بیلورم سن گیدوسن مجلس جانانه بابا #وداع_ناطق_اردبیلی

وداع امام حسین (ع)
.
.
مرحوم میرزا محمد علی ناطق اردبیلی
.
.
بیلورم سن گیدوسن مجلس جانانه بابا
منه سن سیز اولو دنیا ائوی غمخانه بابا
.
.
اتگوندن نه امیدیله چکوم إل گیده سن
قانلی میدانه گئدن چوخدی ولی یوخدی گلن
دوش آتوندان یئره بیرده دولانوم باشیوه من
سن چراغ نبوی من سنه پروانه بابا
.
.
بیر تمنّا ائدورم سندن ایا شاه امم
سورمه آت سرعتیلن باخ دالیا ساخلا قدم
الى قوینوندا باخور گئتمگیوه اهل حرم
من دالونجا باخورام گور نه یانا یانه بابا
.
.
آند وئرّم سنی زهرا آنامون حرمتینه
منی آگاه ائله بو آیریلیقون مدتینه
اوتوروم صبر ائلیوم باشیمیزون محنتینه
شمع تک منده یانوم آتش هجرانه بابا
.
.
گورورم جسمده یوخ طاقتون ای شاه جهان
سارالوب رنگ رخون سوز عطشدن بابا جان
سن سوسوز منده سوسوز هر ایکیمیز تشنه زبان
گل قویوم لبلریمی اول لب عطشانه بابا
.
.
قییدوب خیمه لره گئتمگه گر یوخدی مجال
گل اوتور تپراقون اوسته منی آغوشیوه آل
الیوی زلفیمه چک قوللاریوی بوینوما سال
رحم ائله گوز یاشیما دیده ی گریانه بابا
.
.
بیلورم بلبل شیدا داخی گورمز چمنی
اولاجاق کنج خرابه بلى بلبل وطنی
قسم اللهه اگر آلماسون آغوشه منی
دونه جک قلبیم ائوی کاسۀ القانه بابا
.
.
بو بیابان اولو سندن صورا محنت اوطاقی
بش دقیقه من محنت زده نون اول قوناقی
بس کیمه تاپشوروسان بیر بولوک عورت اوشاقی
کیم پرستار اولاجاق فرقه ی نسوانه بابا
.
.
یار و انصارون ئولوب قلبیوه داغلار چکیلوب
نئجه نیسان یاغیشی اوستیوه غملر توکولوب
اریدوب جانیوی قارداش غمی قدّون بوکولوب
قامتی خم گئدوسن عرصه ی میدانه بابا
.
.
ممکنی اولدوقیجا نوحه یازار محنتیلن
مقصدی بیرده زیارتدی گله عزّتیلن
چکه آغوشه سنون قبریوی خوش نیّتیلن
لطفیوی شامل أئله «ناطق» نالانه بابا
.
.
#وداع #ناطق_اردبیلی #حسینیه_وداع #حسینیه_ناطق_اردبیلی #ترکی #زبدةالاشعار