کوچ از شام
.
✍️ زبدة الاشعار ✍️
.
🆔: @nohe_torki
.
مرحوم نادری میانجی
.
هر شخصین اولسا بهره سی علم روان دن
واضح بلر ندور غرضیم بو بیان دن
.
.
نفرین اولونموش انسانا وحشت وئرنده ال
هذیان دیر دورار ائدر ئوز دیزلرین بغل
دیوانه ایلیر اونی ئوز ائتدیگی عمل
شاملدی شام ایچینده یزده بو صحنه لر
کار ایلیوبدی آخر او ملعونه طعنه لر
.
.
دوتموشدی چون حسین قانی اول شوم و ابتری
گاهی یاتور ، دورور ، دولانور ، گاه سرسری
پیغمبری ، گورور یوخودا ، گاه حیدری
زین العبادی ایستدی دربار نحسنه
عرض ایلیوردی یابن حسین رحم ائدون منه
.
.
من بی گناهم ایندی آدیم بد نهاد دور
ابن زیادی بلمدوم اهل فساد دور
بد نام ائدن منی همین ابن زیاد دور
گئچدی گئچن بو ایشده پشیمانم ئولموشم
چوخدان منیم ائویم یخلوب ایندی بلموشم
.
.
سالمش بو واقعه داخی گفتاردن منی
شرمنده ائتدی احمد مختاردن منی
داره چکوبدی گل ئوزون آچ داردن منی
هر قدر سیم و زر دیوسن من وئروم سنه
اما باغشلا سنده حسین قاننی منه
.
.
گفتاره گلدی سید سجاد ائدوب خطاب
وجدان یوخوندی تا چکه سن قلبدن عذاب
ائتدی سنون بو سیم و زرین دین ائوین خراب
قان خالقندی فرض ایلمه قان منیمکیدی
ویرانه ده فقط قوری بو جان منیمکیدی
.
.
گیرم زیادین اوغلی توکوب کربلاده قان
ووردون نیه حسین باشنا چوب خیزران؟
اول باش سنه قوناقدی سن باشه میزبان
ووردون قوناقی ایلمدون شرم و واهمه
هئچ بلمدون او مجلسه ناظردی فاطمه
.
.
سن بلمسن حسینی خداوند ائدوب عزیز
حکم ایلدون سنان و عمر ائتدی ریزه ریز
ئوز مجلسونده شامی ، قزین ایستدی کنیز
سن حرمت پیمبری ظالم ایاخلادون
عصرین امامنی ایاق اوستونده ساخلادون
.
.
مدتدی من بو شامده توپراقه باتموشام
بی فرش و بی چراغ قوری یرده یاتموشام
گوز یاشیمی خرابه ده توپراقه قاتموشام
ائتدون عیال حیدر کراری بی وطن
ئولدی باجیم خرابه ده آج تاپمادوم کفن
.
.
دوشدی امام ایاقینه اول زادۀ زنا
سالدی دیلین ایشه دئدی اول شوم و بی حیا:
عذر ایسترم باغشلا منی ائتمیشم خطا
اسباب کوچ و غارتی تسلیم ائدوم سنه
خرج سفر نقدردی تقدیم ائدیم سنه
.
.
چوخ جر و بحث اولوب یتشوب سوز مقامنه
تسلیم ائدوبدی غارتی عصرین امامنه
دستور وئردی فوری او ملعون غلامنه
آماده اولدی کوچه ده شاهانه ناقه لر
تخت روان و محمل و زرّین کجاوه لر
.
.
تنظیم ائدوب قضا و قدر اوز نگارشین
سجاد گلدی زینبه وئرسین گزارشین
تشریح ائدوب یزید لعینین سفارشین:
الان بو وقتدن ائوی بربادسن بی بی
قورتاردی چون اسارتین آزادسن بی بی
.
.
فرمایش ائتدی زینب بیچاره من نئدوم
قارداشلاریم هانی ؟ نجه عزم وطن ائدوم؟
نالان رقیه می کیمه من تاپشوروم گئدوم
بلمم ندن ئولوم من بیچاره دن قاچار
ام البنین گورنده منی باشنی آچار
.
.
چخدی خرابه دن غرض اول عترت رسول
شاهانه تختی گورجک او دم دهتر بتول
سسلندی شامیان منی چوخ ائتمیون ملول
گر چکمسوز بو محمله سیز قاره گئتمرم
شاهیم ئولوبدی محمل زر تاره مینمرم
.
.
چوخداندی باتمشام بلوسوز که قرایه من
توش اولموشام عراقده یوز مین بلایه من
قصدیم بودور قاباقجا گئدم کربلایه من
عرض ایلیم حسینیمه تا که بو مطلبی
گورسون سالوب نه حاله زمان داغلی زینبی
.
.
دستور زینبی قویوب اجرایه شامیان
قاره چکیلدی محمل زرتار اولوب نهان
اوردا اولان جماعت ائدوب ناله و فغان
تدبیر زینب عالمۀ بی معلمه
شامین جماعتین تزه دن سالدی ماتمه
.
.
وقت اولدی تا که قافلۀ غم سوار اولا
سمت حجازه آل پیمبر دوشور یولا
زینب باخوبدی حسرتیلن بیر ساقا سولا
اذن رحیل قافلیه وئرمیوب خانم
اوردا عروس فاطمه نی گورمیوب خانم
.
.
زینب ال آتدی باشنه یارب بالام هانی؟
کرب وبلاده فاش اولی مطلب بالام هانی؟
من نه دیوم حسین دئسه زینب بالام هانی؟
واضح دیوم بو دردی تحمل ائدنمرم
دشت بلایه فاطمه سیز من گئدنمرم
.
.
.
اهل حرم پیاده اولوب آغلاشوردولار
هر عابری پیاده گوروب یالواروردولار
کوچه به کوچه فاطمه نی آختاروردولار
بیردن یتشدی گلشنه ، کو کو ترانه سی
ویرانه دن قولاقه گلوب بلبلون سسی
.
.
کسمش رقیه فاطمه نون تار صبرینی
آلمش خرابه ده اونون آغوشه قبرینی
آغلور دیور خراب اولا بو شام شهرینی
گلدوم خرابه دن گنه بیر گول دَرَم گئدم
خردا مزاریوی باجی بیرده گورم گئدم
.
.
قربان سنون بو قبریوه ای دربدر باجی
من شامه سنله گلمشیدوم همسفر باجی
گر اکبریم سنی آلا مندن خبر باجی
من شرح حالیوی اونا حالی ائدنمرم
سنسیز باجی علی یاننا من گئدنمرم
.
.
هر نه بلا گلنده گلوب مشترک بیزه
باهم ووراردی قوم عداوت کوتک بیزه
اولمازدی بو خرابه ده چوخ گون چؤرک بیزه
غرات گونونده دشمن الینده تالانمشوق
آتلار دؤشؤنده هر ایکیمیز دالدالانمشوق
.
.
سن ناتوان اولوبسان اگر منده باغری قان
دور منله بیر دانش بابامون جانی هارداسان؟
گورمم دوباره من سنی یولّانسا کاروان
دور ای عروس باجیسین آغلار قویان باجی
نه شمر واردی بوردا نه ده ساربان باجی
.
.
باد خزان ساراتدی آچوب غنچه گولمدوم
آخر نه باعث اولدی که بو سرّی بلمدوم
ئولدون خرابه ده باجی اما من ئولمدوم
شامون خرابه سی ندن اولدی وطن سنه
ئولسون باجون تاپولمادی بیرجه کفن سنه
.
.
گور فاطمه سرشک توکور غم عذارینه
یولاندی کاروان گئدوری غم دیارینه
سویله سفارشون ندی اکبر مزارینه
سمت حجازه قافله بی پاسبان گئدور
آل علی کیمی قاپوسی باغلانان گئدور
.
.
زینب کسیلدی طاقتی بو جور عصردن
گلدی گوتوردی فاطمه نی خاک قبردن
فرمایش ائتدی آغلا ولی چخما صبردن
تازه گولوم سولوبدی بو گلشنده آغلارام
آغلار گونوندی آغلا بالا منده آغلارام
.
.
ای نوگل حریم گلستانیم الوداع
ای شامده قالان گوزی گریانیم الوداع
گئتدی بی بون رقیه و نالانیم الوداع
مندن سنی سوروشسا نجه من گَلوم دیله؟
من نه دیوم حسینه ؟ خجالت بی بون ئوله
.
.
عورت اوشاق نوایه گلوب باشلانوب عزا
ویران خرابه ده تزه دن حشر اولوب به پا
زینب دیوردی هارداسان ای شاه کربلا؟
یاز «نادری» دوشوب یره پیغمبرون گولی
یوخدور رقیه تک اولا بیر طفل نسگلی
.
#کوچ_شام
#هر_شخصین_اولسا_بهره_سی_علم_روان_دن
#نادری
#ترکی
.
✍️ #زبدةالاشعار ✍️
.
🆔: @nohe_torki
نظر دهید