زبانحال حضرت رباب (س)
بعد از شهادت علی اصغر (ع)
#بالاسی_اوخلانان_آهو_کیمی_چولی_ملرم
.
.
مرحوم سید یوسف نجمی تبریزی
.
.
عُذاره خون دلی گوز یاشیم کیمی اَلَرم
خدنگ آهیمیله قلب عالمی دَلَرم
بو اوخ یریندن آخان قانه زلفیمی بَلَرم
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
رُبابدن علی بو حالتون آلوب دوزومی
گورن کیمی سنی ایله ایتورموشم اوزومی
گر اولسا سود اَمری اوخلانان بولر سوزومی
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
قالیدی آغلار آنان چرخ سُفله چوخ چالشوب
یوزیمده خون جگر دور سرشگیمه قاریشوب
بو اودلی قلبیمی لیلا بُلر نجه آلشوب
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
هامی بُلر علی سن طاقت و قراریمیدون
آنالار ایچره منیم عزّ و اعتباریمیدون
سرور سینَمدون مایۀ وقاریمیدون
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
دولویدی شوقیله دل روز وشب بو نیّتیله
که سوددن اصغریمی بیر آچیدیم عزّتیله
هزار حیف آلشدیم شرار حسرتیله
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
سزادی سنسیز اُلونجه غم آتشینده یانام
توکم سرشگیمی رُخساره اشگیمه بویانام
دوزر بو محنته هانسی آنا که من دایانام
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
مَلولدون اَلیوی باغلادیم که ایتمه تلاش
گذشت ایله بالا بُلمدیم منِ کُلباش
بو سن بو سینم ایله ایلوسن نقدر تلاش
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
دیدیم اگر بالا آز آغلا سینمی داغلا
هاچان دیدیم بیله یات راه چاره می باغلا
سَسون فداسی اولوم گوگلوم ایستوری آغلا
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
بالانون اُنّوگنون رنگین آق سُوَر آنالار
گوگلده مایل اولور قرمز اُنّوگه بالالار
بیله آلار بالا گوگلین علاجسیز آنالار
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
اوتانماسام علی بو نعشون اوسته باش آچارام
لوای آهیمی اوج مصیبته ساچارام
ایاق یالین باش آچوخ قویسالار چوله قاچارام
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
خدنگ ظلمله اوز قانوه بویاندون اوغول
آناندا ظلم اودینا یاندی سنده یاندون اوغول
آنان مَلَر قالی سنسیز بو سرّی قاندون اوغول
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
بو سود اَمَر بالا «نجمی» شهید لر گوزیدور
شهادتین گویونون بیر ایشیقلی اولدوزیدور
بو دلخراش کلامون رُبابین اوز سوزیدور
بالاسی اوخلانان آهو کیمی اوغول مَلَرم
بو قانلو قُنداقوی گه آچوب گهی بَلَرم
.
.
#اصغریه_شهادت
#حضرت_رباب
#عذاره_خون_دلی_گوز_یاشیم_کیمی_الرم
#بو_قانلو_قنداقیوی_گاه_آچوب_گهی_بلرم
#نجمی_تبریزی
#ترکی #اصغریه
#زبدةالاشعار
نظر دهید