استمداد حضرت قاسم (ع)
.
.
حاج احمد احمدی (جوان)
.
.
اماندی داده گل عمو یخلمشام هرایه گل
سالوبلا مرغ روحیمی قفسده اضطرابه گل
.
.
یارالی آهو تک منی سالوبدی دامه کوفیان
حصاره سالدى قویمادی گلم خیامه کوفیان
بو نامرادی صید ایدوب یتوبله کامه کوفیان
یتیش هرایه قاسمون دوشوبدی پیچ و تابه گل
.
.
عمو سنه فدا اولوم سنون یولوندادی گوزوم
بو سون نفسده من نجه عمو فراقوه دوزوم
مرامیمه چاتانمادیم اورکده قالدی چوخ سوزوم
گورم جمالوی دوشوب بو قلبیم التهابه گل
.
.
بو قوم بی حیا منه ویروبدی نیزه و خدنگ
سالوبلا دامه تنگ اولوب بو شیره عرصه گاه جنگ
کمانی گلمین اوخا وروبدی پیکریمه سنگ
منی دچار ایدوب عدو ملال بی حسابه گل
.
.
عمو امیدیمون منیم نهالی تدی حاصله
وجودیم اولدی بند بند ولکن ایتمرم گله
منای عشقده بو گون گلوبدی مقصدیم اله
ئولم بو چولده ایتمرم عدویه عجز و لابه گل
.
.
نقدر یاره اوستنه ورولسا یاره لر منه
یارالی باشی اگورم عمو بو چولده دشمنه
بو دمده باشیم اوسته گل اولوم فدا عمو سنه
سالوبلا کوفیان منی قوم اوسته چوخ عذابه گل
.
.
منای حقده دلخوشام فدای اکبر اولموشام
جداله تشنه گلموشم خمار کوثر اولموشام
یارالی قوملار اوسته من اسیر لشگر اولموشام
یارالی باشیم اوسته باخ بویوک بو انقلابه گل
.
.
سنون کیکی مسیح دم ویره بو دمده دم منه
نه یاره لر اذیتی نه غصه و نه غم منه
اگرچه ممکن اولمادی خیامه تا گلم منه
ولی کمک لیق ایتماقا یارالی بیر شبابه گل
.
.
اگرچه قاسمون عمو یاراسی بی مثالیدی
جمال انورین گورم بو سون نفس صفالیدی
باشیم قانیلا ایسلانوب یوزوم الیم حنالیدی
یانار دلون گوزون دوشه اگر بیله خضابه گل
.
.
بو حالیله چتین قالام گلم دوباره خیمیه
بودور سوزوم فقط منیم آنامی تاپشور عممه
اوغولسوز اولسا هر آنا جهاندا توش اولار غمه
قوشولدی لیلیه آنام ننیس اولار ربایه گل
.
.
بو شام و کوفه لشکری ایدوبله چوخ ستم منه
ئولوبدی اکبرون بو گون یتوبدی رنج و غم سنه
غم ایتمه صاحب علم دوتار هله علم سنه
کمک لیقا بویور عمو اولان بو دلکبابه گل
.
.
باشیم یارالیدور عمو بابام على مثالیَم
آتاسیزام بو عرصه ده غریبه ماجرالیَم
دوشن خسوفه ظلمیلن سپهر غم ملالیَم
هلالین احتیاجی وار همیشه آفتابه گل
.
.
یتیم لر پناهی گل ئولور حسن نشانه سی
ازلدن اولدی مرغ دل غم و محن نشانه سی
بو گلستاندا قالمادی گل و چمن نشانه سی
دونوبدی گلشن وفا اولوبدی چون خرابه گل
.
.
غنی دی گر فقیرده اولا کمال معرفت
گدا ایدر غنی لری تاپار خلال معرفت
بیر عده بی کمالیلی ایدر خیال معرفت
تاپا اگر «جوان» اونی دیر بو شیخ و شابه گل
.
.
.
#قاسمیه #احمدی_جوان #قاسمیه_شهادت #ترکی #زبدةالاشعار
نظر دهید