زبانحال حضرت علی (ع) در شهادت حضرت زهرا (س)
..
..
..
..
مرحوم #حافظی_تبریزی
..
..
..
..
فاطمه سن کیمی مظلوم ئولن اولماز دئمه بس
من کیمی کیمسه غریب وطن اولماز دئمه بس
..
من سنه تعزیه دوتدوم قاپونی قویدوم آچوخ
بیر نفر مجلس ختمه گلن اولماز دئمه بس
..
هر وفات ایلینه شام غریبان دوتولور
بیله بیر شام غریبان گورن اولماز دئمه بس
..
چوخ سووردیم یغشوب یثربین اهلی گله لر
گوردوم عکس العملین من سوون اولماز دئمه بس
..
بیری گلسه دیرم دردیمی سینم بوشالار
اوتلی سینم ده کی دردی بُلن اولماز دئمه بس
..
چوخ داریخیدیم نه گلن وار نه گیدن وار گوردوم
بیر ائله درده سالان انجمن اولماز دئمه بس
..
پاک ایدردون گوزومون یاشینی تا سن واریدون
ولی گوز یاشیمی سن سیز سیلن اولماز دئمه بس
..
گتوررمیش دیله لکنت غم هجران عزیز
دلده یارای کلام و سخن اولماز دئمه بس
..
کسه سن اُلفتوی مندن امیدیم یوخودی
سن کیمی رشتۀ اُلفت کسن اولماز دئمه بس
..
قبره نسگیللی گیدن چوخ اولی فکر ایلردیم
ائله نسگیللی مزاره گیدن اولماز دئمه بس
..
چوخ مریضین بدنی بوتۀ درد ایچره اَریر
اَریَن گول بدنون تک بدن اولماز دئمه بس
..
کوینگون که کفن اولدی منه باور گلدی
غنچه وقتی سولا گول بی کفن اولماز دیمه بس
..
من دئیردیم حسنین بالغ اولار سایونده
لیک بالغ بو حسین و حسن اولماز دیمه بس
..
من دئیردیم یتیشر چوخلارا غم دنیاده
من کیمی درد و مصیبت چکن اولماز دیمه بس
..
تئز ایاقدان دوشه سن فکریمه گلمزدی منیم
یوخسا سن تک تئز ایاقدان دوشن اولماز دیمه بس
..
سنی گول فرض ائلدیم تختۀ تابوتی چمن
ائله بیر گول ائله پوزقون چمن اولماز دیمه بس
..
آغاران زلفووی تشبیه ایلدیم یاسمنه
او گوزللیقدا گُل یاسمن اولماز دیمه بس
..
کیشینی سیندرار عورت ئولومی شهرتی وار
اوندان آرتوق غم و درد و محن اولماز دیمه بس
..
یاندیرار تازه گلین داغی بولوردوم ئورگی
لیک سوزشده حرارتده سن اولماز دیمه بس
..
چوخلاریلان من اوزوم غمده شریک اولموشدوم
بی وفا چیخدی هامی من دییَن اولماز دئمه بس
..
او نفر اوز اوزونی ریشه کسن بیلدی ولی
تاری وار «حافظی» لر ریشه کن اولماز دئمه بس
..
..
..
..
#فاطمیه_شهادت #فاطمیه #حافظی_تبریزی
#فاطمه_سن_کیمی_مظلوم_ئولن_اولماز_دئمه_بس
#ترکی
#زبدةالاشعار
فاطمه سن کیمی مظلوم ئولن اولماز دئمه بس #فاطمیه_حافظی_تبریزی
نظر دهید