شخصیت و شجاعت حضرت زینب کبری (س) در مجلس ابن زیاد
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
.
استعانت ایلرم من قادر قهّاردن
ذکر ایدم حالات دخت حیدر کرّاردن
.
شیر یزدانین قزی معناده اما شیرزن
شیر اموب صدر شهامتدن اولان سرشاردن
.
سود نه سود ، سینه نه سینه ، یعنی زهرا سینه سی
حیف أو سینه یاره اولموش ضربت مسماردن
.
سوز سوزی گتدی یاخوندور سوز مسیروندن چخا
ای قلم یازما گچاق بو غمفزا گفتاردن
.
شرح وصف زینب کبرادی منظور نظر
سوز آچاق شخصیت بانوی با مقداردن
.
ئوز آدی زینب ولی مشهور زین أب اولان
گیت سراغ ائت سال اله مدرک گوزل اخباردن
.
ئوز آدی زینبدی قلبینده صفای مصطفا
ارث آلوب صدق و صفانی احمد مختاردن
.
ئوز آدی زینب یوزونده وار حیای فاطمی
أخذ ایدوب درس حیانی مادر اخیاردن
.
ئوز آدی زینب ولی صبر حسن داراسیدور
صبرده سبقت تاپوب ایّوب تک صبّاردن
.
ئوز آدی زینب ولی مهر و وفا دریاسیدور
بهره مند اولموش وفا بو قُلزمِ زخّاردن
.
بو او زینبدور چوخ ایستردی حسین قارداشینی
آیریلانمازدی بیر آن اول سرور ابراردن
.
قارداشیله تز تز ایلردی او دید و بازدید
درد دل ایلوب آلاردی درد دل دلداردن
.
بیر حسینی گورماقی بیر یانه دنیا بیر یانا
الده میزان عیار مهری بو معیاردن
.
گلمیوب دنیایه گلمز بیله بیر قارداش باجی
نه دیوم من بو ایکی مهر و وفالی یاردن
.
سوز غلط دوشمز دیسم قارداش باجی بیر روحیدی
بیر بیریندن هچ أولار دویمازدیلار دیداردن
.
چکدی حتی بو علاقه کربلا صحراسینه
چوخ مصیبت گوردی صحرای مصیبت باردن
.
سوی شاماته گیدنده نیزه ده قارداش باشی
آلماقا ئوز انتقامین قاتل خونخواردن
.
کربلاده باشینه یغدی گل ئوزلی قزلاری
دوشدی آردنجا ، گوتورموب گوز او گل رخساردن
.
خلقه آندیردی بو رمزیله که یار با وفا
هرگز آیریلماز یامان گونده وفالی یاردن
.
دست بسته زار و خسته ناقۀ عریان ده
گوردی چوخ طعن و شماتت فرقۀ اشرار دن
.
مجلس ابن زیاده چکدیلر بی اختیار
سیر ایدوب مجلس نجه مجلس دولی اغیاردن
.
ئوز وقارین حفظ ایدوب هرگز ئوزون سندیرمادی
زهر چشم آلدى او استاندار استکباردن
.
زاده مرجانه ناراحت دؤنوب آلدى خبر
کیمدی ہو عورت منی آگاه ایدون اسراردن
.
بیر اسیر عورت بو اندازه تكبّر بو وقار
فرق گورمور منله هرگز نقش بر دیواردن
.
بیر نفر آندیردی زینبدور خانم زهرا قزی
اخذ ایدوب درس شهامت حیدر کراردن
.
دوندروب یوز زینب کبرایه کبر و غیظیله
دیل یاراسی ووردی بیر رفتار ناهنجاردن
.
نه دیلیله باشلیوب سوز ، نه دیدی من یازمارام
شرم قیلّام نامناسب هر سوزه تكراردن
.
شیر یزدانین قزی بیردن قزیشدی شیر تک
باشلادی اود یاغدیران گفتار آتشباردن
.
دخت زهرا خُطبۀ زهرانی تجدید ایلدی
در نثار ائتدی بو نوعی لعل گوهرباردن
.
حمد لله حق پیمبرله بیزی ایلوب عزیز
محترم بیز اهل بیتوخ جملۀ اشراردن
.
شأنیمیزده آیۀ تطهیر نازلدور بیزیم
بیزده یوخدور رِجس اعراض ایلروخ فُجّاردن
.
فطرتاً بیزده نجابت وار حیا وار شرم وار
لیک آیریلماز خباثت سن کیمی بی عاردن
.
یا ابن مرجانه منم دخت على المرتضی
هل أتى حقینده گلموش جانب داداردن
.
کس سسون، فاسق ئوزون سن هم امیروندور سنون
ساکت اول ای بدخلف مرجانۀ بدکاردن
.
بیله فکر ائتمه اسیرم بیکسم قارداشسیزام
اولموشام خسته جفای قوم بدرفتاردن
.
قارداشیم الدن گیدوب اما ، ارادم سینمیوب
قارداشیم تک چکمرم ال ، معنوی پیکاردن
.
گلمیشم قارداشیمون حق اولماقین اثبات ایدم
آل سفیان کفرینه اقرار آلام افکاردن
.
دین یولوندا قارداشیم باشدان گچوب جاندان گچوب
منده الهام آلموشام اول سرور بیداردن
.
قارداشیم باشی گلوب بو بزمه منده گلموشم
تا حمایت ایلیم اول قافله سالاردن
.
گلموشم بو مجلس میشومه قوللاردا طناب
خلقی آگاه ایلیم کیفیت احراردن
.
سن کیمی بیر کور باطن عنصری رسوا ایدم
سلب گفتار ایلیم سن کوردل غدّاردن
.
گلمیشم ائتماقلیقا من حقى باطلدن جدا
راه هموار آیریلا تا راه ناهمواردن
.
وار نچه نازلی یتیمه قز ، نچه اوغلى ئولن
نچه قارداشسیز سپاهیم عترت اطهاردن
.
ال اله وئروخ گیدوب شاماتی تسخیر ایلیوب
قدرتی یلب ایلروخ هر جانی و جبّاردن
.
گلموشم غفلتله یاتموش ملتی بیدار ایدوب
خلقی هشیار ایلیم هشیار ایدن هشداردن
.
مست صهبای ریاست اولما بیله ، هوشه گل
سانما بت هند اوغلونی قورخ قادر قهاردن
.
معدلت دیوانی وار روز جزا پاداشی وار
قیل مجسّم محشری یاد ائت أو گیر و داردن
.
قارداشیم دین اوسته ئولموش زندۂ جاوید دور
توکموسن ثاراللهی بی خوف صاحب ثاردن
.
الله ئولدورسون سنی قالسون سنون آغلار آنان
یابن مرجانه اولان ای بی حیا جمّار دن (1)
.
ایلدی رسوا زیاد اوغلون بیان زینبی
اودلادی قلب شرورین آتشین گفتاردن
.
غیظیله دوردی یریندن قصد ایدوب زهرا قزین
با قساوت قلبی دولموش کینۀ آخیاردن
.
زینب كبرانی ایستردی او ظالم ئولدوره
ذرّه جه باک ائتمه دی زینب او بدکرداردن
.
دوردی قصد أئتدی اودا مرجانه اوغلون روبرو
وئردی آگاهی او گمراهه غلط پنداردن
.
یوز دوتو ب ابن زیاد شومه عمرو بن حریث
سویلدی بیر صحنه گوردوم قانلو بو درباردن
.
بولمورم وار بو باشیله زینبون نه الفتی
گوز گوتورمز اصلا أول خاتون دل افگاردن
.
سن اونی قصد ایلینده آچدی قانلو گوزلرین
باخدى قانیاش توکدی دولموش دیدۀ خونباردن
.
بیر خانم دی اوغلی قارداشی ئولوب قلبی یانوب
ال گوتور بو أوغلی قارداشى ئولن دل زاردن
.
قتل زینبدن اولوب ظاهرده گرچه منصرف
باطناً ال چکمه دی اول بی حیا آزاردن
.
صادر ائتدی قتل فخر الساجدین فرمانینی
ضجّه و شیون اوجالدی عترت أطهاردن
.
آج سوسوز یورقون اوشاقلار شوریله آغلاشدیلار
دولدی مجلس سربسر فریاد آه و زاردن
.
عالم معناده بو أحواله یر گوی آغلادی
وا اماما ناله سی گلدی در و دیواردن
.
دؤزمدی زهرا قزی زینب دوروب بی اختیار
ائتدی اعلان حمایت عابد بیماردن
.
زینبیله اتحاد ائتدی عزالی اهل بیت
دوردولار بیردن أیاقه بین قوم خواردن
.
همصدا سسلندیلر با هم که ای شوم و دنی
بسدى ال چک بیر مریض خسته و تبداردن
.
وئردیلر ابن زیاده اتحادیله شکست
قالدى ناچار ایلدی صرف نظر اصراردن
.
ئوزگه بیر ظلم ایلدی توضیحینه شرم ایلورم
ایلیون صرف نظر سیزده بو استنشاردن
.
اولدی داخل مجلسه بیر نأر چوخ چوخ هولناک
وحشته دوشدی هامی بو وحشت بسیاردن
.
مجلسی ترک ایلدی حتی قاچوب ابن زیاد
تا خلاص ائتسون ئوزون نار هلاکت باردن
.
ناگهان سلطان مظلومان باشی گلدی دیله
بو صدا گویا اوجالدی لعل گوهرباردن
.
یابن مرجانه ایدورسن نار دنیادن فرار
قورتولانمازسان قیامتده یقین ائت ناردن
.
سود امر اصغر آناسی یعنی مظلومه ریاب
گوردی خالی اولدی مجلس سربسر أغیاردن
.
فرصتی فوت ائتمدی گوتدی حسینون باشینی
باسدی جان تک باغرینا ئوپدی رخ گلناردن
.
عرض ایدوب هر قدر أولا عمروم غمونده آغلارام
سالمارام بیر دم آدون ای عزّتیم تذكاردن
.
جان وئروبسن گون ائوینده سو یانندا تشنه کام
سو وئرن اولموب سنه هشتاد مین کفّاردن
.
گون قباقینده اوتورّام دلده آه آتشین
حالوه یانّام گید نجه سن بو فانی داردن
.
ایچمرم بیرده سرین سو کولگه ده اگلشمرم
یاد قیلّام سن کیمی عطشان ئولن بی یاردن
.
مین بهار اولسا گوله مین لرله گل گولمز یوزوم
دوشسه احیاناً گذاریم صحنۀ گلزاردن
.
هاردا گورسم شاخۀ گلده سنوب غُنچه سولوب
آد آپارّام اصغریمدن سن گل بی خاردن
.
من یتشمیشدیم سنون سایونده اوج عزّته
دوشموشم سندن صورا چوخ ارزش و مقداردن
.
من هارا بو گون هارا بیله أسیر اولماق هارا
دویموشام سند نصورا دنیای کج رفتاردن
.
(1)جمار = مرد نابکار
.
#زینبیه_مدح #مجلس_ابن_زیاد
#استعانت_ایلرم_من_قادر_قهاردن
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید