سلام اولسون سنه ای شاه عطشان #حسینیه_کریمی_مراغه_ای

#سلام_بر_عاشورائیان
زبانحال زائر کربلا
..
..
مرحوم کریمی مراغه ای
..
..
..
سلام اولسون سنه ای شاه عطشان
صفالی قبریوه قربان حسینجان
..
..
..
سلام اولسون سنه شهزاده اکبر
سلام اولسون سنه ششماهه اصغر
یاتوب بیر قبریده اوچ قانلی پیکر
سلام اولسون سیزه اوچ قانه غلطان
..
..
..
نه مدتدی چکردوخ اشتیاقون
گوریدوخ باصفا صحنون رواقون
بحمدالله گلوب اولدوخ قوناقون
او قلبوندن دگن پیکانه قربان
..
..
..
سلام اولسون سنه یتمش غریبه
کسیلمش اللره شیب خضیبه
سلام اولسون سنه بیرده حبیبه
قوجا دربان سالار شهیدان
..
..
..
زیارت ایلین کس کربلانی
زیارت ایلیوب عرش خدانی
حسین عکس جمال لامکانی
حسین آئینۀ سیمای سبحان
..
..
..
دیار شامدن الده پیامیم
باجوندان وار سنه عرض سلامیم
سلام اولسون سنه یالقیز امامیم
آقا سن میزبانسان بیزده مهمان
..
..
..
روادور ناله میز عرشه دایانسون
ولیکن قورخوروخ اصغر اویانسون
دوباره آغلاسون قانه بویانسون
اویانسا گل بوغازیندان آخار قان
..
..
..
آقا چوخلار یانار نار فراقه
گجه گوندوز تیکوبلر گوز عراقه
اورکلرده بو قبره وار علاقه
خصوصاً ملت محبوب ایران
..
..
..
قالا قویما اورکلرده بو حسرت
هامی باشلاردا وار شور زیارت
احبّانی بو قبره ایله دعوت
گوزل آدون حسیندی ایله احسان
..
..
..
فرات ای افتخار چاه زمزم
هانی زمزمده ذوق نهر علقم
سنون زوّاریوه یوخدور جهنّم
ایدر غبطه بو نهره آب حیوان
..
..
..
روادور ایلیاخ سندن گلایه
ترحّم ایتمدون آل عبایه
رقیه سو دیدی گلدی نوایه
علی اصغری ایتدون پریشان
..
..
..
کریمی عشق پاکیله اوجالدی
ولایت آستاننده قوجالدی
اورکده کربلانین عشقى قالدى
گیدر قبره بو غمله دیده گریان
..
..
..
..
#حسینیه #کریمی_مراغه_ای #حسینیه_مدح #ترکی #کربلا #زائر_کربلا #آرزوی_کربلا #زبدةالاشعار