ای قلم یاز زینب آدین دفتره پرشور اولار #اربعین_ذاکر_هشترودی

رد اثاث غارت شده و اربعین
..
..
..
..
ذاکری هشترودی
..
..
..
..
ای قلم یاز زینب آدین دفتره پرشور اولار
هر مجالسده گله آدی او مجلس نور اولار
..
..
..
..
کیمدی زهرادن صورا زینب کیمین بیر عالمه
نیلدی گور شامیده زینب یزید ظالمه
باخما ای ظالم دیدی بو پرشکسته حالیمه
ای یزید ای دین اسلامی بو دنیایه ساتان
ویر دیدی غارت اثاثینی حیا ایله اوتان
..
..
..
..
الغرض گوردی یزید اوضاعی برهم تیتردی
ویردی تز غارت اثاثین قانلی پرچم تیتردی
گورجگین قانلو لوانی قیزلار ازدم تیتردی
بوقچالار بیردن آچیلدی غم بساطى باشلانوب
قلبی آل حیدرین الله بیلور یكسر یانوب
..
..
..
..
قانلو پرچم خوردا گهواره قویولدی مجلسه
اهل بیت مصطفى یكسر ویروبلر سس سسه
ویردیلر گهواره نی فوراً رباب بی کسه
گوردیلر گهواره نی آلدی او داغلی سینیه
گیتدی اگلشدی بالاسی اصغره لای لای دیه
..
..
..
..
بیرده گوردی ام کلثومی باتوبدور ماتمه
زینب امر ایتدی باجی آغلا او قانلو پرچمه
منده بیر پیراهنی آلّام یارالی سینمه
لیلینونده واردی گوردی دلده آه و ناله سین
امر ایدوب سنده خانم آل اکبرین عمّامه سین
..
..
..
..
مجلس ماتم قورولدی یکسره آغلاشدیلار
تیر غم اوغلى ئولنلر قلب زاره ساشدیلار
بعضی لر غش ایلیوبدی بعضی لر باش آشدیلار
قورخوسیندان معاویه اوغلی سیاست ایشلدیب
آل پیغمبر مخیّردور هارا گیتسه گیدوب
..
..
..
..
ناقه لر حاضر اولوبدور غم قطارى یوللانوب
زینبین قلبی دوباره آتش غمده یانوب
باخدی بیر خوردا مزاره اود دوتوبدی اودلانوب
کربلایه سسلنوبدور دور گیدک نازلی بالام
یا سنیله بیر خداحافظ ایدک نازلی بالام
..
..
..
..
الغرض نازلی رقیه تک قالوبدور شامیده
امر ایدوب زینب ربابه چاره یوخدی صبر ایده
ایستورم کرب و بلایه بو مسافرلر گیده
لیلی اوردا یاس دوتا اوغلی علی اکبره
کربلاده آغلیارسان سنده دیلسیز اصغره
..
..
..
..
کاروان غم خلاصه کربلایه چاتدیلار
ناقه لردن اوزلرین یکسر ترابه آتدیلار
گوز یاشیلان نینوانون تپراقین ایسلاتدیلار
اوغلی قارداشی ئولنلر جمله سینه داغلادی
هامیدان چوخ کربلاده غملی زینب آغلادی
..
..
..
..
سینه سین قویدی حسینون قبرینه جان جان دیدی
آلتی گوشه قبریوه زینب اولا قربان دیدی
دور گلوبدور قیزلارون یکسر سنه مهمان دیدی
بیر فقط نازلی بالون آرامیمی آلدی حسین
عفو ایله ئولدی آجیندان شامیده قالدی حسین
..
..
..
..
نسگیلی چوخدی سوروشما قلبیمی قان ایلیوب
گورجگین طشتده یارالی باشی افغان ایلیوب
جانینی قارداش یارالی باشه قربان ایلیوب
تیر غم بو قلب زاری شامیده بُولدی حسین
گورجگین نازلی رقیّم باشووی ئولدى حسین
..
..
..
..
شرمگینم قارداش ایندی قبرون اوسته گلمیشم
دل یاراسی چوخ ویروبلار ایندی خسته گلمیشم
باشیمه چوخ داش دگوب قلبی شکسته گلمیشم
بیر فقط الله بیلور نه حاله قالدیم شامیده
بیرده سجّادیم بیلور قارداش قوجالدیم شامیده
..
..
..
..
داش ویرانلاردان دیوم قارداش و یا کی شامیدن
کوفه دن یا که توکوبلر باشیمه کول بامیدن
بیر شکایت ایلورم من گردش ایّامیدن
بیر فقط الله یتیشدى زینبین امدادینه
خارجی سسلوردیلر پیغمبرین اولادینه
..
..
..
..
کوفه احوالاتینی یازدوقجا قلبیم اودلانور
زینب امر ایتدی بیزی بو شهریده چوخلار تانور
وورمیون داش بو یتیمه قزلارون قلبی یانور
«ذاکری» گلسه اگر بو شهره غم بزمی قورار
یاد ایدر بو صحنه نی باشه ایکی اللی ورار
..
..
..
..
#اربعین #ذاکر_هشترودی #ترکی #زبدةالاشعار