بیله حیالی خانم گلمیوبدی دنیایه #زینبیه_طوری_تبریزی

مدح و میلادیه حضرت زینب سلام الله علیها
.
.
.
مرحوم طوری تبریزی
.
.
بیله حیالی خانم گلمیوبدی دنیایه
دوباره سالمیاجاخ مثلی اوسته گوی سایه
.
آناسی فاطمه دن درد و محنتی چوخدور
بونون غمی غم اهل جهاندان آرتوخدور
.
یازوبلا حین تولد، بو غم کش ایام
گوزین تکوب قاپویا، گوز یاشی توکردی مدام
.
کمال لطفیله نواده سین رسول انام
آلوب الینه اوپردی که ایلیه آرام
.
نقدر ایستدی رام ایتسون اولمادی مانوس
علی و فاطمه هم مجتبا اولوب مایوس
.
او دمده منزله قویدی قدم امام حسین
قولاقینه یتشوب زینبین کلام حسین
.
نه گوردیله اوزین ایستور آنا قوجاقندان
آتا یره، اوپه قارداشینون ایاقندان
.
او حالیله که حسین گوردی نازلی زینبینی
عزیز خواهرینین بیلدی عین مطلبینی
.
آچوب ایکی قولونی، سسلدی خانیم باجی گل
یاخوندی آتش غمدن یانا جانیم باجی گل
.
قماط زینبی آلدی او دم الی اوسته
دئدی قولاقنه بیر سوز و لیک آهسته
.
بئله گمان ایدیرم نور دیده یاسین
دئردی خواهرینه کربلا قضایاسین
.
حسین زینبه، زینب حسینه آغلاردی
او آغلاماق دل خیرالنسانی داغلاردی
.
حسینه بو خانمین چوخ محبتی واریدی
محبتینده اورکدن مسرتی واریدی
.
.
.
.