دفن شهدا
.
.
✍️ #زبدةالاشعار ✍️
.
🆔: @nohe_torki
.
مرحوم حاج علی اکبر قاسمیان (مارالانی)
.
.
امر ایدوب سجّاده خلّاقِ قدیر
ای اولان ظاهرده اشراره اسیر
.
واردی بوینوندا اگر چه سلسله
کربلایه گیت حسینی دفن ایله
.
ایتدیله دینه فدا اوز جانلارین
قویما یر اوزده منا قربانلارین
.
ایلیه طاعت خدا فرمانینه
یوز قویوب کرب و بلا میدانینه
.
گوردی رنگارنگ آچوب گوللر سولوب
قانیله کرب و بلا دشتی دولوب
.
بیر شهیدین باشی یوخ، جسمی یارا
بعضیسی السیز دوشوب میدان آرا
.
بیر قبیله اهلی حیران آغلوری
مرد و زن حالی پریشان آغلوری
.
گوردولر سجّادی، هر کس اوز سوزون
گیزلدوب دیلده، سیلوب آغلار گوزون
.
ایتدی فرمایش او سجّادِ علیل
من اوزوم اولّام سیزه ایندی دلیل
.
دفن ایداخ بو دین حق یاورلرین
پادشاهین، لشکرین، سرلشکرین
.
قتلگاهه یوز دولاندوردی امام
شاهِ دینه عرض ایدوب اوّل سلام
.
ای بابا من خسته یورقون گلمیشم
دفنیوه چوخ حالی پوزقون گلمیشم
.
اولدی مشغول اول شهِ گردون مدار
تا ویره ترتیب او شاهه بیر مزار
.
گوردی آماده حسینون قبرینی
بارشه گَتدی سرشگِ ابرینی
.
گوز یاشیله ویردی اوّل غسلینی
ایستدی قویسون مزاره جسمینی
.
عرض ایدیب اهلِ قبیله که شها
بیز کمکلیخ ایلیاخ تا دفن اولا
.
ایتدی فرمایش امامِ محتشم
فرض ایدیرسوز دفن ایتماقدا تکم
.
وار یَدِ غیبی بو ایشده برملا
انبیائیله دولوبدی کربلا
.
قویدی قبره جسمین آه و زاریله
گوئیا گلشن دولوبدور خاریله
.
دفن حالاتین یازوبلار چوخلاری
هیچ دیین یوخ چکدی سجّاد اوخلاری
.
من دیمم بو نکته اود جانه سالور
جسمیدن اوخلار چکیلدی یا قالور؟
.
اللرین تاپدی گتوردی اول شهین
آختاروردی گوردیلر قتلگهین
.
واریری گوللر توکه گول یاپراقین
شاهِ دین تاپدی گتوردی بارماقین
.
یغدی اعضای حسینی بیر یره
صبر ارکانین ووروبدور بیر بیره
.
گوردی بیر سس گلدی ای سجّاد اوغول
دستگیرِ لشکرِ بیداد اوغول
.
ابرِ باران تک آخور بو گوز یاشین
قالدی یرده شیرخواره قارداشون
.
آغلادوبدی محنتینده گویلری
گیت گتور قوی سینم اوسته اصغری
.
قبریده یاتسون آتائیله بالا
اوخلی سینمده بالام راحت یاتا
.
اصغری گتدی امامِ ممتحن
سینه سی اوسته قویوب با صد محن
.
خاک ریز ایتدی آتا قبرین اوزی
بارماقیله یازدی قبره بو سوزی
.
یعنی بو قبره گلن زوّاریلر
بوردا ناله ایلسین حضّاریلر
.
بو حسینی تشنه لب ئولدوردولر
بی گناه و بی سبب ئولدوردولر
.
باخدی قارداشی علیّ اکبره
چوخ مؤثّر اولدی چون اول سَروره
.
سویلدی بو نوجوانِ خوش سیَر
گول کیمی خندان اولوب قانی گیدر
.
بو غریبون اوغلودی بو نوجوان
قارداشیمدی قدّیمی ایلوب کمان
.
امر ایدوب اهلِ قبیله بیر مزار
اکبره پایینِ پاده قازدیلار
.
گوئیا سنبل یانیندا خوشه دور
قبرِ پاکی عرش تک شش گوشه دور
.
قارداشین دفن ایتدی قارداش آغلادی
سیلِ اشگین گلعذاره باغلادی
.
جمله انصارینده دفن ایتدی امام
گوردی دربان ایستوری بیله مقام
.
بیر حبیبون حقّیدور دربان اولا
قبرینه جانیم منیم قربان اولا
.
آستانِ شهده دربان ایلدی
فارغ اولدی دلدن افغان ایلدی
.
دوندی فرمایش ایدوب اول باغری قان
وار دییون آیا گینه یرده قالان
.
عرض ایدوبله ای اولان خضره دلیل
اولموسان خسته پریشان و علیل
.
بسکه یورقونسان اولوبسان ناتوان
نهرِ علقم اوسته وار بیر پهلوان
.
نه باشی وار جسمیده نه اللری
بیر اوجا قامتده یوخ بیر صاف یری
.
پوزدی بو سوز حالِ بیماری دئدی
گوز یاشین ایتدی یوزه جاری دئدی
.
او عمومدور قانینه غلطان اولوب
جسمی یرده گل کیمی خندان اولوب
.
قامتین بوکدی حسینون دهریده
قویدی بیر جفت ال کنارِ نهریده
.
سیّدِ سجّاد امر ایتدی گَلون
طاقت و صبریم داخی گیتدی گلون
.
مَصرعِ عبّاسه یوز دوندردیلر
عرض ایدیم نه حالتیله گلدیلر
.
گوردی سقّا نعشینی دیلده فغان
بو سوزی بیر بوردا ایلوبدی بیان
.
ای عمو اشرارِ شام و کوفیان
نه جفالر ایتدیلر فاش و نهان
.
بو قدر بول زینب و کلثومِ زار
بیر طنابه قول قولا باغلاندیلار
.
یوز دوتوب القصّه اول سجّادِ زار
امر ایدوب بیر قبر او یرده قازدیلار
.
بوردا چوخ سوز وار دیمزلر هیچ زمان
وای خانم امّ البنین وای الامان
.
نعشینی قویدی نه نوعی قبرینه
باخ امامین بیر ثبات و صبرینه
.
خورداجا قبره قویوب گول پیکری
سینه سی اوسته قویوبدور اللرین
.
حضرتِ زهرا او بانوی عزیز
تا گلنده حشره یومِ رستخیز
.
اللرین عبّاسینون آلسین اله
وار یری بو نوعیله گلسون دیله
.
انتقامین آل خدا بو اللرین
بیرده عفو ائت جدّیمون امّتلرین
.
ای آدی سقّا لب عطشان جان ویرن
کربلاده دینه ال قربان ویرن
.
اولموسان باب الحوائج منتخب
آرزو ایلولّه قبرین روز وشب
.
بیر جماعت منله همراه اولماقا
قبریوه یوز قویماقا قول سالماقا
.
لطف ایله ایسته مزارِ پاکیوه
یوز قویاخ بیر روضه ی غمناکیوه
.
اکبره (اکبر) قسم ویردی سنی
ناامید ایتمه علی اوغلی منی
.
سن بولورسن من نیین دلداقیم
بیر رقیّه قبرینون مشتاقیم
.
منده بیر (اکبر) آدینلی نوکرم
چوخ مقصّر، سیز ولی صاحب کرم
.
.
#دفن_شهدا #قاسمیان_مارالانی
#امر_ایدوب_سجاده_خلاق_قدیر
#ترکی
.
✍️ #زبدةالاشعار ✍️
.
🆔: @nohe_torki
نظر دهید