زبانحال حضرت رقیه (س) در خرابه شام
..
..
..
..
حسینی زنجانی
..
..
..
..
نولور گلوب چکه سن باش بو دل فکاره بابا
دچار اولوبدی قیزین درد بی شماره بابا
..
مدام آغلاموشام سندن آیریلان گوندن
دونوب گوزوم یاشی چون بارش بهاره بابا
..
شماتت ایتدى منه خولی ، ساربان دوگدی
ئورک ایوی آلیشوب دل چکوب شراره بابا
..
وروبدی سیلی منه شمر دون ئوزوم گوگروب
قولوم کیمی گل ئوزومده اولوبدی یاره بابا
..
یارالی باشیوه یولّاردا نیزه باشینده
باخوب یانا یانا هی ایلدیم اشاره بابا
..
دانیشمادون ندن آخر بو دل شکستیله
و یا که ناز ایلیوردون بو داغداره بابا
..
گلنده شامه بابا یولدا ناقه دن دوشدم
سالوب زمانه ائیلیمدن منی کناره بابا
..
او قدری چوللری قاچدیم تیکانلار اوستونده
ایاقلاریم توخانوب داشه ، نوک خاره بابا
..
آخوب ایاقلاریمون قانی من دوروب باخدیم
تاپولمادی بیری امداد ایده بو زاره بابا
..
قوجاقلیوب دیزیمی اوتدوم آغلیوب یاندیم
اولوبدی جاری گوزوم یاشی گول عذاره بابا
..
ئورگیمون سوزونی قاصد صبایه دیدوم
توسّل ایلدیم عبّاس نامداره بابا
..
سنی هراییمه من سسلدیم ولی افسوس
جواب اولمادی سندن بو غمگساره بابا
..
ولیک زجری فلک یولّادی دالیمجا منیم
ال آتدی قمچیه یتجک من فکاره بابا
..
آت اوسته زجر ، ولی پا پیاده گلدیم من
الیم باشیمدا قاچوب ساقه گه یساره بابا
..
یتینجه قافلیه یولدا جانیمه دویدوم
یخیلموشام یره گه دورموشام دوباره بابا
..
گورنده قانه بلشموش باشین جدا اوسته
ئورکده شکر ایلدیم حیّ کردگاره بابا
..
دیدوم ویرون بابامون باشینی قوجاقه آلوم
سیزیلدیوب نقدر گلدیم آه وزاره بابا
..
باشوی ویرمدیلر نیزه نی قوجاخلاموشام
سنانه بوسه وروب هی بو بختی قاره بابا
..
من آغلادیم باباجان آغلاشوبدی عمه لریم
ایدوبدی نالم اثر قوم نابکاره بابا
..
دوشوب یولا ایلدی غملی کاروان حرکت
یتشدی شامه گونوم دوندی شام تاره بابا
..
خرابه ده بیزه یر ویردیلر گوزوندن ایراق
زمانه عترتیوی سالدی چوخ فشاره بابا
..
فلک خرابه نشین ایلیوبدی قیزلاریوی
نیدوبدی آل علی چرخ کجمداره بابا
..
زبسکه گوشۀ ویراندا توپراق اوستونده
اوتورموشام ، بلشوب تئللریم غباره بابا
..
بوشامین اهلی گورنده باخوب گولولّه بیزه
ورولّا دل یاراسی قلب زخمداره بابا
..
گوزوم یولوندا قالوب اودلی سوزلریم دلده
دوزنمورم داخی بو هجر و انتظاره بابا
..
نولور بابا بو خرابه مکانه باش چکه سن
ایدم بوجانیمی شاباش او شهریاره بابا
..
اگر خرابیه گلسن گلایه ایلمرم
نه جامه ایسترم آخر نه گوشواره بابا
..
ولی گلنده اگر ممکن اولسا یول اوسته
آلوب گتور منه بیر خوردا گاهواره بابا
..
گیجه نی صبحه کیمی اوخشیوم چالوم لای لای
دل آچمیان یارالی طفل شیر خواره بابا
..
فقط ئورکده بودی حسرتیم گورم یوزیوی
اجل گلینجه یتم بلکه وصل یاره بابا
..
سنیله بیرده بابا قول بویون اولوب دانیشاق
قویام بو سیلی یرین یاره لی عذاره بابا
..
ئوپوب اوقانلی دوداقلاریوی باتام قانه
بو جان نثار اولا تا که او جان نثاره بابا
..
باخا باخا باباسن جان ویرم کنارینده
چیخاندا گون ، نه گوزلدی سوزه ستاره بابا
..
اوزون نماز قیلوب غسلیمی اوزون ویره سن
کفن ایدوب قویاسان جسمیمی مزاره بابا
..
منه چوخ آغلار حسینی ، اونادا بیر نظر ایت
که سالمیا اونی بیزدن فلک کناره بابا
..
..
#حضرت_رقیه #حسینی_زنجانی #حضرت_رقیه_شهادت #ترکی #زبدةالاشعار
نظر دهید