اربعین
..
..
..
..
..
رضا غلامپور (دلپاک)
..
..
..
..
..
اولوبدی امر اجابت دعای قلبه رفیق
باجین تاپیب آنام اوغلی زیارته توفیق
..
زهی سلیقهٔ طراح عالمه کی چکیب
مداد رحمتیله طرح بو مزاری دقیق
..
بو اربعین کی محققَّدی سرّی زینبیوه
محالیدی اولا واضح بیرینه بو تحقیق
..
دور ای سفینهٔ احسانه ناخدا کی گلیب
مزارون اوستونه امواج غصه ده بو غریق
..
سطوح حاله قوامیم دایاقدی مصلحتاً
که عمق جانیمی سالمیش ملاله درد عمیق
..
بو جمعیدن نجه عرض ایلیم سنه قارداش
نچه عزیزه نی مامور جبر ائدیب تفریق
..
ائله کشیده لنیب خط قمچی جسمیمده
کی گوئیا یازلیب غم بو تنده نستعلیق
..
پوزور نه نوعیله گور اتحاد روح و تنی
اولاندا نالهٔ جانسوز نالیه تلفیق
..
شهادتیله اسارت بو بس کی متفقاً
ائدیبله نیت مرعوب دشمنی تعویق
..
حصول نخلهٔ محنتدی حال جانکاهیم
کی برگ برگ خزانیله حالتیم تطبیق
..
تضاد محضه مشرحدی کربلا کی شهید
شقی الینده ئولوب سن کیمی امام شفیق
..
او کهنه عهدیله کی وئردی باش بو امر جدید
بولوندوروب ندی دنیایه سرّ عهد عتیق
..
محالیدی بوله بیرکس طریقتون سرّین
ائلیه سن دئدیقون تک مگر کی طی طریق
..
رقیه دن نه دئیوم من سنه کی گوردون اوزون
نجه گوزوندن آخیردی ئولنده اشک رقیق
..
دئیوم ملال لبیندن نلر کی وار بو قدر
غبار و خاکیله گویا بلشمیشیدی عقیق
..
گلنده آدی دله بحر ژرف خجلتیمی
وئریر نشان سنه هر قطره قطرهٔ تعریق
..
منیله سوز فراقون محال ائده سازش
کی بیر فضاده چاتانماز وفاقه آب و حریق
..
دوباره کوفه و شاماتیده ائدیب تحقیر
حقارت اهلینی نطقیمده واژهٔ تحمیق
..
دور ای طبیب دلیم کی سنون الونله نولار
دوای مهر اولا بیرده بو قلبیمه تزریق
..
ئوزومه ناله نی ائتدیم بو مدتی تحریم
بو حسرتی نجه گور گوزیاشیم ائدیر تصدیق
..
بو قیزلارین کی گلیبله سنون زیارتیوه
منه اولوبلا اسارت زمانی یار صدیق
..
یازاندا نوحه سنه قلب پاکیله دلپاک
صله وئریب من اوزوم ایلرم اونی تشویق
..
اولوبدی امر اجابت دعای قلبه رفیق #اربعین_دلپاک
نظر دهید