گل اوغول خیمه ده لیلا باشوا تا دولانا #اکبریه_هادی_وحیدی

وداع حضرت علی اکبر علیه السلام
..
..
..
هادی وحیدی زنجانی
..
..
..
گل اوغول خیمه ده لیلا باشوا تا دولانا
گرچه یوخ تاب قیام ائتماقچون پا دولانا
..
هله تز دور علی جان مرکبیوه اولما سوار
یوسفیم دوریوه تا نچّه زلیخا دولانا
..
لالۀ چهروه اوغلوم اوتوروب شبنم غم
آغلاماقدان یرى وار باشیمه دنیا دولانا
..
آق کفن قامتیوه یاخشى ماشاالله یاراشور
دایان اطرافیوه بیر عترت طاها دولانا
..
باغلانوب رشتۀ عمروم یومولان گوزلریوه
ئولموشم باخ منه روحیم اولا احیا دولانا
..
دیریلر عطریوی گر مردۀ صدساله آلا
دم جان بخشویله خوشدی مسیحا دولانا
..
الله الله نه روادور ئوله اکبر تشنه
چولده بیجا یره مهریۀ زهرا دولانا
..
بسلدوم من سنی قربان گوزل اوغلوم بوگونه
وار یری باشیوه گر هاجر سارا دولانا
..
گورسه گر قامتیوی سرو چمنده خم اولار
باش اگر قامتیوه قامت طوبا دولانا
..
طور سینای محبّتده دور اوغول کرب و بلا
وار یری کرب و بلا دشتینی موسا دولانا
..
یوزیوی سینمه قوی قلبیمه آرامش ویر
لیلی دلسیز نجه ای سرو دلارا دولانا
..
شاهد عشق آلاندا بُیوی آغوشه
حجله گاهنده گرک آغلیا، صغرا دولانا
..
یاشیل عمامه ویروب جلوه سر و صورتیوه
هاله تک مه یوزیوه زلفووی قویما دولانا
..
بالا نازیله قدم آتما خرامان یریمه
گرچه زیبادی یواش سن کیمی زیبا دولانا
..
سیل اوغول چشمۀ چشمیمدن آخان گوز یاشیمی
اولما راضی یوزومی اشک غم افزا دولانا
..
غنچه تک باغلا دوداقون سوزووی رمزیله دئ
لبلرون خشکدی آغزیندا دیلون تا دولانا
..
قانه باتسان سن اوغول قاسم عم اوغلون قالسا
الی قوینوندا گرک یثربی تنها دولانا
..
گوزووی بیرده دولاندور آناوون باخ یوزونه
سوورم سیره گلوب دیدۀ شهلا دولانا
..
ئولدورر نسگیل اگر قویماسام اوغلوم یوزومی
ایاقون اوستونه ایستر دایانا یا دولانا
..
ایله «هادی» باشیوی شام یولوندا منه سن
قویما مجنون کیمی صحرالری لیلا دولانا
..
..
..
#اکبریه #هادی_وحیدی #اکبریه_شهادت #ترکی #زبدةالاشعار