یخلاندا یره آتدان او وفا دریاسی #عباسیه_عافی_تبریزی

استمداد حضرت ابو الفضل (ع)
..
..
مرحوم حاج بیوک عافى تبریزی
..
..
یخلاندا یره آتدان او وفا دریاسی
دئدی تیز درک ایله قارداش یارالی عبّاسی
..
آتام اوغلی منه گر چه قوشونون جرئتی وار
هله الده یارالی قارداشوین فرصتی وار
..
دیمورم گل منه امداد ایله بو مهلکه ده
ولی بو سسله ماقون بیر سبب و علّتی وار
..
گوره بولسم یوزیوی بیرده سعادتدى منه
منه دیداریوین عالمده بیوک لذّتی وار
..
کشمکشدی باشیم اوستونده یتش فریاده
دشمنین گل نجه گور بیر بیرینه سبقتی وار
..
اوزگه عالمدی دوشوب اللره السیز بدنیم
منه خصمین دل نحسینده جفا نیّتی وار
..
منی مأمور ایلمیشدون گتورم خیمیه سو
خجل اولدوم بو قصورین منه چوخ خفتی وار
..
چوخ چالشدیم دولی مشگی یتورم خیمه لره
ولی نیلوم که یول اوستونده عدو کثرتی وار
..
مشگی حفظ ایتماقا بیر ذرّه قصوریم یوخودی
بولوسن منده آتام شیر خدا غیرتی وار
..
اوخ آتانلار منی اما ایلدی شرمنده
سو خصوصینده بو خجلت زده نون خجلتی وار
..
منی هر غصّه دن آرتوخ سو غمی یاندیروری
هامودان چوخ منه بو فاجعه نون خفتی وار
..
..
تا امام آلدی سسین حیدر کرّار کیمی
گلدی گوردی یخیلوب جعفر طیار کیمی
..
..
دیدی ای قوللاریمون قدرتی قارداش گوزون آچ
صولتی شیر خدا صولتی قارداش گوزون آچ
..
ای دوشن شهرتی دیلدن دیله دنیا بویوجا
دشمنی خوفه سالان هیبتی قارداش گوزون آچ
..
ای آلان نهری سوسوز ترک ایلین نهری سوسوز
یاندیران قلبینی سو صحبتی قارداش گوزون آچ
..
قلبیمه وورما یارا گل دیله سس ویر سیمه
ای ملاحتلی سوزی صحبتی قارداش گوزون آچ
..
بولوسن یوخدی بو صحراده حسینون کمکی
لیک وار دشمنینون کثرتی قارداش گوزون آچ
..
نایب منقبت حیدر صفدر سنیدون
سنده وار شیر خدا غیرتی قارداش گوزون آچ
..
خیمیه گتماقا مایل سن اگر یاتما بیله
مغتنم بول بیله بیر فرصتی قارداش گوزون آچ
..
ایاقا دورماقا جسمونده اگر یوخدی توان
نظره آل بوکولن قامتی قارداش گوزون آچ
..
..
تا حسینون سسینی آلدی علمدار رشید
داده گلدی ایده اظهار ارادت او سعید
..
..
دیدی قارداش بولوسن من نجه دریا دلیدیم
نقد جانیله سو آلماقلیقا چوخ مایلیدیم
..
گوره بولموردوم عطشدن سارالان گللریوی
سبب اولموشدی گرفتار غم و مشکلیدیم
..
سوگتوردوم اله بو وادى پر غوغاده
یتورم تشنه لب اطفالوه چوخ عاجلیدیم
..
قوللاریم سالمیدی هر نقدر پیکرده
همتیله علمه مشگه سویا حایلیدیم
..
هر طرفدن اوخ آتان دوز منی دوتموشدی هدف
منده هر فکری آتوب مشگیمه تک حایلیدیم
..
نقش بر آب ایده لی نقشه می بیر تیر سه پر
مشگی حفظ ایتماقا هر چند بوگون قابلیدیم
..
سو توکولدی یره باغلاندی منه چاره یولی
ایله بیر وقتده قارداش ئولومه مایلیدیم
..
من که راضی دگولم حمل ایده سوز خیمه لره
خجلم گر چه اولان عهدیمه من عاملیدیم
..
ایمدی تشریف آپارون خیمه لره بولسون لر
حرم اهلی سو آلان تشنه ئولن عادلیدیم
..
بیور اطفاله سو اوستونده قویوب جان عبّاس
من اولاردان بیله فکر ایتمیه لر غافلیدیم
..
..
#عباسیه #عافی_تبریزی #عباسیه_شهادت #ترکی #زبدةالاشعار