«استغاثۀ حضرت زینب(س) درکوفه»
..
..
مصیبی تبریزی
..
..
کوفه ده مکتوب اولان پیمانه لعن اولسون حسین
آلتینا امضا ووران دونانه لعن اولسون حسین
جاعلان ِ مکتب و قرآنه لعن اولسون حسین
کوفه نین بطنینده کی طغیانه لعن اولسون حسین
دارالامرینده یاتان شیطانه لعن اولسون حسین
هم یزید هم زاده مرجانه لعن اولسون حسین
..
..
کوفه دور اما هواسینده صفا گورسنموری
بی حیا خلقینده بیر ذره وفا گورسنموری
بوردا آثار علی المرتضی گورسنموری
سینه لرده جذ بۀ آل عبا گورسنموری
من خانملیق ائتمیشم بش ایل، بهاگورسنموری
یوخدی مردی جمله نامردانه لعن اولسون حسین
..
..
خواهر عبّاسم امّا شمریلن آواریم
قدّیمی غملر بوکوب درد و بلا زوّاریم
کوفیان فکر ایلیوللر عاجزم بیچاریم
یوخ بولن منده آنام زهرا تک آتشپاریم
زینبم عنوان عشقین سنجش و معیاریم
عشقیمه ایراد ائدن دونانه لعن اولسون حسین
..
..
ائتدیلردعوت اولاخ بیزکوفه شهرینده قوناق
جاندان ال چکدوق سنیلن باغلادوق عهد ووثاق
لیک چوخ انصاف سیز ملت دی بوقوم عراق
هامّوسی اهل ریا و دوز و تزویر و نفاق
خانمان عترته اود ووردیلار بالاتفاق
بوردا کی حیثیت و وجدانه لعن اولسون حسین
..
..
کوفیان بیعت ائدوب بیر جانی بدنامیلن
کسدیلر شه باشینی لب تشنه استظلامیلن
ال وروبلار غارته غارتگران شامیلن
دویدیلر آل اللهی مین آلت و اقلامیلن
سالدیلار زندانه قوللار باغلانوب اجرامیلن
بانیان آتش حِرمانه لعن اولسون حسین
..
..
باغلانوبدی قوللاری سجادیوین زنجیریلن
طیّ اولور صبح ومسامیز ضجّه وتکبیریلن
قورخوشوللار قیزلارین هرضربت شمشیریلن
اهل کوفه ال چالیللار بیزلره تحقیریلن
خارجی آد قویدیلار آلُ اللّهَه تزویریلن
کوفه ده بنیان تزویرانه لعن اولسون حسین
..
..
گورسنور نوک جداده مه لقا اکبر باشی
لیلی نی زار ایلیوب پیغمبره بنزر باشی
هم صفای نیزه لردی صودامر اصغر باشی
نیزده یوخدور ولی عباس مه پیکر باشی
پارچالانمیشدی ، جداده ائتمدی لنگر باشی
باش یاریب باش سیندیران خصمانه لعن اولسون حسین
..
..
کوفیان ننگ و وقاحت ده کماله چاتدیلار
باشیوه نوک جداده اوخ وُروب داش آتدیلار
خارجی آد قویدیلار بیگانیه اوخشاتدیلار
عزّت عُقبا لرین دنیاده پوله ساتدیلار
هم منی هم باغریقان قیزلاریوی آغلاتدیلار
نامۀ دعوت یازان عدوانه لعن اولسون حسین
..
..
کوفه نین شهرینده چوخدوریابن زهرا داش وُران
خِبره دور داش وورماقا صبح ازلدن کوفیان
کربلانین چوللرینده اولدی بو مطلب عیان
قتلگاهی دولدوروب داشیله قوم بدعنان
سجده گاهیندن باجون ئولسون آخور بیرتازه قان
سجده گاهه داش وران دستانه لعن اولسون حسین
..
..
عطر زهرا قانلی باشیندن گلور میر ِحُنین
گوئیا زهرا سنه مهمانیدی، نور دوعین
منزل خولی ده قورموشدیزعزاوشوروشین
واردی رخسارونده خاکستر امام مشرقین
اولمیاسن کوللراوسته یاتموشیدون یاحسین؟
خولی بدذات بی وجدانه لعن اولسون حسین
..
..
سن شهیداولدون ولی چاتدی اسارت زینبه
بو اسارتده اولوبدور بس جسارت زینبه
ایلیوبلر کوفیان بی حد شماتت زینبه
دیل یاراسیلن ووربلار چوخ جراحت زینبه
پول سپوبلر راهیمه اولسون اهانت زینبه
بیشۀ ذلّتده کی ثعبانه لعن اولسون حسین
..
..
نان و خرما ایلیور احسان بیزه نسوانیلر
یوخ بولن آلُ اللهَه اولمیش حرام احسانیلر
بیزلری تحقیر ائدوللر هرزه بی وجدانیلر
تیز اولوب نابودی اسلامیچون دندانیلر
دوغرانوبدور جدّیمه نازل اولان قرآنیلر
منکران مصحف قرآنه لعن اولسون حسین
..
..
بو همان یردور علی نین قلبینی قان ائتدیلر
افتخار شیعه نی قان ایچره غلطان ائتدیلر
پرچم عدلی ییخوب مسجدده طغیان ائتدیلر
کوفه اهلی کربلانی قانلی میدان ائتدیلر
مرتضانین اهل بیتین خانه ویران ائتدیلر
عاملان شورش و طغیانه لعن اولسون حسین
..
..
کربلادن کوفیه نوک جداده گلمیسن
صوت قرآنیله قلب اشقیانی دلمیسن
یورقونیدون، نیزه باشینده حسین دینجلمیسن؟
عازموخ بیرمجلسه قارداش دئمه سن گلمیسن؟
دشمنین وار چوخلی طرحی سویلمه سن بیلموسن
پیروان مکتب شیطانه لعن اولسون حسین
..
..
یاز«مُصَیـّب» لعنت اولسون کوفیان ارذله
لعنت اولسون شمرو خولیّ و سَنان و بجدله
لعنت اولسون ثانیه هم ثالثه هم اوّله
لعنتینده چخماسین یاددان یزید و حرمله
لعنت اولسون یاغیان بی حیا و اَسفله
بانیان فتنه و عصیانه لعن اولسون حسین
..
..
#کوفه
#کوفه_ده_مکتوب_اولان_پیمانه_لعن_اولسون_حسین
#مصیبی_تبریزی
#ترکی
#زبدةالاشعار
نظر دهید