رسالت چرخینین باش وئردی خورشید درخشانی #17ربیع_تائب_تبریزی

ذکر ولادت حضرت رسول اکرم (ص)
#گریز شهادت حضرت علی اصغر (ع)
.
#زبدةالاشعار
.
: @nohe_torki
.
مرحوم تائب تبریزی
.
رسالت چرخینین باش وئردی خورشید درخشانی
گوزل نوریله یکسر ایلدی دنیانی نورانی
.
آدی یرده محمد گویده احمد مصطفى مشهور
طفیلی ایلین از نفسینه بو کون و امکانی
.
او ایل که عزم ویرانیِّ بیت اصحاب فیل ایتدی
یاغوب احجار سجّیل ایلدی هر تک تکین فانی
.
همان ایل صبحدن بیر آز قاباق جمعه گونوندیدی
قدم قویدی جهانه ایلدی آفاقی نورانی
.
همان ساعتده ابلیس لعین طرد اولدی گویلردن
ووروب تیر شهابیله قوؤوبلار آل شیطانی
.
هامی بتخانه لرده دوشدی بتلر سرنگون اولدی
تاپوبار سرنگون توپراقلار اوسته لات و عُزّانی
.
یخلدی دوشدی هم دورت کنگره ایوان کسرادن
مداین ده شکسته گوردی گوزلر طاق کسرانی
.
هامی آتشکده هر یرده تک تک اولدولار خاموش
دوشوب وارونه هر بیر مملکتده تخت سلطانی
.
هامی شه لر اوگونده لال اولوب گفتاردن قالدى
داخی بیر شهده اولموب صحبت و گفتار امکانی
.
نه قالدی علم کاهِنده نه اولدی سحر ساحرده
ئولوب زایل او گونده یر یوزونده سحر عنوانی
.
او دم دریاچۀ ساوه باتوب بالمرّه خشک اولدی
ستایش ایلین لر قالدیلار مبهوت و حیرانی
.
او وادیِّ سَماوَه کیم نچه ایل گورمه میشدی سو
سو آخدی دوتدی سرتاسر همین خشکیده صحرانی
.
قریش اعراب ایچینده تاپدی تفضیل اولدى آل الله
نه چون ایتمیشدیلر مسکن اوگونده بیت اعلانی
.
روایت وار اوساعتده او مولود سعادتمند
قدوم پاکیله ایتدی مُزَیَّن سطح غبرانی
.
ائدوبدور صاق اَله تکیه صولون سمت گویه دوتدی
ائدوب دُرج دهان پاکی درّ و گوهر افشانی
.
دگوبدور بیربیره لعل لبی نطقه گلوب گویا
ائدوب اقرار توحید خدای حیّ و یکتانی
.
اولوب بیر نور ساطع شرق و غرب ایله ایشیقلاندی
آناسی بر ملا گوردی قصور شام ویرانی
.
ایشیتدی آمنه خاتون که بیر قائل ندا ایلر
بالاندور اشرف مخلوق وار چوخ عزّت و شانی
.
محمّد قوی آدین مولودیوین امر الهی دور
بودور سوق ایلین حقّه مجازی اهل دنیانی
.
او طفلی حضرت عبدالمطلّب آلدى آغوشه
باسوب اؤز باغرینا جان تک اولوب بو ذکر عنوانی
.
خدایه حمد بی پایان سپاس بی قیاس اولسون
که لطفیله عطا ایلوب منه بو طفل زیبانی
.
بیله خوش رنگ و بو – دلبند – کیم گهواره صدرینده
سَیادَت تاپموش اطفال جهانه واردی رُجحانی
.
گلردی رأفتی جوشه اؤپَردی گل تک ایگلردی
ائدردی ردّ آناسینه گنه اول غنچه رعنانی
.
#گریز به #اصغریه_شهادت
.
بو اؤپماق بو محبت بو علاقه بو آلوب وئرماق
سالور یاده بالاسیله رباب زار و گریانی
.
او دم که اوخلانوب اصغر امامین اللری اوسته
آلوب زینب ربابه ردّ قیلدی اوخلی قربانی
.
رباب آلدی او طفل شیرخواری جان تک آغوشه
باخوب دولدوردی اشک حسرتیله چشم گریانی
.
گوروب گل غنچه سی خندان اولوبدی غنچه چاقینده
گلوب بلبل کیمی شور اوستونه اولدی نوا خوانی
.
دیردی حلقینی پیکان بیچن عطشان بالام ایوای
ایچن ای سو کیمی اوخلی بوغازیندان آخان قانی
.
آنان ئولسون علی گئتدون سو امّیدیله میدانه
عجب سیراب اولوب گلدون کباب ایتدون بو نالانی
.
گوروردی حرمله جان اوسته سن جانیم سنه قربان
مروّتسیز بوغازوندان ووروب اوچ شعبه پیکانی
.
ایله بوس ایلیوب تشنه بوغازوندان سولی پیکانی
بوغازدا بوسه گه یوخدور آنان اؤپسون على جانی
.
گوزون آچ گوزلرون قربانیم بیر بیله ناز ایتمه
گوزوندن سالما بیله بو پریشان خانه ویرانی
.
سُودوم اولمادی اولدون یوخسا روگردان على مندن
گذشت ایله یوخودی منده آجلیقدان سود امکانی
.
منی نامهربان ساندون مگر سالدون بیله گوزدن
کَسوب أُلفَت على یاندیرما چوخ بودیده گریانی
.
اگر سن دویموسان مندن على من دویمارام سندن
دویار یوخسا بالاسیندان آنا ای جسمیمین جانی
.
ایاق دوتماقلیقین من آرزو ایلردیم عمرومده
بو حسرت ایله درد اولدی دلیمده یوخدی درمانی
.
او دم که شه الى اوستونده گئتدون قانلو میدانه
منیم اوردایدی فکریم تا نولور بو أمر پایانی
.
ایله ای ماه پاره جلوه ایتدون گون الى اوسته
پوزوب شام اهلینی اؤز حالیوه آغلاتدون اعدانی
.
گَلَندَه نالیه دشمن منى امّیدوار ایتدی
دیدیم سیراب ائده للر ایمدی عطشان غنچه عطشانی
.
ولیکن سعدین اوغلی سسلدی یا حرمله دورما
دایانما گون الى اوستونده اوخلا نجم رخشانی
.
ایشیتدیم تا او فرمانی قریلدی قلبیمین بندی
سنون اوخلانماقون بولدوم یوزه توکدوم جگر قانی
.
بو چولده هر آنا بزم نگاره گوندروب بیر گل
گُلوم یوخ منده تقدیم ایلدیم بیر غنچه خندانی
.
بوگون دینه وئروبدور چوخ آنالار چوخ اوغول قربان
اولوردوم خجلتیمدن هر گورنده جمع ثکلانی
.
ایوون آباد اوغول یاخشی منی غمدن خلاص ایتدون
سوسوز قانه بویاندون سرفراز ایتدون بو نالانی
.
اولار نورس جوان لار وئردیلر من صودامر قربان
آنالاردان آپاردیم امتیاز و فخر شایانی
.
اگرچه درد هجرانون ئولونجه سینه می داغلار
ولی بیر نکته وار آرام ائدر بو قلب سوزانی
.
منیم تک بیر آنا هاردا گچوب اؤز شیرخواریندن
وئروب سرباز دین ششماهه بیر طفل لب عطشانی
.
ال اوسته اوخلانوب جان وئرماقون ای صودامر سرباز
اولار عالمده سربازان دینه درس عنوانی
.
آلار سرباز جانبازان دین سرمشقینی سندن
دوتار دینی مقدّم ترک ائدر فکر سر و جانی
.
سوسوز قانه باتوب یورقون دوشوب بو یاتماقون آخر
آییلدار خواب غفلتدن تمام اهل دنیانی
.
سنون بو انقلاب اکبرون ای صودامر اصغر
ائدر رسوای عالم تا جهان وار آل سفیانی
.
عجیبه انقلاب ایتدون وئروب جان یاخشی نام آلدون
سنون وار خدمت شایانوین تحسین شایانی
.
آپارسون سیل کفر ایستور دی قرآنی بو صحراده
ئوزون غرق ایلدون قانه – قوتاردون لیک قرآنی
.
رضای خلقی «تائب» خدمتونه ایلمه منظور
فقط هر حالده سن دوت رضای حیّ یکتانی
.
سنه باخما ائدر بیر عدّه بی فرهنگ استهزا
اولار گورمزله حقی کور ائدوبدور جهل و نادانی
.
سنه احسان ائدوبدور طبع گویا ذات بی همتا
اونا شکرانه دولدور حق سوزیله بطن دیوانی
.
#پیامبراسلام
#17ربیع_تائب_تبریزی
#رسالت_چرخینین_باش_وئردی_خورشید_درخشانی
#او_دم_که_اوخلانوب_اصغر_امامین_اللری_اوسته
#ترکی
.
#زبدةالاشعار
.
: @nohe_torki