زبانحال حضرت سکینه(س) به راس حضرت علی اکبر (ع)
.
✍️ زبدة الاشعار ✍️
.
?: @nohe_torki
.
مرحوم شهاب تبریزی
.
گلّم علی دالونجا
هر قدر قدرتیم وار
شامه کیمی سورونّم
نیلوم محبّتیم وار
.
.
بیله بولور گورنلر مغلولِ بیر عدویم
قول باغلی دستگیر اعدای کینه جویم
بولمولّه من اسیر گیسوی مشک بویم
هر بیر تِلینده تک تک اوّلدن الفتیم وار
.
.
هرگز یورولمارام من بو یولدا همرهیم سن
گرچه گونوم قرادی نورانی بیر مهیم سن
من سندن اوتری گلّم سن دلدن آگهیم سن
بیگانه لر که بولمز دلده نه نیّتیم وار
.
.
بلبل جفای خاره بیجا یره دایانماز
پروانه دورِ شمعه عشق اولماسا دولانماز
من یانماسام غمونده بیگانه لر که یانماز
پروانه دن چوخ آرتوق یانماقه رغبتیم وار
.
.
پابند تار زلفم محکمدی بو علاقم
سندن گوتورمرم گوز قارداش نه قدری صاقم
بی آز که آیری دوشدوم یخموشدی یولدا ناقم
بو ساربان الیندن بی حد شکایتیم وار
.
.
رفتار سیزدی ناقم بی رحم سارباندی
یول نابلددی قارداش بیر قورخولی مکاندی
شامه یتونجه بولّم شغلیم منیم فغاندی
ویرانه ده ئولونجه مطلق بو زحمتیم وار
.
.
بو زحمته تحمّل خوشدی بو دلفکاره
آهیم اولا موثّر بلکه بو نیزه داره
باشون ویره یوزوندن قارداش ئوپم دوباره
شاید ایده ترحّم بولسه بو نیّتیم وار
.
.
تا وار نفسم سورونّم آردونجا دلده ناله
بیر بلبلم که عشقیم واردور او گل جماله
باشون اله گتورسم یتسم اگر وصاله
ایّام فرقتوندن شیرین حکایتیم وار
.
.
عشقون نه چکدیروبدور تقریره فرصت ایستر
بیر بزم خلوت ایستر طولانی صحبت ایستر
معشوقیله دانیشماق بیر خوش فراغت ایستر
ایمدی نه بزم خلوت نه خوش عمارتیم وار
.
.
حیران عشقم ایمدی بی صبر و بی قرارم
مبهوتم اوز اوزیمدن قارداش ایله کنارم
قالمور مگر نمودیم بیرده همین نظارم
بیر بیله زنده لیقدان دنیاده حیرتیم وار
.
.
قارداش الیم یتیشمور نیلوم سرِ سِنانه
ردّ ایلیوم یوزوندن زلفون اویان بویانه
مژگانون عشقی وورسون مین یاره هر باخانه
بولسونله تا نه قدری دلده جراحتیم وار
.
.
قارداش ایکی گوزومدور بیر مه یوزون جداده
صدحیف آچموسان بیر سنده گوزون جداده
آچسان گوزون یوزیمه باخسان اوزون جداده
حالیم سنه حکایت ایلر نه ذلّتیم وار
.
.
ویردوقجا نیزه دارون هردم تکان جدایه
زلفون اولور پریشان صبریم گیدور فنایه
هر تار تیتردوقجا صبریم گیدور فنایه
نیلوم علاقه مندم دلده حقیقتیم وار
.
.
آغلا شهاب ئولونجه عرض ایله ای الهی
ویرّم قسم حسینه عفو ایت بو روسیاهی
یوخدور بو روسیاهین اوندان سِوا پناهی
قرخ ایلدی نوکرم بیر چشم شفاعتیم وار
.
.
#سبک_احوالیمیز_یاماندی … بیش از 10 سبک
.
.
#راه_شام
#گلم_علی_دالونجا_هر_قدر_قدرتیم_وار
#شهاب_تبریزی
#ترکی
.
✍️ #زبدةالاشعار ✍️
.
?: @nohe_torki
نظر دهید