مرکب رهوارون اوسته قاصد چابک سوار #انور_اردبیلی

آمدن قاصد یزید ملعون از شام به مدینه
و جریان مجلس ولید
#گریز به احوالات #سدیف غلام حضرت علی اکبر (ع) در #مجلس_یزید

.

✍️ زبدة الاشعار ✍️

?: @nohe_torki
.
مرحوم انور اردبیلی
.
مرکب رهوارون اوسته قاصد چابک سوار
قلبده آهنگ یثرب شامیدن اولدی کنار
پشت سرده قویدی بیر بیر منزلی لیل و نهار
شاهد مقصودینه نزدیک اولوبدور دمبدم
مقصده گلدی قدم قویدی او پیک بدم قدم

.
شهر یثرب که مقام و مرکز اخیاریدی
میهماندار مهاجر خانۀ انصاریدی
بیر ایله شهره ولید عتبه فرمانداریدی
شامیان یخمیشدی دینون خانۀ آبادینی
گوشه گیر ائتمیشدی عبدالمطلب اولادینی

.
نامه سین وئردی ولیده پیک دربار یزید
متنی ائتدی قرائت مضطرب اولدی ولید
مطلبی کوتاه بیر نامیدی لحنی چوخ شدید
روزگارون قلبینه هر نکته سی مین داغیدی
عمده عنوانی حسینون بیعتی ابلاغیدی

.
پیر مکار سیاست یعنی مروان دنی
عترت پیغمبرون سرسخت و بی رو دشمنی
حاکم وقته دیدی قیلسون مشاور گر منی
مجلسه ایسته حسین ابن علیدن بیعت آل
ائتمسه بیعت یزیده بیل اونون قتلین حلال

.
رأی مروانی ولید عتبه بیلدی ناروا
اعتراضیله دیدی وئرمه منه حکم خطا
بو حسین ابن علیدور مظهر قهر خدا
مفخر انسانیتدی عادی بیر انسان دَگل
بیعت آلماق یا که ئولدورمگ اونی آسان دَگل

.
مسجد ختم پیمبرده حسین فخر امم
اگلشوب ابن زبیریله او شام محتشم
مسجده ناگه ولیدون قاصدی قویدی قدم
خاطر سلطانه آهسته وئرور رمز خطیر
یاحسین دار الحکومتده سیزی گوزلور امیر

.
دعوتین قیلدی اجابت قاصدی سالدی یولا
قلبینون پیمانه سی آز قالدی غُصّیله دولا
عرض ایدوب فوراً زُبیرون اوغلی شاها خیر اولا
قیلدی فرمایش گمانیم وار بو دعوتدن مراد
حاکم وقته گلوبدور شامیدن حکم فساد

.
زادۀ هندی چکوبدور کامه کام آخرت
فاسق اوغلون مست ایدوب حبّ مقام و سلطنت
فکری وار بیعت آلا مندن او ضد معدلت
مرد فاسقدن چتین روحیم ایده بیعت قبول
منطقیم آزاده لیکدور ائتمرم ذلت قبول

.
دودمان اقدسه گلدی او شاه دادگر
زادگان حیدر کرّاری قیلدی باخبر
باغلادی شمشیر او شیر افکن جوانلار سربسر
اولدی آماده غلام و خادم و شهزاده لر
دلبر و دلخواهین آلدی دوره سین دلداده لر

.
ایستدی چخسون کناره باب اقدسدن امام
خانماننده پوزولدی عترت خیرالانام
قورخولی بیر حادثِیدی ائتمدی هیچ کیم دوام
بانوان عصمتی بو غم پریشان ساخلادی
باجیسی زینب باشی اوستنده قرآن ساخلادی

.
عرض قیلدی حافظ قرآنی یارب حفظ ائله
نفس سلم و روح با ایمانی یارب حفظ ائله
حقّه پشتیبان اولان انسانی یارب حفظ ائله
یوخدی پشتیبانی دینون نور عینیمدن صورا
پنج تندن قالمیوب بیر کس حسینیمدن صورا

.
مجلس شوم ولیده یوز قویوب سلطان دین
چوخ متانتله گیدوردی معنی حبل المتین
بزم نا امنه یتیشدی سالک راه امین
گلمگین بیلدی ولید ائتدی حسینی پیشواز
عرض ائدوب اولدوق قدمونله حسینجان سرفراز

.
اطلاعون وار یقیناً اتفاق شامیدن
گوز یوموبدور یعنی خال المؤمنین ایّامیدن
خوشدور اولسون باخبر الان گلن پیغامیدن
ایلدی تقدیم او سلطانه یزیدون نامه سین
سرور ملک ولا آلدی بلا برنامه سین

.
نامیه باخدی بیلوب مضمونینی شمس هدا
قیلدی فرمایش ولیده اُول امام مقتدا
نامه ده منظور اولان عنوانی بیلدوم برملا
مسئله دشواریدور خوشدور صباحه قالماقی
گوندوزه موکول ایله مندن بو بیعت آلماقی

.
ایلدی راضی ولیدی شهریار محترم
منطقی سوزدور سوزون عرض ایتدی ای میر اُمَم
زشت گفتاره گلوب ناگاه مروان حکم
وئرمه الدن فرصتی چوخ یاخشی فرصتدور ولید
بیعت آل فوری حسیندن وقت بیعتدور ولید

.
وقت الحاح و تعارفدن کچوبدور مرحله
مقتضی موجود اولان یرده غلط دور حوصله
یکّه و تنها حسین بیرده چتین دوشسون اله
غافل اوچی نه مدارا ایلسون نخجیریله
خو ش دیلیله بیعت ائتمز بیعت آل شمشیریله

.
ناروا گفتارینی مروان شوم ائتدی ادا
قیلدی فرمایش او نامرده غریب کربلا
غفلتون وار ایلیورسن چوخ بیوک بیر ادّعا
غیرت الله اوغلیام من جرأتوز یوخدور سیزون
بیعت آلماقه حسیندن قدرتوز یوخدور سیزون

.
سن کیمی تهدید ایدورسن ای لعین و بدمرام
عنصر وارستیم ظلّامه تسلیم اولمارام
مسلمینون بیعتین بیلَّم یزده من حرام
مدّعیدور دین پاکیله کتاب اللهیله
کج روشدور کج عملدور یول گیدور کج راهیله

.
اولما بومجلسده ظالم بی کمک گوردون منی
مهربان قارداشلاریم واردور شجاعت معدنی
گور بو حالی گورسه عبّاسیم قویار الدن سنی
فکر ایدورسن سهلدور خلوتده ذبح اولسون باشیم
منتظردور سرسراده بش دلاور قارداشیم

.
یتدی بو سس نوجوانان رشیده حیدره
هامّودان آرتوق اثر ایتدی علی اکبره
چکدی شمشیر ایستدی سلطان دینه سس وئره
قویمادی عباس اونی آتما دیدی شمشیره اَل
قوی گوروم مولا کیمی امدادینه سسلور اَول

.
بزمیده سلطان عالم پشت درده لشکری
سسلدی امدادینه نه قاسمی نه اکبری
نه عقیل اوغلانلارین نه فضل و عون و جعفری
هارداسان گل مجلسه ای زیب اجلاسیم دئدی
هیچ آدی ذکر ائتمدی اوّلده عباسیم دئدی

.
ال آتوب خیبرکن اوغلی ائتدی ناگه فتح باب
دوتدی مروانون گریبانین نشان بوتراب
شیر تک روباهی یخدی توپراقا قیلدی خطاب
کج باخا بیلمز امیّه نسلی آلِ هاشیمه
ئولموشم من؟ سن تمرّد ایلوسن قاراشیمه

.
گوردی مروان چاره یوخ آچدی زبان التجا
دامن پاک حسینه آتدی اَل اول بی حیا
عرض ایدوب رحم ایت منه سن بیل آنون خیرالنساء
دوشدوگوم دام هلاکت رنجه سیندن قورتاروم
جرمیمی عفو ایت بو شیرون پنجه سیندن قورتاروم

.
قیلدی فرمایش ابوالفضله شه گردون وقار
بوشلا بو نامردی نابود ایلمه ای نامدار
یالوارور ئولدورمه قوی اولسون هلاکتدن کنار
عجز یالوارماق بولاردا رمز قدرت بیزده دور
عفو و اغماض عطا رحم و مروّت بیزده دور

.
پنجۀ عباسدن اولدی رها مروان دون
صندلینده کئچدی اگلشدی او روباه جبون
قلبیده نسبت حسینیه کینه سی اولدی فزون
خاطرینده نقش قیلدی مجلسون جریاننی
جستجو ائتدی همیشه دردینون درماننی

.
یاندیران بیر سوز دیوم سرمایۀ شیون بیلوز
بیر روایت نظم ایدوم معناسی دوز راویسی دوز
«مجد» مرحومون ئوز آغزیندان چخان سوزدور بوسوز
مجلس شوم یزیدون شرحین ایلوردی عیان
مسجد دروازده ده بو مطلبی ائتدی بیان

.
تخت عاج اوستنده اگلشدی یزید بدنهاد
شاهد مقصودینی آغوشه آلدی اولدی شاد
حاجب مخصوصینه ناگه وئروب حکم فساد
مجلسه داخل ایدون فوراً کسیلمیش باشلاری
فاطمه قزلارینون آخسون یوزه گوزیاشلاری

.
مجلسون اهلی اوتورمشدی عموماً انتظار
بیر اوجا نی ده سرِ آزادمرد روزگار
مدخل بزمه ئوزون فوراً یتوردی نیزه دار
گوردی آلچاقدور قاپی بیر فکر ایدوبدور اول دنی
یاره لی باش نیزه باشینده خم ایتدی نیزه نی

.
نیزه قدین خم گوروب مروان دوزتدی قامتین
یادینه فوراً سالوب بزم ولیدون صحبتین
طعنه لی بیر سوز دیدی ائتدی عیان ضدیتین
یاحسین من بو گونی ایستوردوم عالمده گورم
بس دیوردون من یزیده دهریده باش اگمرم

.
قبل بیان آیا نه گلدی یاور و انصاریوه
شیرمرد افرادیوه یا شیردل سرداریوه
قالمیوب کیمسون اقلاً باش چکه قزلاریوه
روزگار آلدی الوندن اوغلووی قارداشیوی
ئولمدوم گوردوم جدا اوسته کسیلمیش باشیوی

.
آغلادی قید اسارتده اولان خرد و کبار
اگلشوب مروان دیله گلدی یزید فتنه کار
سویلدی سیزله نجه رفتار قیلدی روزگار
منکه سرمستم خرامانم خوش اجلالم بوگون
مجلسیم خوش ملتیم خوشدور خوش احوالم بوگون

.
باخدی باخدی تا گوزی دوشدی غلام اکبره
گوردی نابینادی گوزلردن ولی خوش منظره
رحمی گلدی گوزلری دوشجک یومولموش گوزلره
سویلدی کیمسن بو زیبا قامته صد حیف حیف
قیلدی فرمایش غلام اکبرم آدیم #سدیف

.
سویلدی زیبا جوانسان قامتاً شمشادسن
گوزلروندن حیف اولا معیوبسن ناشادسن
عارضی بیر دردیدور یا کور مادرزادسن
اهل عشقم من دیدی قلبیم ائوی پر نور اولوب
گوزلریم بینائیدی کرب و بلاده کور اولوب

.
ایله فکر ائتمه دگوب بو گوزلره تیر جفا
نوک نی دن یا دم شمشیردن یتموب یارا
گوزلرینه اکبرون بو گوزلری ویردوم فدا
یاره سین گورجک اونون قان آغلادی پیر و جوان
منده درک ائتدوم او زیبا گوزلرین بیر پارچا قان

.
خدمتیمده صادقیدوم قلبیدن گئتدی دوزوم
عشقیم اثباته یته بیر یاخشی فکر ائتدوم ئوزوم
دوشدی اول زیبا گوز عشقینده منیم گوزدن گوزوم
باشیمی شور بلیاتیله پر شور ایلدیم
گوزلریمدن اولقدر محکم ووروب کور ایلدیم

.
#مجلس_ولید #مجلس_یزید
#مرکب_رهوارون_اوسته_قاصد_چابک_سوار
#انور_اردبیلی #یادگار_انور
#ترکی
.
✍️ #زبدةالاشعار ✍️

?: @nohe_torki