهامتیله
.
نماز قیلدیلا اول کانِ عصمته اوّل
اولوبلا داخل سرداب خاصّ مستعجل
.
مزاره قویدولا دفن ایتدیله مخدّره نی
قیتدیلر گنه گلدیقلاری یولا عَلَنی
.
اولار نه ایلدیلر کشف پرده صورتدن
نه بیر نفر تانوری بیر ایله جماعتدن
.
ایکی سواره آدین گرچه یازمیوب اخبار
منیم ولی اوزومون بوردا بیر عقیدم وار
.
بودور عقیدم اونی دفن ایدن ایکی آزاد
بیری امام رضا دور بیری تقیّ جواد
.
او یرده حاضر اولوب قدرت امامتیله
قویوبلا قبره او خاتونی بو جسارتیله
.
تمام عزّ و شرفدور بو دار دنیاده
باجی ئولنده اولا دفنه قارداش آماده
.
.
.
✔️ #گریز به حضرت رقیه (س)
#حضرت_رقیه_شهادت
.
تمام باجیلارین آرزوسی وار ایکاش
ئولنده قویسون اونی قبره مهربان قارداش
.
خصوص بیر باجی کی قارداشا قالا حسرت
دیلینده ازبر اولا قارداش آدی بیر مدّت
.
رضا رضا دیدی بو، عاقبت رضا گلدی
رضا الیله قویولدی مزاره دینجلدی
.
رقیّه ده چوخ ایدوبدور علی علی ازبر
ندن خرابیه بس گلمدی علی اکبر ؟
.
نه شاد اولوب آچیلوب قلبی نه یوزی گولدی؟
علی علی دیدی یولدا قالوب گوزی ئولدی
.
ئولونجه سسلدی گل هارداسان علی اکبر
ئولور خرابه ده باجون سنون یولون گوزلر
.
بو سهلدور که علی اکبر ایتمدی اونی یاد
قویانمادی باجیسین قبره سیّد سجّاد
.
صریح یوخدی یازان کیم قویوب اونی قبره
دونه سزادی حسینی لرین گوزی ابره
.
بو دور عقیدم اونی غسل ویردی زینب اوزی
قابار ایاقلارینا، جسمینه، ساتاشدی گوزی
.
هنوز گوردی ایاقینده زخم آبله وار
دیریلیقی کیمی بوینوندا جای سلسله وار
.
نحیف جسمینه باخدوقجا سینه داغلاردی
دیلینده وای بالا وای سس چکردی آغلاردی
.
گلوبدی گوز یاشی موجه قلم سوزی آزدی
رقیّه قبرینی معلوم اولان خانم قازدی
.
خانملار ایتدی کمک لیق او معدن صبره
قویوب علی قیزی قارداش بالاسینی قبره
.
خرابه ده نه چکوبدور دیسم او مظلومه
قالار بقیّۀ دفنِ جنابِ معصومه
.
.
.
✔️ ادامه حالات حضرت معصومه (س)
.
همینکه قبره قویولدی او عصمت عُلیا
درست ایلدی بیر سقف بوریا موسی
.
او سقفی ایلدی موسی بنا بو منظوره
که سایبان اولا اول قبر پاک و پر نوره
.
گونون حرارتی دوشسه او قبره خفت اولور
نظرده خوار اولور قبری, هتک حرمت اولور
.
امام باجیسی دور چون او قبرده نائیم
مزاری اوسته گرک سایبان اولا دائم
.
قلم بو یرده «حسینی» گنه سوزی آزدی
ئولونجه شیعه حسینه گر آغلاسا آزدی
.
.
.
✔️ #گریز به #قتلگاه
.
اذیّتی گونون اولماز مزارده یاتانا
چتیندی گون دوشه بیر عور قانینه باتانا
.
قالاندا عور یارالی تنِ امام غریب
تاپولمادی اونا بیر سایبان ویرن ترتیب
.
گون ایستی قانلی قوم اوستی بدن دولی یاره
بسان گُل داغلوبدور او جسم صد پاره
.
باجیسی زینب کبری گلنده قتلگهه
تعجبّیله نظر سالدی بیر یارالی شهه
.
نه گوردی وار نه باشی نه لباسی پیکرده
لباس سهلیدی، یوخدور بیلکده اللرده
.
گورنده واردی نه باش نه لباس قارداشدا
مدینه سمتینه یوز دوندروب الی باشدا
.
آدیله سسلدی اوز جدّینی او دریا دل
جفای اهل جفادن آچوب شکایته دل
.
دیدی بابا بو حسینوندی قاننه غلطان
کسوبدیلر دالیدان نازنین باشین عطشان
.
یارالی جسمده واردور نه پیرهن نه قبا
نه واردی خامس آل عباده بیرجه عبا
.
عمامه سین آپاروبلار ستمله تاراجه
یارالی باشی چخوب نوک نی ده معراجه
.
گوروب که ویرمدی جدّی او بی پناهه جواب
دونوب حسینه طرف ایلدی دوباره خطاب
.
.
.
✔️ زبانحال حضرت زینب(س) با امام (ع) در #قتلگاه
.
دی بیر گوروم یارالی سن منیم حسینیم سن
باشیم اوجالیقی عالمده , نور عینیم سن
.
هدایتین گونی نولدی کی گون کیمی باتدون
سبب نه اولدی نظردن عیالوی آتدون
.
هدایتین گمیسی نولدی قانه غرق اولدی
غریق بحر بلا جمله غرب و شرق اولدی
.
تمام عالمه سن دستیاریدون یارالی
یدالله اوغلی یَدِ کردگاریدون یارالی
.
سنون جهاندا الون اوستونه بیر اَل یوخودی
مقام عزّ و شرفده سنه بَدَل یوخودی
.
بو خلق آرا سنیدون مظهرِ حقِ بیچون
نه اولدی؟ اولدون اراذل الینده بیله زبون
.
تمام عالمه فُلک النّجاتیدون قارداش
حقیقتاً اوزون عین الحیاتیدون قارداش
.
او قدرتیله تعبّد یولون نشان ویردون
قوری دوداقیله باخدون فراته جان ویردون
.
سوئی سنون یوزوه باغلیان زمان اعدا
اولیدی کاش جهان قانیله دولی دریا
.
سنون باجون دگل آیا بو خانه سی ویران
نولوبدی زینبی دیندیرموسن ، سنه قربان
.
جواب گلمدی گوردی یارالی قارداشدان
کسیلدی چاره سی بالمرّه قوم و قارداشدان
.
دولاندیروبدی بقیعه یوزین او کان حیا
یارالی قلبیله ایتدی خطاب یا زهرا
.
.
.
✔️ زبانحال حضرت زینب (س) با حضرت فاطمه زهرا (س) در #قتلگاه
.
آنا بو قانینه غلطان سنون حسینوندور
یارالی پیکری عریان سنون حسینوندور
.
همان حسیندی بو گل تک اوپردون ایگلردون
ایدوبله گل کیمی خندان سنون حسینوندور
.
همان بدندی که سینونده بسلمشدون سن
اولوبدی خاکیله یکسان سنون حسینوندور
.
بو لشگری داغیلان تخت و تاجی غارت اولان
تمام عالمه سلطان سنون حسینوندور
.
بو قیزلاری سویولان اهلبیتی چولده قالان
قتیل لشکر عدوان سنون حسینوندور
.
بو قان ایچینده شناور نجات کشتی سی
نجاتِ عالم امکان سنون حسینوندور
.
بو قوملار اوسته اوزی قویلی پاره پاره بدن
حبیب خالق دوران سنون حسینوندور
.
قالان جنازه سی بی غسل و بی کفن یارالی
قویان عیالینی گریان سنون حسینوندور
.
جواب گلمدی گوردی آناسی زهرادن
هجوم محنت و غمدن دوشوب توانادن
.
شرار آهیله دنیانی دلکباب ایلدی
مخاطبین دگشوب اوخلارا خطاب ایلدی
.
.
.
✔️ زبانحال حضرت زینب (س) با تیر سه شعبه در #قتلگاه
.
بو رسمدور یارالی بی کسی هامی یوخلار
بو یوخلاماقدی مگر ای جگر دَلَن اوخلار
.
بو سینه مخزن علم خدای عالم دور
مگر بو سینۀ مجروحه تیر محرمدور
.
او هانسی چرخیدی بو پایه ده ستاره سی وار
او هانسی سینه دی بیر بیله قانلو یاره سی وار
.
گون ایستی پیکری خسته نه ساتر و نه کفن
یانور یارالی بدن یوخدی کیمسه دفن ایلین
.
.
ادامه این متن در موضوع #عاشورا_گونی
«زبانحال حضرت زینب خطاب به آفتاب» با مصرع اول #عریان_گورنده_قارداشنی_دخت_بوتراب ، #ای_گون_ندور_بو_سوزشون_اودلاندی_قارداشیم
.
(۱) منتهی الآمال ج ۲ ص ۱۶۲
.
(۲) امام رضا علیه السلام فرمود: «مَنْ زارَها فَلَهُ الْجَنَّةُ»؛ «کسی که فاطمه معصومه را زیارت کند بهشت برای او خواهد بود.» کامل الزیارات، ص ۵۳۶، ح ۸۲۶/ بحارالانوار، ج ۱۰۲، ص ۲۶۵/ ثواب الاعمال، ص ۱۲۴/ عیون اخبار الرضا، ج ۲، ص ۲۶۷.
.
(۳) مطلب همین است که نوشته ام، ولی هر کس در خودش لیاقت نداند و این بیت را بخواند لعنت خداوند و ائمه معصومین (ع) بر او باد.
.
.
#حضرت_معصومه_ورود_قم
#حضرت_معصومه_شهادت
#سعدی_زمان
#بو_سوز_که_نظم_ائلیوب_ناظم_وفا_کردار
#چهارده_معصوم_حسینی ص ۳۲۷ الی ۳۴۶
#ترکی
#زبدةالاشعار
نظر دهید