شدت غمدن دوباره نالیه دنیا گلور #اربعین_دلپاک

اربعین حسینی (ع)
..
..
..
..
رضا غلامپور (دلپاک)
..
..
..
..
شدّت غمدن دوباره نالیه دنیا گلور
شیونه بو ناله دن دنیاده مافیها گلور
..
باشدا شور مرثیه باشسیز امیرین یاسینه
عالم معناده باشی ذبح اولان یحیی گلور
..
بارگاه قدسیده ای وای دئیور روح القُدُس
ناله سیندن نالیه قدّوسیان یکجا گلور
..
بو نه محفلدور نه مجلسدور نه بزم خاصیدور
که خلوص خاصیله موسی گئدور عیسی گلور
..
ذبح اعظم نوحه سین تا نوح اوخور افغانیله
قلب اسماعیله ناگه محنت عُظما گلور
..
سو سسین دشت ملاله سالما شرم ائت ای فرات
گور نجه موجیله یاسه حضرت دریا گلور
..
جان وحدت روح الفت فیض مطلق نور حق
گوزده گوزیاشی دلینده بانگ واویلا گلور
..
سیّد سجّاد امام حق حقیقت کویونه
ائیلیب حق خطبه سیله باطلی رسوا گلور
..
باشدا شوق وصل دلده نغمهٔ آزاده گی
سولمین گلزاره بیرده بلبل شیدا گلور
..
بیر سکوت محض حاکمدور بلا صحراسینا
بو سکوت ایچره قولاقه بیر حزین نجوا گلور
..
واحبیبا سویلوری جابر عطیه آغلیری
گوزلریندن گوزیاشی، یوخ قان اوزه گویا گلور
..
بیر طرفدن غرق محنت مریمیله آسیه
بیر طرفدن غرق ماتم هاجر و سارا گلور
..
بیر طرفدن شاه مردان دلده وا عطشان اوغول
بیر طرفدن الده عمّامه شه بطحا گلور
..
بیر طرفدن زینب کبری دلینده یاحسین
بیر طرفدن کربلایه حضرت زهرا گلور
..
کربلا ای کربلا ای کربلا ای کربلا
اول مهیّا ماتمه چون زینب کبری گلور
..
اشکی تا گوزدن آخیر تا آهی دلدن قوزانیر
یئر چکیر صیحه فغانه گنبد مینا گلور
..
زنگ هر ناقه وئریر تا سس او سس سیز موکبه
یئل دیور تپراقه سیزقین نالیه صحرا گلور
..
قورتولوب قید اسارت بیر آغیر تدبیریله
جان طاها قبری اوسته عترت طاها گلور
..
کیم بولور کیمدور گلن کیملر بولور کیملر گلور
وار بو قدری اربعینه سرّ عاشورا گلور
..
ای مقرّبلر آچین بیر یول که اکبر قبرینه
بیر اوزون یول یورقونی اوغلی ئولن لیلا گلور
..
گه دیور اصغر آناسی اصغره لایلای گهی
سویلور اصغر دور آنان قلبینده مین غوغا گلور
..
آچمادین دل گرچه امّا گل دیله سویله منه
قانی خشک اولموش یاراوین ایمدیده قان یا گلور
..
شیونیله عرض ائدیر بیر قیز که عمه قورخورام
ایمدیده وورسون بیزی فکر ائیلورم اعدا گلور
..
دل آچیب بیر قیز دئیور قیزلارا قیزلار دینمیون
پیشوازه حس ائدیر قلبیم بیزه سقا گلور
..
جام آلین بیر بیر اله چون مشکی سالموش چگنینه
لشکر کفری پوزوب غیظیله بی پروا گلور
..
صبر ائدیب حکمت اوزیله زینب اما دینمیری
گوز یاشی گوز چشمه سیندن گرچه سیل آسا گلور
..
چون بولور بیر اوخشامیله ئولدورر قیزلار اوزون
بو چتین دم ذهنه بیر حفظ ذوی القربا گلور
..
گه دیور آهسته قارداش باجوین باخ حالینه
گور نه نوعی ای کمالی شرح کرّمنا گلور
..
من دیردیم زینبه بیردم اجل وئرمز امان
قبریوی گلسون زیارت ایله سین، امّا گلور
…
…
…
…
کاروان القصّه چاتدی کربلا صحراسینا
وئردی اوز بیر شور اعظم تک به تک اعضاسینا
..
عامل بی قید اولوبدور هر مقلّد بی درنگ
عرصهٔ ماتمده مفتی دلین فتواسینا
..
عطر روح افزانی گلشنده نسیم مهریله
لالهٔ احمر وئریبدی هر گل حمراسینا
..
ناقه لردن أندیلر اما نه نوعی أندیلر
آچما گل ایله کفایت مطلبین ایماسینا
..
گیزلنن سوزلر توکولدی دللر اوستن مجلسه
دیدهٔ قلبیله بیر باخ مجلسین غوغاسینا
..
ناله دلده اشک گوزده قان اورکده باشدا ال
آغلیان گوزلر باخیبدی کربلا زهراسینا
..
یعنی عمه باشلا سن نوحه ووراخ بیز سینیه
آغلیاخ یالقیز امامین محنت اعظماسینا
..
باشلیوبدور نوحه زینب ایهاالعطشانیله
دم وئریب سوز کلامی معرفت معناسینا
..
سویلیوب شوریله قارداش قبریوه باجون فدا
گورنه زینت بو مزارون وئرمیسن مبناسینا
..
جبریله سندن بو چولده آیرلان گوندن حسین
حاکم اولموش غصّه و غم زینبین دنیاسینا
..
نهضتون تکمیل قیلدوم دور اوزون ایله نظر
حقّ مکتب خانه سینده لوح دل انشاسینا
..
سیر تبلیغیمده گرچه محنته دوشدوم ولی
بیر بنای فکری قویدوم امروین اجراسینا
..
اولدی تسلیم خیالیم حیرتیله هر ملال
سن ووراندان مهر صبری قلبیمین طغراسینا
..
گرمیدور بازار ناله نقد آه و زاریله
اود دوتوب یانسین گرک دل آتشین سوداسینا
..
ناخدای کشتی عالم سنه دوتموش عزا
سن دوشن گوندن حسین ظلمیله قان دریاسینا
..
اولمیوب غالب اولانماز تا جهان وار هئچ زغن
بوصفالی گلشنین بیر بلبل شیداسینا
..
اکبروندن دئه که گوردوم روز عاشورا نجه
یئر عبا وئرمیشدی بیربیر دوغرانان اعضاسینا
..
تئل به تئل أسدوقجا زلف مشک فامی نیزده
گوستریبدی سرِّ صبری مو به مو لیلاسینا
..
اصغروندن دئه که ایستیر محنتی بی حد رباب
گوزلری بیرده ساتاشسین طلعت زیباسینا
..
آغلیوب سیزقین بو مدّت غصّه دن ایمدی ولی
کربلا آغلیر ربابین آه و واویلاسینا
..
سینوین بیرده بیان ائت توختیوبدور یاره سی
یا هله مأوا وئریبدی زخم عاشوراسینا
..
مین ملالیه مهیا إئتمیشم بیرمشک سو
روز عاشورا بو جمعین تشنه لب سقاسینا
..
مشکینه بیر اوخ دگوب قبرینده شرمنده یاتیب
حس ائدور کی خدمتی ناقص اولوب مولاسینا
..
قوزانیب تا ظلم الیه أندی گرز آهنین
سیندی باشی دولی قانی دیدهٔ شهلاسینا
..
بو سوزی دلپاک امانت یازدی تاپشیردی سنه
یاخشی ساخلارسان حسنیم چون بولور عقباسینا