منزلیم گرچه اولوبدور گوشۀ ویرانه عمّه #حضرت_رقیه_تائب_تبریزی

زبانحال حضرت رقیه خطاب به حضرت زینب در خرابه شام
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
منزلیم گرچه اولوبدور گوشۀ ویرانه عمّه
وئرمرم ویرانسوانی روضۀ رضوانه عمّه
.
.
ظاهراً ویرانسرادی باطناً دارالصّفادی
چوخ صفا وار جلوه گاه جلوۀ نور خدادی
چوخ شرافت وار بو یرده مجمع اهل وفادی
فرش خاک اوسته اوتورّام ایلرم شکرانه عمّه
.
.
دین یولوندا وئرموشم دل یوخ دوگولماقدان هراسیم
محنتیم آرتدیقجا آرتار بوردا اللهه سپاسیم
وقریمی سندیرمارام من کهنه دور گر چه لباسیم
وقردن اگنیمده واردور جامۀ شاهانه عمّه
.
.
اولمیان جانباز جانان باش ویروب ترک تن ائتمز
اولماسا شوریده هر کیم ترک ملک و مسکن ائتمز
یانماسا قورتولماسا شمع ئوز کنارین روشن ائتمز
باشینه گلمز دولانماز شوقیله پروانه عمّه
.
.
من او شمعم دائماً وار یوزده اشگ جانگدازیم
یوزده اشگ جانگدازیم اودلی دلده سوز و سازیم
عاقبت یانّام قوتوللام تا چوخالسون امتیازیم
جاودانه روشن اولسون غملی بو کاشانه عمّه
.
.
بیر یتیمم دلشکسته گوزده اشگیم سینه ده آه
یوز قویوب دیواره غمله آغلارام من گاه و بیگاه
عرض قیلّام بو یزیدین یخ ایوین ای قادر الله
ایلرم نفرین مدام اول دشمن قرآنه عمّه
.
.
بولموری هند اوغلی واردی پر اثر آهی یتیمون
اود وورار دنیانی اودلار آه جانکاهی یتیمون
گرچه یوخدور بیر پناهی واردی اللهی یتیمون
محو ایدر آهیم یزیدی آند اولا یزدانه عمّه
.
.
سرّی وار آغلار گوزومده اشگیمین طوفانی واردی
دردمندم گوز یاشیمدا دردیمین درمانی واردی
سیل دور کاخ یزیدی یخماقا عنوانی واردی
ایلرم قصر یزیدی اشگیله ویرانه عمّه
.
.
ظاهراً گرچه اسیرم چوخ بیوک شخصیّتیم وار
دلشکسته دستگیرم لیک عالی همّتیم وار
من حسینه بیر سفیرم عمده مأموریّتیم وار
گیتسه جانیمده یتورّم خدمتی پایانه عمّه
.
.
اولموشام دشمن اسیری مسلمین آزاد اولونسون
باتموشام ویرانسراده دین ایوی آباد اولونسون
تا یزید بیحیانین ظلم ایوی برباد اولونسون
ایلسم بو ادّعانی واردی حقّیم یا نه عمّه
.
.
سن منه مهر و وفالی عمه سن ای غم کشیده
من سنه قارداش بالاسی هم بتوله نور دیده
هم سنه ایستکلیم من هم حسینه پروریده
اولموشام دین اوسته بیله دردیله همخانه عمّه
.
.
نوگل باغ حیایم ئوز بابامدور باغبانیم
عندلیب نغمه خوانم غارت اولموش گلستانیم
من اسیر کربلایم گنج ویرانه مکانیم
آشیانیم یاندی گیتدی ظلمیله تالانه عمّه
.
.
.
چوخ زماندور باغبانیم ئوز گلون گورماقه گلمز
توپراق اوسته هم مرام و همدلون گورماقه گلمز
باش چکوب نازلی وفالی سوگلون گورماقه گلمز
گلسه جان شاباش قیلّام مقدم جانانه عمّه
.
.
گر طبیبم باخماقا بو عشقدن بیماره گلسه
ائتماقا وصلیله درد فرقته بیر چاره گلسه
یاد ایدوب یعنی عزیزین ئوز بابام دیداره گلسه
قویمارام گتسون دوباره آند اولا بو جانه عمّه
.
.
عرض قیلّام ئوز عزیزین شاه عالی جاه آپارسون
شام ظلمتدن آیرسون بیر ستاره ماه آپارسون
هر یره گیتسه ئوزیله ئوز قزین همراه آپارسون
آتماسون ئوز آشناسین اولماسون بیگانه عمّه
.
.
جان وئرنده باشیم اوسته کاش بیر اکبر گلیدی
یوز یوزه منله قوییدی واردی نه دردیم بولیدی
دردیمی دلدن آلیدی اشگیمی یوزدن سیلیدی
باشیمه رأفت الیله ایلییدی شانه عمّه
.
.
خوش دوشردی بیر ئوزومله اکبری دمساز ائدیدیم
چوخ سوزوم واردور اونیله باب صحبت باز ائدیدیم
او منی خوش دیندیریدی نازیله من ناز ائدیدیم
سو سپیدی رأفتیله بو دل سوزانه عمّه
.
.
عمّه یثرب قزلاریندا وار منه چوخلی علاقه
ماه گردون حجازم طالعیم چکدی عراقه
نیلیوم تقدیر گتدی شامده سالدى محاقه
آختارار بولّم او قزلار ایمدی یانه یانه عمّه
.
.
آهیله هر دم سفارش ایلرم باد صبادن
دعوت آللام شهر شامه دختران با وفادن
تا گلوب تاپسونلا عمّه بو قزی ویرانسرادن
نه چکور گورسونله ویران یرده بو دردانه عمّه
.
.
من گل ناز حسینم گورموشم چوخ نیش خاری
چولقیوب گرد یتیمی سولدوروب بو گل عذاری
تز یتر بوردا خزانه گلشن عمروم بهاری
لاله تک دللر دونه للر حسرتیمدن قانه عمّه
.
.
.
وئر خبر تا باشیم اوسته آل پیغمبر یغیشسون
اوغلی قارداشی ئولن لر یاسلیلار یکسر یغیشسون
قاره گیموشلر باشندا قاره معجرلر یغیشسون
همدم اولسونلار وئرنده جان من نالانه عمّه
.
.
بو قرانلوق ایوده ئوللم دلده آهیم زار و خسته
گر چراغون یوخ ایتیرمه چوخ ئوزون ای دلشکسته
شمع آه جانگدازون ایله روشن قبریم اوسته
یاسه بات ساخلا عزا توک اشگیوی دامانه عمّه
.
.
ائل قبیلم یوخدی گلسون ایلسون چاک گریبان
سن ئوزون ماتم نشین اول باشدا بیر جمع پریشان
قویما خوار اولسون عزامی دوت منه شام غریبان
اوخشیون بیر شیونیله سیز بو باغریقانه عمّه
.
.
کوچ ایدوب بوردان گیده للر عمّه بو محنت قطاری
لیک اولار بو یرده مدفون بو حسینون یادگاری
خلق ایدر دائم زیارت بو مزار مشگباری
اگلشر عطر حسینی هر مشام جانه عمّه
.
.
من غریب ئوللم بو یرده برملا اولموش مسلّم
گنج تک ویرانه یرده دفنیمه سن اول مصمّم
قبره قوی ویرانسرایه وور حسین آدیله پرچم
تا تاپا تشکیل دینی بیر سفارتخانه عمّه
.
.
دشمن دین کور اولار بو پرچم دینی گورنده
جلب ایدر اهل یقینی پرچمیم بوردا اسنده
یول سالاللار قبریم اوسته شیعه لر شامه گلنده
چاره سیزلر چاره ایستر درد بی درمانه عمّه
.
.
بیزلره خاډمدی « تائب » بو آدیله متصف دی
باشدا وار شور حسینی صادقانه جان بکف دی
حسّ مسئولیّتله نوحه خوانی با هدف دی
بی هدفلر خصم اولالار باهدف انسانه عمّه
.
.
درس انسانی آلوبدور چون حسین باشرفدن
وورسالار پیمان شکنلر گر اونی هر دورت طرفدن
فکرینه تغییر وئرمز یوز چویرمز دوز هدفدن
بی هدفلر جرگه سینده ئولسه گلمز سانه عمّه
.
.
#حضرت_رقیه_تائب_تبریزی
#حضرت_رقیه_شهادت
#منزلیم_گر_چه_اولوبدور_گوشۀ_ویرانه_عمه
#ترکی
.
✍️ #زبدةالاشعار ✍️
.
🆔: @nohe_torki