آخ حسودین ریشه سین الله قازیدی هر زمان #فاطمیه_عینی_فرد

حالات حضرت زهرا سلام الله علیها
..
..
..
..
حاج غلامرضا عینی فرد زنجانی
..
..
..
..
آخ حسودین ریشه سین الله قازیدی هر زمان
هر نه بدبختی وار عالمده حسادت گورسدر
..
هاشمی لر دوشمسیدی جایگاهندن اوزاق
مردم آنلاردی نه عزّتلر امامت گورسدر
..
چوللره دوشمزدی مهدی آغلامازدی روز و شب
ایش مسیریندن چخوب غیبت او حضرت گورسدر
..
اوّلین سنگ بنانی گر قویا معمار کج
تا ثریّا چکسه قدّین کج عمارت گورسدر
..
اصل معمار بنای دینی الله یولّاسین
گر اباصالح ظهور ایتسه سعادت گورسدر
..
غسل و کفن و دفن طاهایه علی مشغولیدی
باش آچوب آغلور گوزونده اشگ حسرت گورسدر
..
قوردولار شورا شرارت اهلی شرّ اولدی بنا
یعنی اوز باطنلرین اوچ بی مروّت گورسدر
..
قویمیوبلار بیر دویونجا یاس دوتا پیغمبره
گوردولر که اوّل و ثانی نه نیت گورسدر
..
ایوده اگلشمشدی خیبرکن یانندا قزلاری
قورخوشور گوردی اوشاقلار زرد صورت گورسدر
..
داد و فریاد ایلیوللر گل علی بیعت ایله
فکر ایدوبلر سهل و آسان دست و بیعت گورسدر
..
بیرده نعره ایلینده دوردی یردن فاطمه
باشینه چادر شبین سالدی حمایت گورسدر
..
سسلدی ایوای عم اوغلی دشمنون نامردیدی
گور نه اندازه سنه ثانی جسارت گورسدر
..
آلتدی دیواره الین زینب دولاندی باشینه
سسلدی گِتمه آنا دشمن خشونت گورسدر
..
بیر طرفدنده حسین آغلور دیور گِتمه آنا
مجتبی مانع اولوب سدّ طریقت گورسدر
..
دورد بالاسیلان دوروبدی پشت درده سسلدی
هانسی روبه دی گلوبدور شیره جرأت گورسدر
..
جنگ لرده گزلننلر هیچ اوتانمورسوز بو گون
قبریده ایندی آتام سیز قومه نفرت گورسدر
..
سیز بله فکر ایلسوز اُلدی پیمبر؟ مُرتضی
قالدی یالقوز سیزلره رأی رضایت گورسدر
..
فکروزی باشه چکون من قویمارام گلسون علی
ایندی زهرا سیزلری رُسوای اُمّت گورسدر
..
یاسلی جانیم جاننه قربان علیدن ال چکون
تز گیدون بو ایشلروز اسلامه ضربت گورسدر
..
تا نقدری زنده ام قویمام علی مظلوم اولا
آل طاها هم شهامت هم شهادت گورسدر
..
آستانمدن عُمرال چک نه ایستورسن مگر
دست بیعت سیزلره فکر ایتمه عترت گورسدر
..
بعضی لر نقل ایلیوب قرآن جمع ایلوردی علی
بو سببدن غرق اولوب آیا نه حیرت گورسدر
..
فاطمیلن دشمن دین ایلیوردی گفتگو
گوردی ثانی فاطمه جدا رشادت گورسدر
..
امر ایدوب هیزم گتورسونلر اُلیدی شیعه لر
دیزلرین حیدر قوجاقلوب استقامت گورسدر
..
اود ویروبدی بی حیا یاندی علینون قاپلاری
بیر قاپی که عالمه اَمن و حراست گورسدر
..
گوردی زهرا قورخمادی اوددان دایاندی داغ کیمی
همسر حیدردی البته شجاعت گورسدر
..
توستی قوزاندی بتولون گزلدوبدور قامتین
بُلدی بو قامت عیان اولسا قیامت گورسدر
..
اود ایچینده دورد بالاسیلان خانم محصور اولوب
کوچیه مردم یغشدی سانما حُرمت گورسدر
..
آی تماشایه گلنلر کول توکولدی باشوزا
بیلمدوز زهرا سیزه نقش ولایت گورسدر
..
بیر تَپیک وُردی قاپی زهرانی چالدی دیوارا
ناله سی بیردن اوجالدی حال رحلت گورسدر
..
داغلار آز قالدی یریندن قوپسون اول فریادیدن
عرش تترور یر گوی آغلور قونشی طاقت گورسدر
..
وای بابا وای سسلندی زهرا آغلادوب پیغمبری
گور نجه امت منه سویلوب اذیت گورسدر
..
سسلدی فضه منی درک ایله اولدوم زخمدار
محسنیم سقط اولدی گَل گُل لاله سیرت گورسدر
..