#هنده در خرابه ی شام
.
✍️زبدة الاشعار✍️
.
?: @nohe_torki
.
مرحوم یحیوی اردبیلی
.
هنده بیر صاحب اخلاق و کمال عورتیدی
بنت عبدالله عامر، نجبا نسبتیدی
سابقا شاه ولایت ائوینه كلفتیدی
خدمت ایلوردی خانم زینی کبرایه مدام
سوپوروب صحن شریفین ایلدی کسبه مقام
.
.
اونی ازاد ایلدی بانوی فرخنده لقا
شامه گلدی او زن پاک دل و پاک نما
مطلع حسن و جمالیدی بدیع السّیما
ازدواج ایتدی او گنجینه ی عصمتله یزید
حرمه قیلدی حرم باشی محبتله یزید
.
.
نچه مدت که سراپرده ده اول زهره جبین
حکمفرمائیدی شام اهلینه مغرور و متین
تخت تالار حرمده ملکه صدر نشین
اهل حاجت اونا اد قویموشیدی باب امید
ایله محبوبیدی امرین یره سالمازدی یزید
.
.
ناگهان گردش ایام ایلدی ترسه مدار
اولدی اقبال یزید اسب مراد اوسته سوار
قیلدی طاووس رسول اللهی مکریله شکار
بیر گون عرضینده بنی هاشمی مظلوم ایلدی
ابدالدهر اوزینی لعنته محکوم ایلدی
.
.
دهم ماه محرم او سیه روز عزا
گل ورقلندى خزان اولدی بهار زهرا
قطعه قطعه ایلدی جسم حسینی اعدا
اهل بیتی باش اچوق ناقه سوار ایلدیلر
اپاروب شامده ویرانه ده خوار ایلدیلر
.
.
نجه ویرانه اچوق مسجدیدی کهنه حصار
نه اونون سقفی نه دروازهسی نه غرفه سی وار
هر طرفدن یل اسنده بوره یور گرد و غبار
نجه گور زینبه تنگ اولدی او وسعتده جهان
بیر بیله یرده او بانوی ادب قیلدی مکان
.
.
او فشاریله خانم ویرمدى الدن ادبین
بیر گیجه قویمادی فوته گیده اعمال شبین
اوتوروب قیلدی نمازین خبر السان سببین
چون كفایت قدری ویرمدیلر نان و طعام
دیزده اولسیدی اگر قوتی ایلردی قیام
.
.
گیجه نی اوچ پره بولمشدی او گردون خدمه
اوّل شبده پرستاریدی اهل حرمه
نصف شب سجده ایدردی حق صاحب کرمه
اخر شبده یواش نوحه دیوب اغلاردی
باشی دالدان کسیلن شاهه عزا ساخلاردی
.
.
شمع ماتم اوره گینده گیجه لر حال نیاز
اریوب قلبی تک ایلردی اونون سوز و گداز
یانوب اول شمعه گیدردی ارادان پرده ی راز
صحنه ی کرب و بلا ظاهر اولوردی گوزینه
شهدا نعشی گوروردی یخلوب یر پوزینه
.
.
هر بیر عورت که گلوردی اولارون خدمتینه
زینبون واله اولوردی ادبی صحبتینه
صبرینه رافتینه عفتینه عصمتینه
اولماز عالمده دیردیله بو قدرتده خانم
بو فصاحتنده بلاغتده رشادتده خانم
.
.
واریدی نطق و بیانینده اونون بسکه اثر
قیلدی عورتلره هر لفظی تجلای هنر
حرکات و سکناتی ایلیوب جلب نظر
نفسی عالی دی حقارت صفینه وورماز اوزین
روزگاریله کشاکشده ده سندیرماز اوزین
.
.
شامده ایو یوخیدی اولمیا اوندا تقریر
که گلوب شهره بیر عده نجبا زاده اسیر
اسمان شرف و عزته خورشید منیر
دختران ادب اموخته، بافضل زنان
گنج تک حیف اولا ویرانه نی ایتمیشله مكان
.
.
بیر گیجه خوش دلیدی هنده یزیدون حرمی
عیشه مشغولیدی دورینده کنیز و خدمی
ضمن صحبتده کنیزون بیری اول ذی حشمی
ماجرای اسف انگیزه خبردار ایلدی
خاک ویرانه ده گوردوکلرین اظهار ائلدی
.
.
ای حرمخانه ی سفیانیده بانوی کبیر
گورمیشم مسجد ویرانه ده بیر عده اسیر
ننچه خاتون مجلل نچه اطفال صغیر
درگه حقه مناجاتیده گوردوم اولاری
سیرت اهل سماواتینه گوردوم اولاری
.
.
بیر جوان سید نورانی نماسی مدنی
اهنین سلسلیه باغلیدو ناخوش بدنی
لحن قرانی سالور حیرته یولدان گئدنی
لهجه ی اهل حجازیله او شیرین دانیشور
هر کسه سالسا نظر، سرّ ضمیرین دانیشور
.
.
خوردا قزلار سولشوب چون گل نسرین توكلوب
یره گوگدن دیه سن خوشه پروین توکولوب
توز باسوب زلفلرین چگننه چین چین توکولوب
گرک اول زلفلر ارسته اولا شانه ئیلن
نه که اشفته لنه صرصر ویرانه ئیلن
.
.
بیر رشیده خانمی گوردوم اوجاقامتی وار
هامی عورتلره قیزلاره مدیریتی وار
اگلشوب دورماقا دستور ویرور حرمتی وار
اوندان هر قز که طعام ایستسه رنگی سارالور
ال چکر زلفینه اشکین سیلر اغوشه الور
.
.
هندیه ویردی کنیزون بو مقالاتی تکان
دوشدی بو فكره گوره کیمدی او معقوله زنان
امر ایدوب خواجه سرالر گتوروب تخت روان
بوینونا سلسله ی درّ و جواهر سالدى
معجر اوستن باشا چادر شب فاخر سالدى
.
.
خط سیرینده دوشندی یره قیمت لو فراش
یریور دورده نظمیله کنیز و قره باش
باشی اوسته اچیلوب چتر زراندود قماش
قباقیندا دوزولوبدور نچه فانوس طلا
پرتو شمع ویرور طوق زر افشانه جلا
.
.
گیجه نون عالمى ظلماتیدی دارالاسرا
شمع لردن ایشیق الدی در ویرانه سرا
موکب هنده نون عکسی دوشوب اول مجلس ارا
او قرانلوقدان حسینون باجیسی سالدی نظر
اوز کنیزین تانیدی ویردی اسیرانه خبر
.
.
دیدی اهل حرمه فوری منی دوره لیون
زلفله پرده چکون تا منی پنهان ایلیون
سیز منی زینب ادیلا چاغیروب سسلمیون
گورمسون هنده کنیزیم بو مصیبتده منی
قوری پرده باش اچوق منزل ظلمتده منی
.
.
یتشوب هنده به تشریف، و به اجلال تمام
یره بیر صندلی قویدی در مسجدده غلام
او قیزیل صندلون اوستونده دوتوب هنده مقام
دیه سن تخت سبا بزم سلیمانه گلیب
بوراخیب اهرمنی ساحت سلطانه گلیب
.
.
ال ال اوسته دایانوب دوره ده خدام و کنیز
عود مجمرده یانور عطری اولور رایحه خیز
صاحب عزت اولوب خوار کنیز اولموش عزیز
تف بیله گردش دورانه دنی پروریمیش
مثل ابلیس لعین دشمن پیغمبریمیش
.
.
چون خرابه یریدی عالم شب، تیره و تار
روشنائیده باخان گورمزدی اوردا نه وار
هنده حکم ایلدی کئچدی قباقا مشعله دار
او بلا صحنه سینه دوزدیله فانوس لری
تا که ایدین گوره لر صورت محبوس لری
.
.
گوردی بیر دسته بالا قیزدو حصیر اوسته یاتوب
نچه بانوی سیه پوش اوتوروب یاسه باتوب
ارادا بیر خانم عورت یوزینه معجر اتوب
گیزله دوب پرده ده عورتلر ایچینده اوزینی
باشینه قاره سالوب گورمه سون هنده یوزینی
.
.
دیدی ای گیزلنن عورت نیه احرامده سن؟
نه گناهیله دوشوبسن خطره، شامده سن؟
اولما اعرابده سن جرگه ی گمنامده سن؟
سندیروبسوز بو حقارتله مقامین عربون
شهرتون وار، دی گوروم شهروی اصل و نسبون
.
.
داخی بو کلمه ی ننگین ده قطع اولدی قرار
زینبون روحی بدنده سیخیلوب تاپدی فشار
دفعتا دوردی ایاق اوسته او مرضیه تبار
دیدی گوردوم ایتوروبسن گهر معرفتون
سنی مغرور ایلیوب طنطنه ی سلطنتون
.
.
عامری نون قیزی سنده یوخیدی نقص بیان
نیه گمنام گوزیلن باخوسان خنده کنان
غبطه ایلر منیم اجدادیمه سادات جهان
حیطه ی کل قبایلده سپهر شرفم
ابرو و شرف و عصمتیله متّصفم
.
.
من حجاز اهلی، اوزوم فخر نساء عربم
ساکن شهر مدینه، نبوی منتسبم
بانوی طایفه ی هاشم والا نسبم
بیر زمانیم واریدی دوش بتول عرشیمیدی
دامن صاحب معراج منیم فرشیمیدی
.
.
خواب غفلتنده یاتان هنده ایلدی یوخودان
خانمون کلمه سی گتدی اونا شور و هیجان
دیدی قربانون اولوم پرده لی سوز ایتمه بیان
منی بو کلمه لرون ایلدی اشفته خیال
ویر صداقتله جوابیم ایله سم هر نه سؤال
.
.
شهر یثربده گوروبسن دی گوروم طاهانی
یا علی یا حسنی، فاطمه زهرانی
یا حسین ختم نبی گلشنینون ریحانی
دانیشان دیللره قربان سوله بو مطلبی سن
هیچ زیارت ایلیوبسن خانمیم زینبی سن
.
.
نچه ایللردو یانیندان گله نی گورمه میشم
زینبی گورمگه جان نقدینی نذر ایله میشم
تربیت المیشام اوندان چوره گین چوخ یمیشم
ایولرینده یوموشام رخت حسین و حسنی
تاپمشام سایه ی لطفنده همین مرتبه نی
.
.
دیدی زینب غم زهراده اوزوم اغلامیشام
سحر اخشاملار او خاتونه عزا ساخلامیشام
هم علینون باشینون یاره سینی باغلامیشام
سولدوراندا حسنون رنگینی زهرون اثری
دیزیمون اوسته باشی طشته توكولدی جگری
.
.
او حسینی که دیدون فاطمه نون جسمینه جان
باجیسی زینبه ارام دل و روح روان
ایسته سون گر او حسندن تاپلور منده نشان
ایری دوشمز او نشان زلف پریشانیمدن
اونی ارزشده مقدم دوتارام جانیمدن
.
.
هاردا کشتی سی حسینون بیلورم لنگر اتوب
قوم و قارداشی اوزی ورطه ی طوفانه باتوب
باجی سی هاردادی الساعه اوزی هاردا یاتوب
بوندان آرتوخ داخی سن ایتمه گلن پرسش حال
بیلدیگیم قدری جوابون دیدیم ای اهل سؤال
.
.
چون خانمدان ایشیدوب هنده غم افزا سخنی
تحت تاثیره کچوب تتردی بیردن بدنی
آند ویررم دیدی من سید طاهایه سنی
منی تشویشه سالوب ایتمه نهان شهرتوی
معجرون یوزدن آیر بیرجه گوروم صورتوی
.
.
دیدی زینب منه تکلیف ایدوسن امر خطیر
دایانوب دوره ده نامحرم اولان مرد کثیر
سن سالوبسان باشووا چادر و روبند حریر
یوزیمی بوکموشم اما بوقرا معجره من
نجه نامحرم ایچینده باش آچوم سن گوره سن
.
.
قیلسون اجرا اگر امریه ی پیغمبروی
رد ایله ایندی کناره گیده نوکرلروی
پس از آن گور یوزیمی روشن ایله گوزلروی
ایشیدوب هنده اونون موعظه ی محکمینی
قصرینه قیلدی روان عده ی نامحرمینی
.
.
هنده نی قیلدی مخاطب دیدی اول بنت بتول
نگران اولما اولوب ایله دیگون نذر قبول
بوردا ویرانه نشین دور نجه گور ال رسول
دوست قوى ادوی صندلده اوتور عزتیلن
فخر ایله ایسته د یگون زینبه باخ دقتلن
.
.
هنده کی زینبی بو حالدا گتوردی نظره
آتدی چادر شبینی مقدم عزت اثره
صورا نیمتاجینی باشدان گوتوروب ووردی یره
یاخاسین پاره لیوب روحی قفسده سخیلوب
هنده دیوانه صفت صندلون اوستن یخیلوب
.
.
سندیروب شأننی احوالی دگرگون گورونوب
عجزیله توپراقا دوشدی یوزی اوسته سورونوب
جامه ی سلطنتی خاک ندامت بورونوب
زینبون اوپدی ایاقین او نمک خوار غیور
بو نه محنتدی دوشوبسن دیدی ای کوکب نور
.
.
هنده نون کاش خانم سایه گلیدی گوزینه
اولمیوبدور سیزه نسبت متوجه سوزینه
وای نجه من باخارام حشرده زهرا یوزینه
برخلاف ادب عرضیمی ادا ایلمیشم
منی عفو ایله خانم خبط و خطا ایلمیشم
.
.
عرشه اوج ایتدی شدیداً او نوا زمزمه سی
ایاقا دوردی یریندن اسرا سلسله سی
لرزیه سالدی اوجا قصرلیی ضجه سسی
آچدی زهرا قیزی غم دفترینی قیلدی فغان
کربلا واقعه سین ایتدی بو دیللرله بیان
.
.
سیل کیمی لشکری بیر گونده روان ایتدی یزید
گلشن حضرت زهرانی خزان ایتدی یزید
نجه گور قامتیمی اگدی کمان ایتدی یزید
زینبون الدن الیب یئددی جوان قارداشینی
ساخلیوب طشتنده تخت آلتدا حسینون باشینی
.
.
گوز یاشین خون حسینیله گلاب ایلمیشم
آغاران زلفیمه باخ قانی خضاب ایلمیشم
اونی افشان ایلیوب یوزده نقاب ایلمیشم
یتمدی شامه گلن وقته الیم معجریمه
تار زلفیمله کفن بیچدیم علی اصغریمه
.
.
نوجوانان بنی فاطمه نی دوغرادیار
سودامر دیلسیز اوشاقلاریمزی اوخلادیلار
یاندیروب خیمه نى قوللاریمزی باغلادیلار
سیر ایله هنده یزیدون بیزیلن کج روشین
اولمشوق ایندی همین شامده ویرانه نشین
.
.
(یحیوی) هنده نون احوالینی تشریح ائله دون
زینبون غملی مصیباتینی توضیح ائله دون
ال سفیان عملین شعرده تقبیح ائله دون
بیله جک ملک سخن ده ادبا قیمتووی
وئره جک خیر ورا، روز جزا خلعتووی
.
#خرابه_شام
#هنده_بیر_صاحب_اخلاق_و_کمال_عورتیدی
#یحیوی_اردبیلی
#ترکی
.
✍️ #زبدةالاشعار ✍️
.
?: @nohe_torki
التماس دعا واقعا یکی از آثار ناب استاد یحیوی هست هر موقع باخودم زمزمه میکنم اشکام جاری میشه
سلام و درود خواهر گرامی ام ، صبیّۀ استاد مرحوم #شبخیز قراملکی ، ممنون از حضورتان
خدا پدر بزرگوارتان و همه شعرای فقید را بیامرزد ان شاءالله
التماس دعا
واقعاً ممنونم از شما که این اشعار رو قرار دادین در حین خواندن شعر اشکم جاری شد امیدوارم با ابا عبدالله الحسین علیه السلام محشور شویم ان شا الله
سلام و درود
ممنونم از حضورتان
ان شاءالله
یازینب
بارک الله فی استاد یحیوی
یا زینب
سلام و درود و سپاس از حضورتان
به نظرم وبه اعتقادم تمامی شعرای اهل بیت علیه السلام،مداحان امام حسین علیه السلام،عزداران بی ریا وگریه کنان ائمه اطهار علیه السلام به حول وقوه الهی در آخرت همه وهمه در همسایه گی ائمه علیه السلام خواهند بود چرا چون تمام جوانی وعمرشان را فقط با ورد وذکر ائمه سلام الله سپری کرده اند واگربغیر از حق الناس گناهی هم داشته باشند خداوند مهربان به خاطر جوانان بهشت مورد عفو وعنایت قرار خواهد داد انشاءالله …امروز پنجشنبه است،، پروردگارا ترا به جلال وعظمتت قسم، تمام کسانی را که از اول عاشورا تا به امروز یاحسین ع گفته واسیر خاک شده اند را در رحمت خود قرار بده وبه تمام حسینیان طول عمر ووسعت روزی وآبرویشان را در دوعالم حفظ بفرما وهمه حسینیان را عاقبت بخیر بگردان آمین یا رب العالمین یحیوی تاج الشعرا روحت با اربابت باشد و روح پاکت شاد باد با آبروی هرچه تمامتر عمر را به پایان رساندی عجب مردی بودی روحت شاد
سلام و درود سرور گرامی جناب آقای رهبر
برادر بزرگوارم
ممنونم از متن و دعای خیرتان