شهادت حضرت زهرا سلام الله علیها
.
✍️ #زبدةالاشعار ✍️
.
🆔: @nohe_torki
.
حاج #صمد_قاسمپور
.
دیدی عم اوغلی علی بزم یاره گیتمه لیم
حضور اقدس پروردگاره گیتمه لیم
.
دیدیم بو سوزلریله کونی یاندیروب یاخما
دیدی اورک سوزی گلمز شماره گیتمه لیم
.
دیدیم ، سنیدون امیدیم ، چکوب بیر آه دیدی
بو دردی یادیمه سالما دوباره گیتمه لیم
.
نه دویموشام بالالاردان نه ده علی سندن
نه ایلیم کسیلیب راه چاره گیتمه لیم
.
مسافرم سفر اوستونده حالیمی پوزما
سرشگ چشموی توکمه عذاره گیتمه لیم
.
چتیندی آیریلا سندن بو روح مجروحیم
ولی چکور آپارور دلده یاره گیتمه لیم
.
دیدی گل اگلش عم اوغلی ایدیم وصیّتیمی
چکیلمه بیر نچه لحظه کناره گیتمه لیم
.
بتولی آخر عمرونده گل حلال ایله
فراق وقتیدی آیری دیاره گیتمه لیم
.
گیجه زمانی ویروب غسلومی کفن ایله
غریبه لر کیمی تاپشور مزاره گیتمه لیم
.
غمیمده قویما سولا نوشکفته غنچه لریم
خزان یلی توخونا لاله زاره گیتمه لیم
.
عم اوغلی غسلومی پیراهنیله ویر که گوزون
ساتشماسین بو تن زخمداره گیتمه لیم
.
نه بی نشان اولی من تک نه سن کیمی مظلوم
اولیدی افّ بیله روزگاره گیتمه لیم
.
اجل تری دوزولوب آنّینا آخوب گوزلر
سوزون دینمدی قیلدی اشاره گیتمه لیم
.
.
.
.
دیدی اورک سوزونی یاره یار یومدی گوزون
علی ده قویمادی صبر و قرار یومدی گوزون
.
او بزم رازده پروانه یاندی آغلادی شمع
یتشدی باشه غم انتظار یومدی گوزون
.
نه قدر سسلدی زهرا عم اوغلوام گوزون آچ
جواب گلمدی مظلوم وار یومدی گوزون
.
چاغوردی زینبی گل عمرومون چراغی سونور
وصیّت ایلدی بی اختیار یومدی گوزون
.
اجل پیاله سی غم باده سیله مالامال
دگوب مشامینه اولدی خمار یومدی گوزون
.
باخوب بالالارا حسرتله چکدی دلدن آه
عذاره اشگینی قیلدی نثار یومدی گوزون
.
گوروب سولوب سارالان گللرین پریشان حال
اولوب بو منظره دن اشگبار یومدی گوزون
.
حسین یانور حسن آغلور غریبه عالمدی
باخوب دوزنمدی اول داغدار یومدی گوزون
.
خزان لهیبی گلوب سولدی فاطمی گللر
پوزولدی رونق گلشن بهار یومدی گوزون
.
بسان شمع خموش اولدی لیک درد دلین
اولونجه ایلدی آشکار یومدی گوزون
.
نماز آغلادی سجاده و دعا یاندی
او دم که عاکفه ی روزگار یومدی گوزون
.
بیر عمر شمع کیمی یاندی تا خموش اولدی
فروغ جان و دل هریار یومدی گوزون
.
عفاف و عصمت و تقوا اولوب شهید گوروب
یگانه مظهر شان و وقار یومدی گوزون
.
.
.
.
بیوردی زینبه گل زینبیم آنان گیدوری
حضور یاره اورک باغریقان گیدوری
.
گلون سالون یولا بو خسته دل مسافروزی
گورون نه غصه لی گمنام و بی نشان گیدوری
.
آنا جنازه سینون آلدی دوره سین بالالار
ویروبله سس سسه یردن گویه فغان گیدوری
.
علی باخور یانورآغلور فغان ایدور زینب
عذاره اشکی اولوب سیل تک روان گیدوری
.
ملک فلک هامی عرشیله فرش قان آغلور
توکور سرشگینی جبریل نوحه خوان گیدوری
.
گلوب تموّجه دریای حوریان بهشت
جنانه یوز چووروب معنی جنان گیدوری
.
علی اولوبدی صبا ئیله هم نوا بو گیجه
او خسته پیکریله روحی بیگمان گیدوری
.
گیدور بو خسته مسافر همیشه لیق سفره
جهانی ترک ایلیوب جان بیر جهان گیدوری
.
چمن یانوب سارالوب یاسمن سولوب لاله
بهار عمری یتوب باشه باغبان گیدوری
.
سزادی گویده یازا اشک دیدۀ حورا
دگل بو فاطمه تابوت ایچینده جان گیدوری
.
غروب وقتی غروب ایلیوب غریبانه
بیرآی که آردیجا اولدوز بیرآسمان گیدوری
.
بوگون علینون ایوینده غریبه غوغادی
نه فاطمه که بیر عالمجه کاروان گیدوری
.
بوگول اگر چه سارالدی بهار عمرونده
ولی مدینه بویی باغ وگلستان گیدوری
.
اگر چه دردینی بولدورمیوب ولی دلده
بیر عالمین غمینی ایلیوب نهان گیدوری
.
گیجیله محمل زهرا بقیعه یولّاندی
بو غصه دن دل مولا یانوب الولاندی
.
غرض گوتوردوله یورقون یارالی زهرانی
گیجه بقیعیده دفن ایلسونله پنهانی
.
مدینه خلوت و خاموش و بی فروغ وسکوت
جهانی چولقالیوبدی حجاب ظلمانی
.
ستاره لر سپوری لمعه لمعه نقرۀ اشک
یولا سالوبدی حقیقتده ماه تابانی
.
سکوت محضیدی یکسر مدینه شهری ولی
گیدیرکه بسلیه آرامشینده طوفانی
.
توکور سرشگینی زهرا غمینده دیدۀ شب
صباده زمزمه ایلور حدیث هجرانی
.
گیجه زمانیدی گوزلر یاتوب نه عالمدی
بقیعه حمل ایلیّولر غریب دورانی
.
علی ، ولایتی حمل ایلوری نه فاطمه نی
علی ، تشیّعی تشییع ایدور نه زهرانی
.
نه بدرقه نجه عالم که گورمیوبدی جهان
بیله غریبی بو جمعیّت پریشانی
.
گلور بو زمزمه راحت یاتون مدینه لی لر
قوتاردی فاطمه باغلاندی بیت الاحزانی
.
.
.
.
سنیله فاطمه روح و روانی دفن ایدورم
خدا بولور که دل مرتضانی دفن ایدورم
.
یات ای ولایتیمون خسته دل شهیده سی یات
سنیله جوهر و عشق ولانی دفن ایدورم
.
بو سنسن اللریم اوستونده یاتمیسان زهرا
و یا علیدی امام زمانی دفن ایدورم
.
منه جهاندا بو غمدن بیوک ملال اولماز
گوزوم باخا باخا درّ گرانی دفن ایدورم
.
علی سزادی قویا داغ دل اورک باشینا
بیر عالمین بویی داغ نهانی دفن ایدورم
.
گلون گورون آنازی زینبیم حسین و حسن
گلون وداع ایلیون باغبانی دفن ایدورم
.
خدا بولور اورگیم دوزموری دیزیم گلمور
ستاره سهلیدی بیر آسمانی دفن ایدورم
.
صبا پیمبره مندن یتور سلام دینه
سنون امانتوی جاودانه دفن ایدورم
.
نه گل آچار نه چمن ، لاله نین چراغی سونر
بهاره ذوق ویرن گلستانی دفن ایدورم
.
جهاندا جان جهانیم جهان جانیم سن
سنیله بو گیجه جان و جهانی دفن ایدورم
.
نجه سولان یوزوی من قویوم تراب اوسته
اینانمورام سنی من جاودانی دفن ایدورم
.
امید و عشق بهشت و جنان روحوم سان
بهشتی روحومی عشق جنانی دفن ایدورم
.
تمام عالم امکانین آشناسینه باخ
غریبه لر کیمی یوخ بیر نشانی دفن ایدورم
.
گیجه یارالی سنی قبره تاپشورام هیهات
سنی مزاره قویوب مزتضانی دفن ایدورم
.
.
#فاطمیه_شهادت
#دیدی_عم_اوغلی_علی_بزم_یاره_گیتمه_لیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید