استمداد حضرت ابوالفضل علیه السلام
.
✍️ زبدة الاشعار ✍️
🆔: @nohe_torki
.
#سبک_زینبم_جان_اوستیم … 4 سبک
.
مرحوم هادی تبریزی
.
.
بو جبینمدن دگن اوخ پیک وحدتدور منه
باشیم اوسته سیّدی گلسن عنایتدور منه
.
.
سرسپاه شهریار عشق ، پاداش آختارور
قان دولان گوزلر سنی هر لحظه قارداش آختارور
ظلمیله اون یدّی ظالم بیر سینان باش آختارور
چوخ يوبانما بو يوبانماق چوخ اذیّتدور منه
.
.
بو قفس چوخ اولدی مرغ روحيمه ننگین و تنگ
منده یوخ قدرت اولوب دشمنلريم تشویق جنگ
اوستومه گویدن یاغور باران ذوبین و خدنگ
دشمنه زائیدهٔ عشرتدی ، حسرتدور منه
.
.
تا علمدارین سسین آلدی امیر نه قباب
شرق مخيمدن طلوع ایتدی بسان آفتاب
سرعتیله گلدی قارداش باشی اوسته باشتاب
سسلدی ای سرو قامت ، دور قیامتدور منه
.
.
روز روشن گوزلریمده تار اولوبدی چون شبه
دور ایاقه یاتما آل الله دوشوب تاب و تبه
کوفیه گیتماق مسلّم اولدی ایمدی زینبه
چون بو صحراده شریک درد و محنتدور منه
.
.
قانیله مستور اولوبدور هاله تک زیبا یوزون
نطقه گل قويما قالا قلبونده واردی گر سوزون
اوای منه آماج پیکاندور یارالی صاق گوزون
روحيمون ایذاسينه بو غم کفایتدور منه
.
.
کربلا سقّاسی گوز آچدی گوروب قارداشینی
صورتين پاک ایلیوب آلموش دیز اوسته باشینی
توکدی حسرتله یوزه قانه دونن گوز یاشینی
عرض ایدوب شاها عجيبه بیر سعادتدور منه
.
.
خوشه ممکن اولمادی تا نخل خدمتدن دریم
پیشوازه گلمدیم ، بیجان اولوبدی پیکریم
پیشواز ایتدی ولی یولدا کسلميش اللّريم
وای اولا سرلشکر شاهم جسارتدور منه
.
.
بیله بولمه خدمتیمده من بو گون ایتدیم قصور
سو یولون گوردوم دوتوبدور ظلميله قوم شرور
شور عشقیله فراته ایله دیم فوراً عبور
مرتضی ارثیّه سی قارداش شجاعتدور منه
.
.
من عرق ریزان و مجروح و سوسوز لعل لبیم
گون ترحّم ایتمیوبدی یاغدوروب نار جهيم
اسدی بیر نهر فرات اوسته سرین دلکش نسیم
دیزلریم سست اولدی گوردوم ضعف شدّتدور منه
.
.
لشكر اشراريدن خالی گورنده دوره می
سو نسیمی قلبدن پاک ایلهدی زنگ غمی
نصب قیلدیم من فرات اوستونده قانلی پرچمی
شدّت سوز عطش گوردوم زیادتدور منه
.
.
بی اراده اللریم ایتدی اراده سوی سو
سو گوتوردوم گوردوم امّا یوخ سودا بیر آبرو
من ایچم سو ، قالسون عطشان کودکان ماهرو؟
حدس ویردیم عالم امکاندا رخوتدور منه
.
.
بیر سویا حسرتله باخدیم بیرده نهر علقمه
بیرده نهر اوسته اسن دلکش سسیله پرچمه
بیر قولاق ویردیم ایدیردی اهل کوفه همهمه
مشکی دولدورماق اودور بولدوم غنيمتدور منه
.
.
مشکی دولدوردوم اودور که عزم قیلدیم مخیمی
چیگنیمه سالدیم سو مشکی ، گوتدوم الده پرچمی
ایستیردی مشکه اوخ دگسین دوتاردیم سینه می
چونکه مشکیم روح طاقت ، تاب و قدرتدور منه
.
.
لشكر اهلی گولدولر قلبیمده حسّ رشکیمه
قلبيمون قانین قاتوبلار ظلم اليله اشگیمه
ویرمیوبلار سینمه اوخ ، ويردولار سو مشگیمه
خجلتیمدن چاره می بولدوم شهادتدور منه
.
.
مشکیمه اوخ دگدی اعدايه حمایت ایله دی
سرسپاهی پیشگاهوندا خجالت ایله دی
سجده گاهیمدن بیر اوخ ناگه اصابت ایله دی
پیک وحدتدن اودور گوردوم اشارتدور منه
.
.
تخم حيرت قلب لشکرده حسینیم اکمیشم
سینه ده اوخ باشیمی فوراً اشاقه اگمیشم
دوشدی عمّامم يره امّا خدنگی چکمیشم
هامی ساعتدن چتین قارداش او ساعتدور منه
.
.
گلستان عشق و امیدیم او ساعتدن سولوب
قان جبينمدن آخوبدی کاسهء چشمیم دولوب
قوی دیوم واضح باشیمدا ظلم اليله خرد اولوب
قلبه تأثیر ایلین امّا شماتتدور منه
.
.
بو جفائیله حسین ، دوشدوم ستمله غرق خون
واردی یادونده ولی مخیمده اولدوق قول بویون
نه اليم وار نه قولوم ، سال بوینوما بیرده قولون
چوخ یاخین هر لحظه جام پیک رحلتدور منه
.
.
قولّارين آچدی او دمده نور عين بوتراب
ماوراء جوّده گورسندی حال انقلاب
قول بویون اولد بلا دشتينده ماه و آفتاب
آی دیوب ای گون چوخ آرتوخ بو محبّتدور منه
.
.
دوردی شه حسرتله ایتدی ناگهان عزمئ خیم
گوردی قارداشی گلور ، زینب ، اولوبدور غرق غم
سینه سینده واردی اوخلی مشگیله قانلی علم
عرض ایدوب قارداش بو حالون چوخ صعوبتدور منه
.
.
ای حسین ابن علی ای هادی دین خدا
«هادیه» بذل ایله بو ایل بیر برات کربلا
مطلع شعری فرات اوسته اونون تکرار اولا
بو جبینیمدن دگن اوخ پیک وحدتدور منه
.
.
#عباسیه_شهادت
#بو_جبینمدن_دگن_اوخ_پیک_وحدتدور_منه
#ترکی
.
✍️ #زبدةالاشعار ✍️
🆔: @nohe_torki
نظر دهید