شهادت حضرت امیرالمؤمنین علیه السلام
.
.
.
حاج اصغر فرشچی (عدلی تبریزی)
.
.
.
یارب منه لطف ایله اولوم عیبدن عاری
عشقونله اورکده آچیلا یول سنه ساری
.
بیرعمرودی روزی ییورم شکرونه غافل
سال قلبه اولوم نعمتوون شکرگزاری
.
شهررمضان رحمت و غفران آیی یارب
سیل بو اورگیمده اولونان گرد و غباری
.
بو مَه که عبادتدی تلاوتدی دعادی
پر بار ایله بو بنده وه ده لیل و نهاری
.
سالما نظروندن منی ایت راکع و ساجد
تکبیره نمازه دلیمی آچ اولا جاری
.
عفو ایت منی سن بول بو آیون شاه شهیدی
گرچه گناهیم چوخدی منیم یوخدی شماری
.
بو آیدا اگرمست می عشقون اولام من
ویر باده مدام ویرمیه یوزحال خماری
.
مشکل ایلمه فتنه وی ای مُمتَحِن الله
آگهسن اوزون مُمتَحَنون یوخدی چخاری
.
ظلمت ایوینه یوخ عملیم ایله کرامت
موذی ایلمه اوردا منه عقرب و ماری
.
من عشق علیدن عطشم حقینه قائل
سالماز عطش عشقیمی بو دنیا سولاری
.
ایت بیرده عطا عشق علیده می نابی
دولدورسون اومی جسمیده هریرده داماری
.
حب علی هر درده دوادی صف محشر
قورتارسا منی نار جهیمدن او قوتاری
.
احمدبویوروب ذکری عبادتدورعلینون
نام علیدی دولدوراجاق دار و دیاری
.
آگاه اولون هرکس علی سویسه منی سویدی
راضی دوشه جاق من سوینوندن اوزی تاری
.
دنیانی او ترک ایتمیجاق ایشمسه کوثر
طوبا آغا جوندان ییجاق جانه گواری
.
جنّت اولایرضامنیم من بو علینون
حبّی اولا قلبینده کیمون دلده شعاری
.
آسان ایده جاقدی سکراتی اونا الله
قبری اونارضوان اویرین یوخدی فشاری
.
ایمندی او میزان و صراطه هم حسابه
بی نامۀ اعمال گیدر جنّته ساری
.
هرگوزباخا بیرسوزکی علیدن یازولوبدی
محشرگونی اتمزاوگوزون اشکینی جاری
.
فضلیندن اگر دُرج دهندن دانشا دل
گویا که ایدور مستمعه درّ نثاری
.
هرکیمسه علینی اوزونه بولمسه مولا
اعمالی قبول اولماز اگراولسا قطاری
.
شل اولسون اوال کی بویادی قانه علینی
محراب عبادتده گلوبدور بالالاری
.
یاندوردی حسن قلبینی گورجاق آتاحالی
دگموشدی علی باشینه چون ضربۀ کاری
.
قارداشی حسینیله حسن قولبویون اولدی
عباسنی سسلردی گله کان و قاری
.
قارداشلار اودم باهم اولوب سس سسه ویردی
آخدیردیلا گوز یاشلار اولوب ابر بهاری
.
اوز بیتینه حمل ایلدیلر یولدا دایاندی
ایستردی گیده نچه قدم یول اوزی باری
.
بیرده بویودی فکری گوررزینبی قورخار
حالی پوزولار قالماز اونون صبر و قراری
.
القصّه گلوب ایوده دوشوب حال مماته
ویردی ال اله یدّی اوغول ایلییه یاری
.
بیر حاذق و عالِم طبیبی حاضر ایدوبلر
باش یاره سنی گوردی تاپوب حالت زاری
.
سسلندی عدالت گونی ایستور باتا یاران
زهرین اثرینده یخیلار دینون حصاری
.
بستر ده آچوب گوز دیوری آغلاما زینب
باخما باباون باشدان آخور صورته ثاری
.
قربان اوآخان قانه او محرابه علی جان
راضی دگوسن زینب اولا غصه دچاری
.
عاشور محرمده نجه کرب وبلاده
باشسیزگوره جاق یرده دوشوب میر فخاری
.
گل اوندا اوزون زینبی آرام ایله مولا
قویما آخا گوزیاشی سنا قلب فکاری
.
گل اوندا اسیر اولدی گیدور کوفه و شامه
سالسا یولونی قتلگهه دوشسه گذاری
.
مولا بو گجه زینبوون حالینه خاطر
دعوت ایله اوز قبریوه بو خرد وکباری
.
محشرگونی بو«عدلیه» لطفیله نظر قیل
اوچ جلدکتابدی یازیلان دارو نداری
.
#مناجات
#رمضانیه
#حیدریه_شهادت #حیدریه_عدلی_تبریزی
#یارب_منه_لطف_ایله_اولوم_عیبدن_عاری
#عدلی_تبریزی
#ترکی
نظر دهید