ای دوشن باش سیز وجودی قاننه غلطان اوغول #شام_غریبان_محمدی_ناطق

شام غریبان
.
.
.
محسن محمدی هشترودی ( ناطقی )
.
.
.
ای دوشن باش سیز وجودی قاننه غلطان اوغول
فاطمه اولسون یارالی جانوه قربان اوغول
گلمیشم ایوای دیم
من سنه لای لای دیم
.
.
بو منای عشقیده باشسیز قالیبدور پیکرون
قلبیمی قان ایلدی مذبوح اولونموش حنجرون
گوزلریم قربان سنه کیملر کسیبدور اللرون
قتلیوه باعث اولوبدور هانسی بیر عنوان اوغول
.
.
یاتما دور توپراقلار اوسته گوزلریم آئینه سی
آتلارین دیرناقلاری آتدا سینا گول سینه سی
سینة مجروحین اسرار خدا کابینه سی
روح بخش عاشقان و منشأ ایمان اوغول
.
.
صبرمی یغمایه ویرمه گلشنیم تاراج اولوب
گل وجودون ظلم الیله اوخلارا آماج اولوب
نوک نیزه جان زهرا باشوه معراج اولوب
قانلو نیزه جلوه لندی گون کیمی تابان اوغول
.
.
پرچم حریّت آچدون شاهراه عشقده
محضر جانانه چاتدون وعده گاه عشقده
لنگر آتدون جان مادر رازگاه عشقده
فلک دریای سعادت گوردی بس طوفان اوغول
.
.
چوخ چتین اولدی او ساعتده فراقون زینبه
اولمادی قسمت ئوپه قانلو دوداقون زینبه
شمر کسدی باشون چاتدی سوراقون زینبه
ویرمدی فرصت دالیجا فرقة عدوان اوغول
.
.
عترت طاهانی یاندیردون اوغول هجرانوه
بو چوخور یئرده باتوبسان دینه خاطر قانوه
ئوز آنان قربان حسین بو پیکر عریانوه
آچموسان توپراقلار اوسته سفرة احسان اوغول
.
.
اولمادی بیر کیم سنه ایتسون حمایت زینبه
منجنیق غم سیخوب اولدی قیامت زینبه
آیری بیر اوضاع یاراتدی قتل و غارت زینبه
شعله چکدی خیملرده آتش سوزان اوغول
.
.
آتش بلوایه یاندی چاره سیز لر چاره سی
ظالمانه غارت اولدی اصغرون گهواره سی
اولمادون اوغلوم آلیندی قیزلارون گوشواره سی
قورخوردان قاچدی چوله اطفال سرگردان اوغول
.
.
سخت اولوبدور بو گیجه شام غریبان زینبه
گلمیشم سس ویرمگه قلبی اولان قان زینبه
یوخدور امداد ایلین حالی پریشان زینبه
یوخدور عباسیم اولوبدور خیمده دربان اوغول
.
.
بنزیور سن وای منه اوراق اولان قرآنه سن
دوشموسن باش سیز یارالی ساحت میدانه سن
کاش اوغول اعلان ائدیدون فرقة عدوانه سن
من پیمبر زاده یم الده واریم برهان اوغول
.
.
کوفیه باشون گیدوب ای شهریار کربلا
اولموسان راضی ئوزون بو ماجرایه مطلقا
«ناطقی» عرض ایلیور اولما رضا مولای ما
قبریوه حسرت قالا عمری تاپور پایان اوغول
.
.
.
#شام_غریبان_محمدی_ناطق #ترکی #زبدةالاشعار