اگر زخارف دنیا نفیس زیبادور #حسینیه_دخیل

در پندیات
ترجمۀ منظوم کلام امام حسین (ع) (1)
و عزاداران واقعی حضرت
.
.
مرحوم دخیل مراغه ای
.
.
اگر زخارف دنیا نفیس زیبادور
ولی ثواب الهی سبیل اعلیدور
.
اگر اولوبلا بدنلر ئولوم ایچون مخلوق
خدا یولوندا قلج قتلی خیر عقبادور
.
اگر قباقجا مقدّر اولوبدی روزی لر
آز اولسا یاخشیدی سعیون چوخ اولسا بیجادور
.
اگر قویوب گیده جکسن بو مال دنیانی
نه بخل او ماله که ترک اولماقی هویدادور
.
نزول ایدوب بومضامین سماء عصمتدن
کلام معنی قرآنه چونکه معنادور
.
قبول ایدن بولاری شیعۀ حسینی دور
وگرنه صاحبی اوندان یقین مبرّادور
.
جهانی آختاراسان یوخدی دوست قاف بقاف
نچونکه دوست وجودی وجود عقبادور
.
وصال لیلیه چوخ مدعی اولوب شاهد
بیری جنون بریسی اعتراف لیلادور
.
ایدر ثبوت بو دعوانی باکی العینین
که بی شهادت عدلین محض دعوادور
.
قباقجا چونکه بکانی دیوبدی شاهد صدق
مسامحه ایلین لر دیوب تباکادور
.
گوزون فرات کیمی اشکین ایلین جاری
سوزون ولای شه کربلاده مجرادور
.
گرک باخا گوزی که جستجوی جوی ایدن
او شاه تشنیه هر کیم گوگلده جویادور
.
اگر واروندی تولّا بلایه تاب ایله
گرک بلا چکه هر کیم محبّ مولادور
.
دیمیشدی نشئۀ اولاده چون بلایه بلی
ایدنده ترک او صورتده ترک اولی دور
.
نشانه دوستلوقا گوزلرینده گوز یاشیدور
گوگولده آتش غم دلده واحسینادور
.
سنونله یوخدی رجوعیم مخاطبم اؤزومه
اؤزوی دوست دیرسن عجب تمنّادور
.
نه دوست سان که دیر العطش امام حسین
ولیک آب گوارا سنه گوارادور
.
بیری ایچنده سرین سو دیلّه نوش اولسون
یقین بودور که خلاف رضای زهرادور
.
نه ادّعای محبّتدی بو که آب زلال
حسینه زهریدور اما سنه چو حلوادور
.
سنه حریر قبا شاه بی لباسه لباس
غبار و خار و خس و کوه دشت صحرادور
.
عیالویله گیجه صبح اولونجا یات راحت
ایشون ندور دیه سن کربلاده غوغادور
.
آجاندا ماحضرون عنبرین مزعفردور
سوسوز اولاندا سویون آب جام مینادور
.
یاتوبدی آل حسین بالشی خس و خاشاک
لحاف بستر اونا خاک خار خارادور
.
بو دوست گوگلی دگل بلکه سنگ خارادور
که رختخوابِ او شه مخملیله خارادور
.
یاتوب رضاسی ایله کربلاده چون عریان
اودور که خوابگهی اوج عرش اعلادور
.
سن آغلاما او امامه که آغلیان چوخدور
بهشت عدنده سکان عرش والادور
.
دوتان عزا بیری عیسی بیریسی مریمدور
گیین قرا بیری آدم بیریسی حوّادور
.
سالان ردا یره احمد آچان یاخاسین على
باتان قرایه آناسی بتول عذرادور
.
بیر آغلیان اونا عباسیدور بدن گوزگوز
که قانلی کیپریگی تیر و سنان اعدادور
.
بیری عزا علمیدور که باشی عرشه یتوب
یاتوب اگرچه ولیکن بلند بالادور
.
بیر آغلیانی اونا اکبرون یارالاریدور
یارا آغیردی ولی نوک تیغ برّادور
.
بیر آغلیان اونا قاسم تمام جسمیله
یاراسی گوز کیمی قانیله اشک بارادور
.
بیر آغلیان اونا یعقوب آل احمددور
که شغلی قرخ ایل اولونجا بکا و ابکادور
.
بیر آغلیانی اگر قویسا شمر زینب دور
سسین چخارتموری اما سرشکی پیدادور
.
بیر آغلیان اونا کلثوم دور بیری لیلا
گھی حسین و گھی ذکری واعلیادور
.
بیر آغلیان اونا اما سکینه نین گوزیدور
وورار باشینا اگرچه الی محنّادور
.
ییر آغلیان اؤزیدورچشمه چشمه قانی آخار
تمام چون گوز اولوب پاره پاره اعضادور
.
بیر آغلیانیدا وار دور کیم اولماقین بیلمم
ولیک هرنه دی پروردگار دانادور
.
دیر مطابق واقع اجازه سی و اردور
زبانحالیله گویایه نطقی گویادور
.
فصول اربعه نی چون بهار ایدوبدی دخیل
او دور که همنفسی عندلیب شیدادور
.
.
(1) امام حسین علیه السلام
فَإِنْ تَكُنِ الدُّنْيَا تُعَدُّ نَفِيسَةً/ فَدَارُ ثَوَابِ اللَّهِ أَعْلَى وَ أَنْبَلُ‏// وَ إِنْ تَكُنِ الْأَمْوَالُ لِلتَّرْكِ جَمْعُهَا/ فَمَا بَالُ مَتْرُوكٍ بِهِ الْحُرُّ يَبْخَلُ‏// وَ إِنْ تَكُنْ الْأَرْزَاقُ قِسْماً مُقَدَّراً/ فَقِلَّةُ حِرْصِ الْمَرْءِ فِي الْكَسْبِ أَجْمَلُ//‏ وَ إِنْ تَكُنِ الْأَبْدَانُ لِلْمَوْتِ أُنْشِئَتْ/ فَقَتْلُ امْرِئٍ بِالسَّيْفِ فِي اللَّهِ أَفْضَلُ‏

گرچه زندگی این دنیا از نظر گروهی بسیار با ارزش است، ولی آخرت که جهان پاداش الهی است، بالاتر و با ارزش تر است و اگر جمع آوری مال و ثروت برای این است که باید روزی از آن دست برداشت، پس مرد نباید برای چنین ثروتی بخل ورزد و و اگر روزی ها مقدّر و تقسیم شده است، پس هر چه انسان در کسب ثروت کم حرص تر باشد، نیکوتر است و اگر این بدن ها برای مرگ آفریده شده است، پس کشته شدن انسان در راه خدا از همه چیز پسندیده تر است.
منبع : مناقب آل أبي طالب عليهم السلام (لابن شهرآشوب)، ج‏4، ص: 95
.
.
#حسینیه #دخیل #حسینیه_شهادت #پندیات #ترکی #زبدةالاشعار