گل على لیلا دولانسون باشووا میدانه گیت #اکبریه_شعاع_تبریزی

زبانحال حضرت لیلا (س)
در وداع حضرت علی اکبر) ع)
..
..
..
..
..
مرحوم شعاع تبریزی
..
..
..
..
..
گل على لیلا دولانسون باشووا میدانه گیت
تشنه قربان اولماقا قربانگه جانانه گیت
..
..
..
..
..
ای امیدیم گوزلریم نوری جوان مه لقا
چکدیم ال سندن اوغول یالقزدی شاه کربلا
گیت جهاد ایله او ضرب شصتوه لیلا فدا
درّ اشگی باخما لیلانون آخور دامانه گیت
..
..
..
..
..
غصّه لنمه آغلاما سن باخما لیلا آغلوری
باش آچوبدور عالم معناده زهرا آغلوری
تک گورور اوغلی حسینی جدّی طاها آغلوری
ایتماقا نصرت بو شاهنشاه لب عطشانه گیت
..
..
..
..
..
سن نه اسماعیلدن من نه او هاجردن کمم
دوزمرم یالقز قالوب یتسین خلیل اللّهه غم
من دایانّام سن ده گیت ویرمه او خم ابرویه خم
ئولمگه ئوولدورمگه باغلا کمر مردانه گیت
..
..
..
..
..
ایستیسن بیدار اولا روحی بو قوم ناکسین
حسنوون یوسف کیمی آرترماقا پیرایه سین
قویما مغفر قوی باشا یعقوب عشق عمّامه سین
دوشماقا چاه بلای وادی کنعانه گیت
..
..
..
..
..
ایلدیم شانه اگر چه زلفون ایتدیم خم به خم
دوزمرم بیر تار مو گیسولروندن اولسا کم
گیت ولی دشمن قباقینده ایله قدّون علم
مایۀ فخر اولماقا بو قامتی چوگانه گیت
..
..
..
..
..
ایستیدور گون چتر زلفون ایله رخساره نقاب
آفتابی هر گورن فرض ایلسین اؤرتوب سحاب
گیت دیمه لیلا دوشر باشیم دالنجا بی حجاب
بیر سنق نی تک گلر شام و سحر افغانه گیت
..
..
..
..
..
پوزما حالون جرئت ایلر پوزقون احوالون گورن
ایلمز دعوا سنیله عارض آلون گورن
چوخ گمانیم وار یوزونده هاشمی خالون گورن
ایستمز مرجان کیمی خالون بویانسین قانه گیت
..
..
..
..
..
آتش ظلمه بو شام اهلی وروب بو گون اتک
یاندیلار بو سونمز آتشده کومکلر تک به تک
سنده گیت یان شمع عشقیله یانان پروانه تک
باخما بو لیلا قالار بیر عمر یانه یانه گیت
..
..
..
..
..
حق یولوندا گیت باشوندان گیچ آنان باشسیز قالا
یار و یولداشون وطنده یار و یولداشسیز قالا
گوزلری یولدا قالان صغراده قارداشسیز قالا
مبتلادور باخما مدّتدور غم هجرانه گیت
..
..
..
..
..
دوتموشام من بیر امیدیله اوغول بو دامنی
آند ویرّم من آنالق حقّینه ایمدی سنی
من غریبم باری عمّون زینبه تاپشور منی
ناگران قالما گیدورسن هر یره هر یانه گیت
..
..
..
..
..
گورسه اوغلون یوخ سوزوم دوزمز آنا آشفته حال
حالیوی پوزما آنان احوالینی ایتمه خیال
قوی آدون قالسین دیلیمده وردیم اولسون ماه و سال
هر دله گلدوقجه آدون غم گتیرسین جانه گیت
..
..
..
..
..
درج چشمون قویما سپسین درّ اشگون دامنه
گوزلرون قربانیم سن آغلاما باخما منه
غصّه لنمه آغلاما یانما آنان قربان سنه
لیلینون جانی فدا اوُل دیدۂ گریانه گیت
..
..
..
..
..
فکریوه بو گلمه سین ئولسم اولار لیلا اسیر
لشکر عشقون ایدوب أون سکّیز ایلدی دستگیر
من بلا چکماقدا استادم منه اولماز نظیر
قوی گیدیم زندانه من سن روضۀ رضوانه گیت
..
..
..
..
..
بیر آنا درد دلین بولمز آنادان اوزگه سی
مرغ روحی ایستر اوچسون اوغلونون گلجاق سسی
سندن ال چکمز آنان لیلانون او لسا چاره سی
هر دینده دل دونور دل لالۀ نعمانه گیت
..
..
..
..
..
ای «شعاع» ایسته خدای لامکان و لامکین
جمله احبابیله بیرده «حافظی» بیر اربعین
ایلیه قسمت حسینون قبر پاک اطهرین
اولماقا شمع مزار اکبره پروانه گیت
..
..
..
..
..