اربعین
زبانحال حضرت زینب (س)
..
..
..
..
محمد اصغروند (اخگر مراغه ای)
..
..
..
..
حسینیم یاره وه گوزده سرشگیمدن دوا گتدیم
مزارون اوسته بیر کوینک سالام شال عزا گتدیم
..
..
..
..
دوشردون یادیمه هر گون گلردیم آه و افغانه
دییردیم دوغرانان اعضاء گوررسن دفن اولوب یا نه
ائدردیم آرزو بیرده گلم قانلو بیابانه
دوباره بو چوله گلدیم خداونده ثنا گتدیم
..
..
..
..
او گون که بو چوخور یرده چکوب قان جسموه پرده
سیزی یرده قویوب گئتدیم خیالیم قالدی بو یرده
ائدردیم آرزو هردم بو دشتی من گورم بیرده
باشیمدا قزلارون قارداش به شوق کربلا گتدیم
..
..
..
..
بو تلّ اوسته دایانموشدیم باخوردیم قلب میدانه
ائدردون حمله هر سمته آتام تک مرد و مردانه
شرار ذوالفقاروندن بویاندی شرّلر قانه
سنون حقونده گؤزیاشلی نوا ائتدیم دعا گتدیم
..
..
..
..
گوزوم باخدوقجا هر سمته گئچن گونلر دوشور یاده
بو تلّ اوسته قاچاردیم من چاتام تا بلکه فریاده
الیم باشدا آدون دیلده یتوشدوم اوندا امداده
الیمده بیر قرا معجر دلیمده وا اخا گتدیم
..
..
..
..
یادیمدان چیخمیوب چخماز آیلدون خیمه گاهوندان
دونوب گاهی منه باخدون آلاردیم سوز نگاهوندان
گوزومده سُرمه ایلردیم حسینیم گرد راهوندان
او گوندن گؤزده گؤز یاشین مثال توتیا گتدیم
..
..
..
..
قوجالدیم بو نئچه گونده شماتتلر جفاسیندان
سایوم سیر سلوکیمده ریاضاتین هاراسیندان
اورکده دل یاراسیندان و یا که باش یاراسیندان
بو یدّى وادی عشقى سنه من اقتدا گتدیم
..
..
..
..
بوغولدوم کوفه شهرینده دونوب چرخ زمان گوردوم
چویردوم یوز سنه ساری ائدم دردیم بیان گوردوم
دگوب داش سجده گاهوندان آخوردی تازه قان گوردوم
باشیمدا چوب محملدن حسینی بیر یارا گتدیم
..
..
..
..
دئدیم یا اهل کوفه اسکتوا صبریم باشا چاتدی
صدا و هایهو بلوا اولوب خاموش سس یاتدی
جرسلر ناله دن دوشدی نفس لر سینه ده باتدی
ننم زهرا دئدی احسن آتامدان مرحبا گتدیم
..
..
..
..
بنی هاشم قالان کوچه نماد فخر دنیایه
قولوم باغلی دوه اوسته گؤزوم دوشدی او مأوایه
گلوب همسایه لر گوردوم چالولّار ال تماشایه
اورک یاندی دیله بیردن «آتا یا مرتضا» گتدیم
..
..
..
..
تماشا ایلین لردن چوخیدی آشنا گوردوم
منه فخر ایلین کسلر اولوب بی اعتنا گوردوم
وفادن دم ویرانلاری او یرده بی وفا گوردوم
ولی دور گور کناریمدا نقدری باوفا گتدیم
..
..
..
..
گولوم کوى وصالوندا سارالدی گون بگون سولدی
لبونده یاره نی گورجک بو قزلار زلفینی یولدى
ننم زهرا کیمی غمدن رقیّه غصّه مرگ اولدی
گوزومده تازه بیر اشکی قورام بزم عزا گتدیم
..
..
..
..
ائله گونلر چتین گئچدی بیزه بیگانه آغلاردی
رقیه آغلیان وقته اینان ویرانه آغلاردی
باجون زینب بو احواله اولوب دیوانه آغلاردی
سیزیلداردیم سینان نی تک گینه آیری نوا گتدیم
..
..
..
..
باشون ویرانیه گلدی بالام آلدی قوجاقینه
یارالی لبلرون چاتدی او مظلومه دوداقینه
یانوب پروانه تک دوشدی یانان شمعین ایاقینه
کفن اگنینده کی کوینک اولوب رخت قرا گتدیم
..
..
..
..
مسلمانلار نه ظلم ائتدی مسیحیلر بیزه یاندی
یزیدین مجلسیندیدیم سوز آچدی حقّووی داندی
قزیشدی اوتلانان سینه م دانیشدیم دشمن اوتلاندی
یزیدین پایتختینده سایوب حقّون جانا گتدیم
..
..
..
..
حواله ایله دوخ «اخگر» دیلیمجه تا قورا ماتم
مسمط نوعی شعریله بیان اولسون حدیث غم
یازا اوراق دفترده بو شعری ایلدوخ ملزم
رقیّه سوؤدی اشعارین چکیلسون سوز بورا گتدیم
..
..
..
..
#اربعین #اخگر_مراغه_ای #ترکی #زبدةالاشعار
نظر دهید