ورود کوفه
..
..
..
..
مرحوم معزی اردبیلی
..
..
..
دلا رشیده زینبون رشادتی نمونه دی
حسینون انقلابینه حمایتی نمونه دی
..
نچه لقبلن آدلانوب عزیزۀ ابوتراب
صدیقۀ زمان اولوب صداقتی نمونه دی
..
حلیمه دور علیمه دور سلیمه دور کریمه دور
عطوفتی نمونه دی سخاوتی نمونه دی
..
فقیهه دور فصیحه دور فهیمه دور وجیهه دور
فضیلتی نمونه دی نجابتی نمونه دی
..
سعیده دور وحیده دور حمیده دور رشیده دور
علیّه دور ذکیّه دور ذکاوتی نمونه دی
..
بش ایل بتولیدن آلوب جهاندا نطق درسینی
علی کیمی بیانینون فصاحتی نمونه دی
..
صراحتاً بلا گونی بلالره بلی دیدی
قیام سرخی ساخلادی لیاقتی نمونه دی
..
چکوبدی زیر شهپره کبوتران بی پری
بنات بو ترابیده حفاظتی نمونه دی
..
دوشنده شهر کوفیه دوباره زینبین یولی
گوروبدور آل مصطفی فراستی نمونه دی
..
شهید اولان آناسینا توسل ایتدی قلبیده
بیلوردی حاجتین دیسه اجابتی نمونه دی
..
دولی دی بامیلر اوگون زنان بی حیائیلن
جداده قانلی باشلارین سیاحتی نمونه دی
..
اتک لره توکوب داشی باخاردیلار هدفلره
کیم اولسا شرّین عاملی شرارتی نمونه دی
..
نظر سالاندا قینَدی بدنده قانی زینبون
بش ئیل همان بلادیده اقامتی نمونه دی
..
یوزون دوتوب جماعته دیدی عزیز فاطمه
اوزوندن هندون اوغلینون حماقتی نمونه دی
..
دانوب ز بس شریعتی حسینه خارجی دیور
یزید کیمدی کاملاً جنایتی نمونه دی
..
حسین ویروبدور آبرو کتاب آسمانیه
نصیحتی نمونه دی عدالتی نمونه دی
..
حسین فدای دین اولوب حسین پیمبر اوغلیدی
جلالتی نمونه دی رسالتی نمونه دی
..
خلیل خاتم خدا خبیر خطّ خیریدور
شفقّتی نمونه دی، شهادتی نمونه دی
..
جمیل ذوالجلالیدور جهان جوده جاهیدور
مودّتی نمونه دی امامتی نمونه دی
..
شهیر شهر عشقیدور شریف هر شهیدیدور
شرافته شرف ویروب شرافتی نمونه دی
..
جماعته ولیِدور، پیمبره وصییدور
سلالۀ نبیّدور ذعامتی نمونه دی
..
تمیزیدور سرشتیده امیریدور بهشتیده
فرشته لر ئوپوب الین ولادتی نمونه دی
..
حسین بو دینه قان ویروب حسین نمازه جان ویروب
شریعتی نمونه دی عبادتی نمونه دی
..
جدا باشیندا کوفه ده اوخوردی کهفین آیه سین
هزار حیف بیلمدوز تلاوتی نمونه دی
..
عجوزه ووردی نیزه ده مبارک آلنینا داشی
خبیثه فکری چاتمادی قرائتی نمونه دی
..
ویرون اوپوم حسینیمون کوله باتان دوداقلارین
جداده یاره لی باشون زیارتی نمونه دی
..
نه گوردی فاطمه قیزی هلالی قان ایچینده دور
گوزل جمالینون گنه ملاحتی نمونه دی
..
گوزی ساتاشدی آلنینا باشینی ووردی محمله
حسینله آری زینبون شراکتی نمونه دی
..
توکولدى قانى زلفینه رقیّه یومدی گوزلرین
منای حق فداسینون امانتی نمونه دی
..
دیدی حسینه زینبی یارالی باشووه فدا
بابام رسول باشینه شباهتی نمونه دی
..
گئجه کیمه قوناقیدون نه پست میزبانمیش
قویوب تنوره باشووی حکایتی نمونه دی
..
جدادن اَن دوداقلارون باتوب کوله سیلیم اوزوم
ئوپوم سوسوز دوداقووی طراوتی نمونه دی
گوزوم یاشیلا حاضرم یووام یارالی باشووی
وفالی زینبون سنه ارادتی نمونه دی
..
خوش حالیمه حسینچیم قیزیل قانا بویانمیشام
حسین چینون جهانیده هر حالتی نمونه دی
..
سریه لیلی تک باخور جداده قانلی باشلارا
اورکلرینده نار غم حرارتی نمونه دی
..
سولوبدی باغوون گولی رقیّه گوردوگون دگول
غریق بحر غصّه دور اسارتی نمونه دی
..
دوشنده شمره گوزلری اسر وجودی قورخودان
خدای بی نیازینه شکایتی نمونه دی
..
منیله رهسپاریدور یزید پایتختینه
دمشقیده رقیّه نون عمارتی نمونه دی
..
عقیلة العرب دوتوب یوزون دیار یثربه
دیدی بابا حسینوون سیادتی نمونه دی
..
فرشته لر ئوپن الین گجه کسیبدی ساربان
بیله بیله او اللرین کرامتی نمونه دی
..
سن ئوپدیگون دوداقلاری تنوریده باتوب کوله
مگر دیلّه خولینون ضیافتی نمونه دی
..
من ئوپدیگیم بوغازینه قویوبدی شمر خنجری
بیلنمدی حسینمون دیانتی نمونه دی
..
وورولدی سجده گاهینه دیار کربلاده داش
جبینیده همین داشون علامتی نمونه دی
..
او داش یاراسی اوستینه گینه وورولدی داش بابا
جدا یانیندا فاطمه نظارتی نمونه دی
..
گل ئوزلی اهل بیتووه کناریده چالولار ال
دیموللر آل عصمتون اصالتی نمونه دی
..
باجیسی ام کلثومی پوزوب غمی دیدی آنا
بقیع ده قالما زینبون قیامتی نمونه دی
..
باجیمدا قارداشیمدا گل گزور یارالی کوفه ده
بو باجینون بو قارداشون جراحتی نمونه دی
..
الووى قوى قابورقووا یامان گونینده داده گل
گتور دوا یاراسینا رضایتی نمونه دی
..
عزالیلار تاپار دوا ولیک دربدردیلر
باشیندا کاروانیده جماعتی نمونه دی
..
گل آی یوزی سولان ننه گل آی شهید اولان ننه
دیه لّه مادرین قیزا طبابتی نمونه دی
..
گل آی قرا گیین ننه حسینه جان دیین ننه
عزیزووین کجاوده ریاضتی نمونه دی
..
گل آی یاراسی قان ویرن نظاره ایله زینبه
باشیندا یاره اولسادا متانتی نمونه دی
..
گل آی صودی قانا دونن چراغ عمری تر سونن
رقیّه نون بیانینون حلاوتینمونه دی
..
«معزّی» جبرئیل گلوب حسینون آستانینه
بیلوب ز بس امامینون عنایتی نمونه دی
..
غلام روسیاهینی جزاده یادینه سالار
قیامتون گونی یقین شفاعتی نمونه دی
..
..
#کوفه #معزی_اردبیلی #ترکی #زبدةالاشعار
نظر دهید