بشر گوز آچ بو جهان پایدار قالمیاجاق #پندیات_جائد_زنجانی

عبرت نامه
اشاره به مصائب اهل بیت علیهم السّلام
..
..
..
..
کربلایی فخرالدین اسکندری
..
..
..
..
بشر گوز آچ بو جهان پایدار قالمیاجاق
فنادی عالم آرا هر نه وار قالمیاجاق
..
بصیرتیله نظر سال بو فانی دنیایه
الونده هر نه که وار استوار قالمیاجاق
..
گیجه گونوز چالیش آللهه سویله عَرِّفنی
ئوزون تاپ، ئوزگه سینه اعتبار قالمیاجاق
..
گوز آچ توکّل ایله حیّ داوره تنها
خدادن آیری سنه غمگسار قالمیاجاق
..
جهاندا قوّت بازو و دولته اویما
گیدندی الدن هامی پایدار، قالمیاجاق
..
تکامل آختاریسان اخذ ایله مَکارِم خُلق
که بوندان آیری سنه اعتبار قالمیاجاق
..
چکوبدی چوخلاری باش تیره ی تراب اوسته
گیدندی هامّی صغار و کُبار قالمیاجاق
..
چالیش محبّت ایله والدینیوه هرآن
آتا، آنا گیده دیلده، قرار قالمیاجاق
..
تراوش ایلیر عطر بهار او گوللردن
خزان ویروب، دِی اولار، نوبهار قالمیاجاق
..
مثال کوهیدی وَقرون آتا کنارینده
آتا که گیتدی الوندن ، وقار قالمیاجاق
..
اوچوب پرآچسا آنا ترک آشیان ایتسه
یقین او لانه ده بیرده هَزار قالمیاجاق
..
نجیکی حضرت زهرا جهانی ترک ایتدی
مُبرهَن اولدی او بیت و دیار قالمیاجاق
..
قلیجلانوبدی علی ابتدا نماز اوسته
عیان اولوبدی دُرِ شاهوار قالمیاجاق
..
جراحتین اثری جام موت اولوب، عمری
قوتاردی باشه یتوب احتضار قالمیاجاق
..
کریم آل عبا سمّیدن اولوب سیراب
بقایه گیتمه لیدور آشکار قالمیاجاق
..
بویوردی زینبه آز ناله قیل که قارداشون
اولوبدی فاطمیه همجوار قالمیاجاق
..
اسوبدی صرصر ظلم آشیانه نی یخدی
صداقت اولماسا کیم پای کار قالمیاجاق
..
سالوبدی یثربون احوالی تنگه مولانی
حسینده اولمالیدی رهسپار قالمیاجاق
..
اِلَیَّه صوتی گلور کربلا دیاریندن
گیدور مدینه دن عالی تبار قالمیاجاق
..
ویروبدی شامیده علیا مخدّره پرچم
عیاندی ئولسه آنا اقتدار قالمیاجاق
..
باخون بقیع و نجف دشت کربلا، شامه
آنا که ئولدی گورون خانوار قالمیاجاق
..
مطوّل ایتمه سوزی یاز نتیجه گفتاره
نتیجه یاخچی یامان از قرار قالمیاجاق
..
قدم جهاندا گوتور خالصاً لوجه الله
خلوص سیز آییق اول کوله بار قالمیاجاق
..
حسینه گوزیاشیوی عارفانه قیل جاری
جزاده چشم ترون اشک بارقالمیاجاق
..
حسین فاطمیه ساری بیرقدم گیتسون
یقین ئولنده گوزون انتظار قالمیاجاق
..
عوض کرامت ایدر شاه کربلا «جائد»
حسین فاطمه چون قرضدار قالمیاجاق
..
..
..

#پندیات #جائد_زنجانی #ترکی #زبدةالاشعار #ختم_خوانی