تصادفات زمانه سالوب منی بنده #مناجات_فاطمیه_عاصی_تبریزی

#مناجات به درگاه حضرت احدیّت
259 بیت – شامل #مناجات_گریز #فاطمیه_فاطمیه_مدح #فاطمیه_شهادت #خطاب_حضرت_علی_به_حضرت_رسول_الله_در_فراق_حضرت_زهرا #شام_غریبان_حضرت_زهرا #حالات_حضرت_ابوالفضل #عباسیه_عباسیه_وداع #دیدار_آخر_امام_با_برادرش عباسیه_شهادت #استمداد_حضرت_ابوالفضل #گفتگوی_امام_با_برادر #عرض_حال_علمدار_کربلا_به_امام #رجعت_امام_از_بالین_برادر_به_خیمه_گاه #عرض_حاجت_به_باب_الحوائج #تصادفات_زمانه_سالوب_منی_بنده #ترکی
.

✍️ #زبدةالاشعار✍️
.
🆔: @nohe_torki
.
مرحوم عاصی تبریزی
.
تصادفات زمانه سالوب منی بنده
ائدوبدی محضر پاک خداده شرمنده
.
گئجه گونوز منی فکر و خیال بیهوده
عبادت ائتمگه قویمور او پاک معبوده
.
نه واردی قدرت طاعت نه بیرجه خیر عملیم
ائدوم نچاره هامی خیردن قالوب بوش الیم
.
نه واجبی عمله عاملم نه مستحبه
گوزوم یاشی یوزه جاری اولور همین سببه
.
اگر اجل منی درک ائیله بو حالتده
خدایه بولمورم عذریم ندور قیامتده
.
دولاب گناهله یکسر بو نامۀ عملیم
خدا حضورینه محشرده من نه نوعی گلیم
.
ائدوبدی معصیتین چوخلوقی یوزیمی سیاه
آغر سفر بول اوزاق پا پیاده بار گناه
.
اودور که عالم حیرتده قالموشام ناچار
همیشه وردیم اولوب یا عزیز و یا غفار
.
کیمه پناه آپاروم دردیمه نه چاره ائدوم
کیمون قاپوسنا یوز دوندروب هرایه گئدوم
.
منی بو حالیله هئچ کس خدا قبول ائتمز
یقین قووار قاپوسندان هرایمه یتمز
.
گنه سنون قاپووا قویموشام امیدیله یوز
او عالی درگھی قیلام طلب گئجه گوندوز
.
مقصّرم منه یول وئر قاپوندا دالدالانوم
بیر عمر سایۀ لطفونده منده تا دولانوم
.
نولور گذشت ایده سن فضل و جود و رحمتوه
هامی گناهیمی گئچ لطفیوه کرامتوه
.
بو قدر جرم و گناهه که ائتمشم اقدام
هاموسونون سببی رحمتوندی یا علّام
.
#گریز حالات حضرت زهرا (س)
#فاطمیه_شهادت
.
اینانمیشام که سن احسان و فضل صاحبی سن
قاپووا گلسه اگر دشمنون گذشت ایده سن
.
موحّدم اوزوم ، اسلام دینی دینمدور
سنون حلال و حرامون منیم یقینیمدور
.
پیمبرین بولوسن قائلم نبوتینه
اینانمیشام تَهِ دلدن علی ولایتینه
.
او صُلبدن گَلن اون بیر امامه اوّلدن
امامتینه مُقرّم هاموسنون دلدن
.
خصوص عزیزۀ ختمی مآب زهرایه
علاقه مندم اورکدن بتول عذرایه
.
اودور شفیعه #قیامت گونی گنه کاره
پیغمبر امّتنون دردینه او دور چاره
.
سنه حبیبه دی، خاتونِ روز محشر دور
یگانه گوهر گنجینه پیمبر دور
.
او فاطمه که همیشه رسول عالمیا
دوروب ایاقینه ساخلاردی حر متین هرآن
.
مدام خوش دیلیله دیندیرردی زهرانی
باساردی باغرینا جان تک بتول عذرانی
.
دگولدی بی سبب آخر پیمبر رحمت
ائدردی حضرت زهرایه بیر ائله حرمت
.
اوزیکه ما خلق الله دن او اشرفیدی
خدای حق طرفندن اونا موظّفیدی
.
هامی مهاجر و انصار ائشیتمیشیدی تمام
دیردی فاطمة بضعتی رسول انام
.
جلال حضرت زهراده بسدی بو مقدار
بو قدر وار که رضاسینده حق رضایتی وار
.
روادی بیر بئله خاتونه اشقیای دنی
اوقدر قمچی وورا نیلگون اولا بدنی
.
عدو عم اوغلوسنون بوینونا طناب سالا
گوزی باخاباخا حقّین عدو الیندن آلا
.
نه ائتدی شرم و حیا قوم دون پیمبردن
ونه اوتاندیلا زهرای زار و مضطردن
.
اوقدر ظلم و ستم ائتدی قوم بیگانه
حیات عاریه دن گلدی عاقبت جانه
.
ز بسکه او ستونه باران درد و غم توکولوب
جفائیله آغاروب ساچلاری بئلی بوکولوب
.
گُل بهاری خزان اولدی گون بگون سولدی
اور گی قانه دونوب مرگینه رضا اولدی
.
یانقلی بیر دلیله عرض ائدردی یا الله
تفضّلیله منیم ائله عمریمی کوتاه
.
وجود پاکنی سالموشدی غم توانادن
گئجه گونوز ئولوم ایستردی حیّ یکتادن
.
دیردی ای ائیلین خلق کون امکانی
سالوب عدو گوروسن چوخ فشاره زهرانی
.
قاپوم یاناندا من ال اوزمیشم نجاتمدن
گلوبدی تنگه گویؤل دویموشام حیاتمدن
.
ز بسکه یوز وئرور هر دم منه غم اوستن غم
اولوبدی بار المدن بو سرو قدیم خم
.
آتا فرائی اورک دردی اهل کین ستمی
صباح و شامده قان آغلادور بو چشم نمی
.
اوقدر اینجمیشم من بو قوم اعدادن
یتوب دوداقیمه جان دویموشام بو دنیادن
.
بو بس دگولدی که اود وردولار قاپوم باندی
دوتوب شراره وجودیم سراسر اودلاندی
.
سینوب قابورقالاریم محسنیم شهید اولدی
ستمله برگ خزان تک گل عارضیم سولدی
.
مؤثر اولدی او درگاهه التجای بتول
حبیب حبیبه سینون التجاسین ائتدی قبول
.
ائدوبدی فاطمه نی اوز حضورینه دعوت
مریض اولوب مرضی ائتدی گون بگون شدت
.
خزان اولوب گل رخساری گل کیمی سولدى
زمان موتی یتوب سخت بستری اولدی
.
بوفکردیدی که باشه یتن زمان اجلی
اولیدی باشنون اوستونده شیر لم یزلی
.
وئرنده جان اوخییدی او، سورۀ یاسین
بودا دئیدی اونا بیربه بیر وصایاسین
.
مرامینه یتوروب جان وئرنده محبوبی
گوز آچدی گوردی باش اوسته دوروبدی مطلوبی
.
فغانله دیدی ای شاه انس و جان ئولورم
یتوب دوداقیمه جانیم عم اوغلی جان ئولورم
.
عم اوغلی یا علی حسرتله سندن آیریلورام
گوزوم ضیاسی حسین و حسندن آیریلورام
.
برقدر آغلاما دوندرمه گوز یاشون سیله
گوزون فداسی منه حقیوی حلال ائیله
.
بو باره دن منی قویماگیلن قالوم نگران
یتوب اگرچه سنه رنج و زحمتیم هرآن
.
محبت ائیله گیلن زینبیله کلثومه
آنالیق ائیله همیشه او ایکی مغمومه
.
حسینله حسنیم قویما چوخ فغان ائتسون
مزار ایچره من زاری باغریقان ائتسون
.
گوزومون اولما رضا بارشی دونه ابره
گئجیله قیل منه غسل و کفن یتور قبره
.
خصوص قویما جنازم منیم قالا یرده
گئجیله دفن ائیله گیزلت مزاریمی بیرده
.
تانوسا قبریمی هرگاه بی حیا امّت
محالدور قویالار قبریده یانام راحت
.
نه قدر ممکن اولا ای ولیّ رب جلیل
مزاریم اوسته قئیتماقدان ائیلمه تعجیل
.
سنه عیاندی که قورخار مزاریدن زهرا
بیر آز توقف ائله قبریم اوسته ائیله دعا
.
بو نچّه کلمه ده أول سروره یتوردی سوزین
دونوب او شاهه خداحافظ ائتدی یومدی گوزین
.
ملائکان سماوات دوتدولار یاسین
اوخوردی سوره مصداق هل اتى، یاسین
.
گل بهار جمالی خزانله سولدی
شهادتینی دیوب فاطمه تمام اولدی
.
دوروب ایاقه یریندن علی فگار و ملول
اولوبدی فاطمه نون غسل و کفنینه مشغول
.
حنوط ائتدی او گل جسمی چولقادی کفنه
یوزین دوتوب دیدی اول شه حسینله حسنه
.
لگورون آنازی دویونجا بالالاریم زینهار
گورنمه سوز داخی قالدى قیامته دیدار
.
همینکه آلدیلا دیدارینون اجازه سینی
قوجاقلیوب هره بیر سمتدن جنازه سینی
.
دیردیلر آنا گر ساقلقون کیمی بیزی سن
کناره آلماسان حشره تک ائیلَروخ شیون
.
دیر او وقتده گوردوم علی قسم بخدا
آچلدی بند کفن آچدی قولارین زهرا
.
سیزیلدیوب حرکت وئردی هر ایکی قولونا
بیرینی صاقنه آلدی او دم بیرین صولونا
.
باسوب بالالارینی جان کیمی بیر آغوشه
فراق عالمینه هر اوچی دوتوب توشه
.
اوقدر آغلادیلار ائتدیلر ائله ناله
گویون ملک لری ضجّه ائدوب او احواله
.
ندا یتیشدی ولیّ خدایه یکتادن
آیرگیلن حسنینی بتول عذرادن
.
کمال رأفتیله پادشاه کون و مکان
تسلّی وئردی آیردی بالالاری آنادان
.
گوتوردیلر او مطهّر جنازه نی بردن
گتوردی حقّنه تاپشوردی پادشاه زمن
.
اودم که قویدی پینمبر عزیزه سین قبره
هجوم ائدوب غم و غصّه او معدن صبره
.
واریدی اشگ تری چشم اشگبارینده
فسرده حالتیله قبرینون کنارینده
.
#خطاب_حضرت_علی_به_حضرت_رسول_الله_در_فراق_حضرت_زهرا
.
دیزین قوجاقلیوب اگلشدی چکدی دلدن آه
دونوب پیمبره عرض ائتدی یارسول الله
.
مصیبتیم سنه معلومدور بو حالیمدن
نه عرض ائدوم اوزون آگاهسن ملالیمدن
.
منافقین نه قویوب احترام امانتوه
نه بیر نفر عمل ائتدی سنون وصیّتوه
.
عدو منه سندن صورا نه ظلم ائتدی
توکندی تاب و توان صبریم آخره یتدی
.
بو سهلدور که منه هتک احترام ائیلدی
ال آچدی فاطمیه ظلمنی تمام ائیلدی
.
وفاسیز امته باخ ائتمدی حیا سندن
ووروبلا درگهوه اود اوتانمادی مندن
.
اهانتیله منیم قولاریمی باغلادیلار
شرار ظلموله قلب بتولی داغلادیلار
.
چکوبله مسجده آخرده بیعت اوستونده
جفا و ظلمه دایاندیم شریعت اوستونده
.
گر ایسته سن بوله سن چکدیقیم بلایادن
ازلدن آخره ائیله سؤال زهرادن
.
سزادی گوزلریمون یاشی گر دونه قانه
بو غملریم هامی بیر یان بو غصّه بیر یانه
.
خدا گورور نئجه گیزلنجه دفن اولور زهرا
بو نسگله یری واردور ائدم ئولونجه نوا
.
شرار غمله یانور بسکه قلب مجروحیم
بدندن آیریلا آهیمله راضیم روحیم
.
رسول اکرمی دردیندن ائیلدی حالی
بوشالدى جام دلی غصه دن اولوب خالی
.
بولوردی سرور دین ظلم قوم اعدانی
او علتیله نهان ائتدی قبر زهرانی
.
# بازگشت_مولی_از_سر_قبر_حضرت_زهرا
.
خلاصه ائیلدی زهرا جنازه سین مدفون
قئیندیلر ائوه پژمرده حال و دل محزون
.
گورنده سرور دین فاطمه یرین خالی
گلوبدی محنتی جوشه پوزولدی احوالی
.
یغوب ولیّ خدا اهل بیتنی باشنا
ازل او شه اؤزی وئردی اجازه گوز یاشنا
.
مؤثریدی ز بسکه بومحنتین اثری
اوشاق بویوک یوزه جاری اولوردی اشگ تری
.
#شام_غریبان_حضرت_زهرا
.
یاناردی دلدن هامی نی کیمی سیزیلداردی
گلوب نوایه هره بیر دلیله اوخشاردی
.
بیری دیردی اولان قامتی کمان آنا وای
بیری دیردی خدنگ غمه نشان آنا وای
.
بیری دیردی سالوم هانسی گونلرون یاده
فغان ائدوم آنا یا فاطمه گلوم داده
.
بو غصه بسدی که اوچ گونلریله قالدون آج
ئولونجه اولدون آنا تازه معجره محتاج
.
خصوص زینب کبری او غم کش دوران
آنا دیوب یانوب ائیلردی متصل افغان
.
گهی باخاردی یرین بوش گورردی آغلاردی
شرار آهیله قلب جهانی داغلاردی
.
دیردی ای یوزی دنیاده گولمین آناجان
نئجه دوزوم غم هجرونده من سنه قربان
.
دیمه زمانه ده سن سیز که بیرده من گولّم
چنین یوزوم گوره خوش گون وئرنجه جان بولّم
.
بو غملو واقعه نی #عاصی اختصار ایله
اوزیوه خدمت زهرانی سن شعار ایله
.
همیشه اشگ بصر توک عزای زهراده
سنه شفاعت زهرا یتشسون عقباده
.
یتنجه پیک اجل بیر تدارک انت اوزیوه
قیتگیلن گنه اوز باشدا یازدیقون سوزیوه
.
#مناجات_به_درگاه_حضرت_احدیت
.
سالام گرک گنه اعمال قُبحومی یاده
گئجه گونوز گلم آه و فغان و فریاده
.
اوقدر حضرت معبوده التجا ائیلیم
که بلکه دردیمه چاره تاپوب دوا ائیلیم
.
توکم گوزوم یاشینی ابر تک رخ زرده
که تا علاج ائیلیه بو علاج سیز درده
.
الهی من بولوسن غرق بحر عصیانم
ولی او ائتدیقیم اعمالدن پشیمانم
.
ترحّم ائیله گیلن بو دل کبابمه باخ
علیل جسمیمه باخ دلده التهابمه باخ
.
منی بو حالده قووسان اگر قاپوندان سن
بویور گوروم هارا یوز دوندروم گئدوم بس من
.
جهالتیله خط مستقیمی کج گئتدیم
اوزومی محضر پاکونده روسیاه ائتدیم
.
تمام چاره یولی باغلانوب منیم یوزومه
سنی امید بوگون بولموشم ولی اوزومه
.
#گریز به حالات حضرت ابوالفضل (ع)
.
اگرچه معصیتیم قویموب آبرو منده
دخیل دوشموشم اما بیر آبرومنده
.
که تا سالام اوزومی کلب تک نمک زاره
اولام دخیل همین وقعه ده علمداره
.
حسینه وئرسه قسم هرکس اول هنرمنده
حسینه آند اولا قویماز او شخصی شرمنده
.
حسینه عُلقۀ مخصوصی وار او سردارون
محبتینده یازیلّار رشید علمدارون
.
که بیرگون آلِ علی جمله سی اناث و ذکور
تماما ائتمشدی ایوده درک فیض و حضور
.
#وداع_حضرت_ابوالفضل

اوشاق بویوک هامی شیر خدا حضورینده
اوگون واریدی شه لافتی حضورینده
.
او گونلریدی ابوالفضل او پور شاه امم
که تازه قویموشدی عرصۀ وجوده قدم
.
آناسی فاطمه ام البنین قوجاقینده
اوگون واریدی همان غنچه گل بوداقنده
.
باخاردی بیربه بیر اولادینه علیّ ولی
اندوب مشاهده بو حالی شیر لم یزلی
.
گوروبدی اوغلی ابوالفضلی پادشاه نجف
آچوبدی قولارینی میل ائدور حسینه طرف
.
هامی ایو اهلینی مشغول ائیلیوب اوزینه
تیکوب ایکی گوزینی قارداشی حسین یوزینه
.
بلکدن آز قالوری اوز اوزین یره سالسون
حسین بوینونا سالسون قولونی کام آلسون
.
طفولیتدن ائدردی بو مقصدی تعقیب
اولیدی قول بویون اولماق او باوفایه نصیب
.
بئله خیال ائیلمه دلده نسگلی قالدى
دیوم نه وقت حسین بوینونا قولون سالدی
.
#عباسیه_وداع
.
او ساعتیکه حسینون هامی هواداری
بویاندی لاله صفت قانه یار و انصاری
.
گورنده قارداشی یالقوز قالوب او اشجع ناس
گلوب حضور شه دینه حضرت عباس
.
ازل او سرور لب تشنیه سلام ایلدی
ادب پولیله برابرده بیر قیام ایلدی
.
دیدی بو مرغ دله تنگ اولوب نفس قارداش
بئله حیاته یوخومدور داخی هوس قارداش
.
دولوبدی خانۀ دل محنتیله مالامال
منی ائدوبدی بو یالقوزلقون پریشان حال

ائدوبدی اهل جفا عرصه گاهی تنگ سنه
فدا اولوم سنه آخر وئر اذن جنگ منه
.
اجازه وئرسن اگر لرزه دشمنه سالام
ئولنلرین قاننی یرده قویمارام آلّام
.
روادی اکبروى ئولدوره بو اهل جفا
چکه خیامده لیلا صدای وا ولدا
.
روادی دوندره لر قاسمون طویون یاسه
مگر چنین دگی بو نکته قارداش عباسه
.
روادی قاسموون طوى حناسی قان اولسون
آناسی باخسون او احواله ساچلارین یولسون
.
روادی اصغرون آخر سوسوزدان اودلانسون
آنا بالاسینه باخسون کباب اولوب یانسون
.
روادی سوز عطشدن یانا بالا بالالار
روادی من صاق اولام عترتون سوسوز قالالار
.
مرخص ائیله منی ای شهنشه عالم
گوروم نه نوعیله باغلار فراتی اهل ستم
.
بو حالده اوجالوب ناله آل طاهادن
هامی ائدردی تمنّای آب سقادن
.
بالا اوشاقلار الینده سو جامی ناله کنان
گلوب حضور ابوالفضله العطش گویان
.
.
گورنده یوزلری گل تک اوشاقلارین سارالوب
هاموسنون عطش الدن قرار و صبرین آلوب
.
گلوب حمیّتی جوشه گورنده بو حالی
قیزاردی رنگ شریفی پوزولدی احوالی
.
امام گوردی که قارداشدان اختیار گئدوب
بو ماجرا اونی بی صبر و تاب و طاقت ائدوب
.
یانور بو حالته باخدوقجا قلب مجروحی
او قدر قالمووری جسمندن آیریلا روحی
.
مآال کار اونا گون تک تمام روشندی
قضیه سرور لب تشنیه مبرهندی
.
امام گوردی داخی یوخدی اوزگه بیر چاره
گرگ اجازۀ میدان وئره علمداره
.
بویوردی سید عالم او نسل خیر سلیل
باشارسان ائیله سوسوز اهل بیته سو تحصیل
.
همینکه سالدی او شهدن اله بو فرمانی
گوتوردی مشک و لواسین او عشق قربانی
.
#دیدار_آخر_امام_با_برادرش
.
سوار اولوب آتا یوز قویدی رزمگاه طرف
دوزنمه دی دولانوب باخدی خیمه گاهه طرف
.
گوروب گلور دالینجا امام عرش اساس
انوبدی فوراً آتندان یره او اشجع ناس
.
ادبله عرض ائیلدی ای امام کون و مکان
ندور جهت بو گلیشده اولوم سنه قربان
.
دئدی نچاره ائدوم ای مه بنی هاشم
منه چتیندی فراقون وفالی قارداشیم
.
محبتونله دولوب بسکه استخوان و رگیم
بو آیریلیق منه مشگلدی دوزموری اوره گیم
.
بولوردی بیرده ابوالفضلین عقدۀ دِلی وار
طفولتیندن اورکده بیر عمده نسگلی وار
.
برابرینه چاقوردی اوشه علمدارین
اورک محبتی جوش ائتدی آچدی قولارین
.
گورنده بیر بئله لطفی عزیز بطحادن
کسیلدی صبر و توانا او تشنه سقادن
.
آچلدی بال و پری آچدی صاقنی صولونی
حمایل ائتدی حسین بوینونا ایکی قولونی
.
نه کربلا هامی آفاق شوریله دولدی
امیر لشگریله شاه قول بویون اولدی
.
بو حاله اهل حرم خیمدن ائدوردی نظر
گوروبله قول بویون اولدی شهیله سرلشگر
.
نه یاخچی وقتیدی یا رب نه یاخچی ساعتیدی
او صاحب علمون اللری سلامتدی
.
#عباسیه_شهادت
.
نه اولدی بیر نچه ساعت صورا بس احوالی
ایکی ایاقی اولاندا اوزنگیدن خالی
.
او پاره پیکریله جسم زخمداریله
اننده انمدی آتدان اوز اختیاریله
.
آت اوستن ایستدی دوشسون او ساعتیکه یره
بدنده کی یوخودى اللرى قباقه وئره
.
علاوه وورموشدی بسکه اهل کینه خدنگ
یوخیدی صاف یرى اولموشدی سطح سینه سی تنگ
.
او اوج وحدتین عنقاسی شهپر آچموشدی
نگار محضرینه اوچماقا پر آچموشدی
.
اوقدر یاره یتیشمیشدی قوم عدواندان
آلوب تواننی سالموشدی یاره لر جاندان
.
بدن تمام دم تیغیله بیچلمیشدی
بئله یازیلّا اوجا قامتی کچیلمیشدی
.
او کسلریکه گوروب مرقد علمداری
سوروش بو نکته نی اشگون ائله یوزه جاری
.
دیولّه خوردادی باب الحوائجون قبری
آلشدی جان دلیم گئتدی گویلمون صبری
.
گوؤئل چوخ ایستوری یتسون جوار رحمتنه
ندیم یتشمور الیم قبرینون زیارتنه
.
یولون اوزاقلوقی وادار ائدوب منی صبره
بو آرزوئیله چوخ قورخورام گندم قبره
.
نصیب ائیله خدا بیزده کربلایه گئداخ
او قبرِ پاکنی تا ئولمه میش زیارت ایداخ
.
#استمداد_حضرت_ابوالفضل
.
مجسم ایله او حالی گوزونده گل داده
اورک گوزیله نظر قیل او قدی شمشاده
.
دوزوب نه زحمته الله بولور او دل خسته
یره دوشنده آتندان دوشوب یوزی اوسته
.
دوشنده آتدان او لب تشنه کربلا یرینه
یریدی تازه دن اوخلار یارالی پیکرینه
.
یوزین خیامه طرف دوتدی توکدی گوزدن باش
دیدی آماندی یتیش دادیمه حسین قارداش
.
چکوبله قتلیمه شام اهلی سربسر خنجر
باشیمی کسمگه جلّادیلر کشاکش ائدر
.
واریمدی باکیم، ئولم، گورمیم او گُل یوزیوی
کسینجه باشیمی قارداش یتور منه اوزیری
.
جمال پاکیوی گورماقه واردی چوخ هوسیم
باشیم دیزونده سعادتدی قورتولا نفسیم
.
آلوبدی نعشیمی لشگر آرایه قارداش گل
سسیمی آل داخی دورما هرایه قارداش گل
.
بو چولده یوخدی بولورسن بیر اوزگه دادرسیم
واریمدی سنده گوزوم هر قدر که وار نفسیم
.
چوخ اولدی سعیم حضورون که درک ائدم بیرده
هزار حیف هدر گئتدی سعییم آخرده
.
خیامده شه دین قارداشین سسین آلدى
دوتوب ایکی دیزینی لرزه قوّه دن سالدى
.
# آمدن_امام_بالین_برادرش
.
سارالدی رنگ شریفی توکندی صبر و قرار
نه نوعى بولمم او شه اولدی ذوالجناحه سوار
.
قویوبدی رزمگه یوز تمام سرعتله
گئده گئده یوزه اشگین توکردی شدتله
.
دایاندی مرکبی اثنای راهده دوردی
او دورماقین سببین بولدی شاهده دوردی
.
امام بولدى عبث کسمیوب قضا بولونی
یره باخاندا گوروب قارداشین ایکی قولونی
.
#گفتگوی_امام_با_برادر
.
پیاده اولدی آتندان او سید عالم
ازل او اللری بیر ائتدی سینیه منضمّ
.
بولوردی قارداشنون اول مصیبتیدور
بو ایکی قول او مصیبتلرون علامتیدور
.
باسوبدی سینه سنه یوز قویوبدی میدانه
گهی گیدردی یولی گه گلوردی افغانه
.
یتشدی قارداشنون باشی اوسته سرور دین
باخوب نه گوردی آلوبلار آرایه لشگر کین
.
داغتدی دور بریندن سپاه اعدانی
قاچاردیلار قباقندان او لشگر جانی
.
باخوب او نعشه چکوب دلدن آهی آه اوسته
گوتوردی باشینی آلدی دیز اوسته آهسته
.
بویوردی گوزلرون آچ گلمیشم اویان قارداش
ایدن غمینده منیم قدیمی کمان قارداش
.
شل اولسون هانسی ستمگر سنی بو حاله سالوب
ایاقه دور نئجه گور اللریم بلیمده قالوب
.
گلنده رزمگه آیریلان زمان مندن
بولوردوم حالیوی کسدیم امیدیمی سندن
.
اودور که قویمازدیم بو بلالی میدانه
گئدنلریم کیمی بولدوم بویالّا آلقانه
.
آزالدی چاره امیدیم کسیلدی هر یاندان
سنون کیمی منه لازیمدی ال اوزَم جاندان
.
داخی زمانه ده سنسیز حیاتی من نِدَرم
گلوبدی تنگه گوئل آرزوی مرگ ائدرم
.
او قان دولان گوزون آچ دلده آه و زاریمه باخ
نفس شمارده دور حال احتضاریمه باخ
.
نفسلریم قوتولوب جانستانه سان وئرورم
سنون کیمی باشون اوستونده منده جان وئرورم
.
بو هامی شدّتیله منتهای محنتیله
بونیله بئله اورکدن خوشام مصیبتله
.
عیالیمون غمی اما ائدر دله تاثیر
سویالّا سن سیز ایده لّر حرملریمی اسیر
.
عدو سن ئولماقله کسب استراحت ائدر
پیمبر عترتنه بیرده کیم حمایت ائدر
.
بو کوی عشقده خط وفانی طی ائتدون
او قدر سعی ائیلدون تا مرادیوه یتدون
.
سموم ظلم و جفائیله گلشنیم سولدی
نقدر وار نفسیم شغلیم آه و زار اولدی
.
ئولونجه ذکریم اولور وای یارالی قارداش وای
سینان عمودیله باشی وفالی قارداش وای
.
دولوب خیامده یکسر سرشگله گوزلر
اوشاق بویوک هاموسی متنظردی یول گوزلر
.
علی الخصوص سکینه یانار فغان ائیلر
عمر دیر بوزه اشگ ترین روان ائیلر
.
یغوبدی خوردا اوشاقلاری باشینه یکسر
سوسوزدان اود دوتوب اطفال العطش سسلر
.
#عرض_حال_علمدار_کربلا_به_امام
.
ائشتدی قارداشنون سون نفسده تا سسینی
چخاتدی یاددان اوزون دلدن آتدی غصّه سینی
.
او قانلو گوزلرین آهسته آچدی ائتدی نگاه
گوروب باشین دیزی اوسته آلوبدی شاهنشاه
.
بو لطف و مرحمتی گوردی تا که قارداشدان
گلوب محبتی جوشه داشوب آشوب باشدان
.
فغانیله دیدی قارداش خجالتم سندن
واریمدی بیر نچه عرضیم قبول ائله مندن
.
بیری بودور که اگر خدمتیمده اولسا قصور
بو وضع حالیمه باخ دوتگیلن منی معذور
.
اگر گلنده ایدیدیم سنی من استقبال
ولی نه فایده قالدی اورکده بو آمال
.
دورانمورام ایاقا تاب و طاقتیم یوخدور
منی بغشله گیلن جسمده یارام چوخدور
.
دگول بو حالیم اگرچه طریق رسم و ادب
ولی اؤزون بولوسن وار بو حاله اوزگه سبب
.
عمودِ نوفلیله خورد خورد اولوب باشیم
آلوب توانیمی قانه دونوبدی گوز باشیم
.
حضور پاکوه عرضی بودور بو خون جگرون
منی خیامه آپارماقه واردی گر نظرون
.
بو التماسیمی لطف ائیلیوب قبول ایده سن
منی بو حالیله قارداش قویوب اوزون گئده سن
.
خیامه گتماقا قالموبدی بیرده رو منده
سکینه دن منی لشگر ائدوبدی شرمنده
.
سو وعده ائیلمیشم اهل بیت مضطریوه
خیامه گتسم اگر نه دیوم حرملریوه
.
آپار سو مشگیمی قوی من قالوم بو حالیله
گئدوم نه نوعی خیامه بو انفعالیله
.
بیر عمده سرّیده وار گتمه ماقمون قارداش
هنوز حالیمی بولمور بو، زمرۀ اوباش
.
صلابتیم ائله دوتموش سپاه اعدانی
هنوز تیترور او صولتله دشمنون جانی
.
اگر خیامه آپارسان منی بو حالتیله
هجوم ائدر سنه دشمنلریم جسارتیله
.
اولار علاوه سنه حملی نعشیمون زحمت
نچون دگول بدنیم بیرده قابل حرکت
.
ز بسکه یاره ووروب یاره اوستن اهل جفا
که وورسان ال داغیلور بند بندیدن اعضا
.
گوؤئل رضا دگولی زحمت و مشقّتووه
یتور سلامیمی سن اهلبیت عصمتووه
.
#رجعت_امام_از_بالین_برادر_به_خیمه_گاه
.
دیه دیه سوزین عباس قورتولوب نفسی
امام گوردی که قارداشنون کسیلدی سسی
.
قویوب یره باشین آهسته چوخ فغانیله
ولی اوز اللرین الوان ائدوبدی قانیله
.
گوتوردی بیر علمین بیرده قارداشین مشگین
توکردی سو کیمی رخساره متصل اشگین
.
الى بئلینده حسین عازم اولدی خیمه لره
گوزوندن اشگ تری دمبدم آخاردی یره
.
گھی گئدردی یولی گه دوروب گئدنمزدی
همین بو عقده نی قلبینده حل ایدنمزدی
.
بولوردی گوزلوری یول اهلبیت خونجگری
اگر سوروشسالا وئرسون نئجه ئولوم خبری
.
بو غصه گرچه دگولدی امامه بی تأثیر
ولیک وئرمدی ظاهرده حالینه تغییر
.
مباد واضح اولا اهل بیتینه مطلب
او سرورین ئولومون بولمسون هله زینب
.
یتیشدی خیمۀ عباسه پادشاه زمن
دیزین قوجاقلیوب اگلشدی باشلادی شیون
.
گورنده بیربئله حالی عیال پیمبر
بولوبله ئولدوروب عباسی فرقۀ کافر
.
تمام بیربیرینه دگدی عترت زهرا
اولوبدی محشر کبری خیامده برپا
.
توکردی گوز یاشی رخساره عترت اطهار
یولاردی ساچلارینی متصل خانم بالالار
.
اوجالدی داد و فغان نُه رواقه هر دلدن
چکردی آه جگرسوز هر یانان دلدن
.
وراردی باشینه اوخشاردی هر یئتن آنا تک
ائدردی ناله خواتین محترم تک تک
.
بیری ووراردی یوزینه دیردی وای عمو وای
بیری فغانیله سسلردی قارداشیم ای وای
.
واریدی بسکه بو محنتده چوخ اهمّیت
تمام غصه نی یاددان چخاندی بو محنت
.
هامی صغیر و کبیر و کنیز و شهزاده
اسیر اولماقا اولدی تمام آماده
.
گوروب تدارک شام اهلبیت حق اوزونه
اسیریلق توزی قوندی سکینه نون یوزونه
.
فغانیله دیدی واضیعتا خانم زینب
امام اوزی دیدی باجی صحیح دور مطلب
.
#عرض_حاجت_به_باب_الحوائج
.
الهی من سنی وئرم قسم علمداره
ترحّم ائیله گیلن عاصی گنه کاره
.
سنه شفیع گتورّم بوصاحب علمی
ازل گناهیمه چک لطفوله عطا قلمی
.
ایکمجی قویما منی منجنیق غم سخسون
گئجه گونوز منیم افلاکه شیونیم چخسون
.
اوچومجی گرچه حضورنده چوخ گنه کارم
حسینووه گنه بونلا بئله عزادارم
.
سنه روادی منی حق سوز اوسته اینجیده لر
علاوه اینجیماقیم حقیمی ده غصب ایده لر
.
سنی قسم وئرورم من او #زبدۀ ناسه
او دوغرانان بدن چاک چاک عباسه
.
اولار که باعث اولوبلار بو داد و شیونیمه
گئجه گونوز آخور حسرتله اشگ دامنیمه
.
من عاجزم بولوسن یوخدی منده قدرت و حال
اوزون اولاردان الهی سن انتقامیمی آل
.
.
✍️ #زبدةالاشعار ✍️
.
🆔: @nohe_torki