مجلس یزید
زبانحال حضرت رقیه (س) به حضرت زینب (س)
.
.
مرحوم نجمی تبریزی
.
.
عمه بو یزید کافر چوخ بیوک جسارت ایلر
اوز قوناقینه ایوینده بیله هتک حرمت ایلر
.
.
چوب خیزران الینده تختینون مقابلینده
سر شاه مشرقینه دمبدم اذیت ایلر
.
.
گورموری مگر بو باشدا وار اون ایکی کاری یاره
اگلنوبدی قانلو یاره اوستونه دوباره یاره
نیه چوبیله بو باشه ایلوری گینه اشاره
هانسی بیر ستمگر آخر بیله بیر جسارت ایلر
.
.
نجه گور بو نسگل ایتمز دل داغداره تاثیر
نجه گور بو غصه پوزماز منی ایلمز گلوگیر
کاش اولیدی ایمدی بوردا عمومون الینده شمشیر
آتاما نجه گوزیدیم بو شقی اهانت ایلر
.
.
ایله مستدور بو کافر جام کبر و نخوتیله
کاسۀ دلی لبالب دولودور شقاوتیله
گه وورور بو قانلو باشی گه گولور عداوتیله
گه دوتوب یوزون بنات حیدره شمادت ایلر
.
.
گاه میل ایدور قماره گه شراب ایچور بو کافر
قتلینه گهی امامون حکم ایدور بو کینه پرور
نیه قورخموری خدادن بس بیر عمه بو ستمگر
دیموری بو باش خدایه حشرده شکایت ایلر
.
.
گاه چوبیله بو راس انوره ایدور اهانت
گه فناریله بو ظالم بو باشا ایدور سیاست
گور نه قدری واردی بوندا بغض و کینه و عداوت
میوۀ دل بتوله تیغیله سیاست ایلر
.
.
وار یری اگر سرشکیم قان اولا بو نسگل اوسته
نالم اوج ایده جفای فرقۀ اراذل اوسته
بسلمه میشدی بو یارالی باشی فاطمه دل اوسته
نجه گور بو حالی گورسه آنام استقامت ایلر
.
.
بلموری مگر بو صورت وجه وجه کبریادور
بو یارالی راس انور بند قلب مرتضادور
بو سولان سوسوز دوداقلار بوسه گاه مصطفادور
نیه بو بلالی باشه ظلم بینهایت ایلر
.
.
بو شقی آقاج ویراندا لب لعل شاه دینه
گورموری مگر نه حاله قالوری بو دل حزینه
صدمه قورخورام یتیرسون چوب گوهر ثمینه
چوبیله شکست گوهر هانسی بی لیاقت ایلر
.
.
بیر نفر دیین اولیدی بو یزید شومه ای کاش
ایلوسن بیله اهانت نیلیوب سنه کسیک باش
گورموری اونی ویراندا قیزلاری توکولّه قان یاش
بیزلری نیه بو کافر غرق اشک حسرت ایلر
.
.
ساخلیوبدی کیم بو نوعی احترامینی قوناقین
آرتورور شرار ظلمی دمبدم دل احتراقین
ظاهراً بابام حسینون یاره لیر سوسوز دوداقین
باطناً دل رسول اکرمی جراحت ایلر
.
.
مجلس یزید شرحین نجمیا تمامه ویرمه
بسدی قطع صحبت ایله مطلبه ادامه ویرمه
مجمل اولسا سوز گوزلدی طول چوخ کلامه ویرمه
شرح غم سوز اهلی اولسا مختصر کفایت ایلر
.
.
#مجلس_یزید #نجمی_تبریزی #ترکی #زبدةالاشعار
نظر دهید