گفتگوی حضرت زینب سلام الله (ع)
با حضرت رقیّه در خرابه شام
.
.
#سبک_امید_و_سقای_حرم_اباالفضل
.
.
مرحوم تائب تبریزی
.
.
/// حضرت زینب (س) ///
رقیّه جان داغلى دلون داغلاما
گوز یاشیوی گوزدن یوزه باغلاما
حسین اؤپن یوزین قویوب دیواره
حزین حزین سزیلدیوب آغلاما
.
.
/// حضرت رقیّه (س) ///
رقیّیم عزالیَم ای عمه
گونی باشی قرالیَم ای عمه
منیم کیمی بلاچکن تاپیلماز
من چوخ باشی بلالیَم ای عمّه
.
.
.
.
.
/// حضرت زینب (س) ///
اورگونده آه شرر پاشون وار
گوزلرینده طوفانلی گوزیاشون وار
اللّهَه یالواروب ئولوم ایستمه
هله سنون گل اوزلی اوچ یاشون وار
.
.
/// حضرت رقیّه (س) ///
وار دردیمه درمان بو گوز یاشیندا
اللّهَه یالوارام هر سوز باشیندا
من آتاسیز یاشاماقی نیلورم
قیلّام ئولوم آرزوسی اوچ یاشیندا
.
.
.
.
.
/// حضرت زینب (س) ///
یانّام سنی غم یاندیروب یاخاندا
گوزوم دولار اشگون یوزه آخاندا
عمّه وین صبرینی الدن آلورسان
دولی گوزلی یتیمانه باخاندا
.
.
/// حضرت رقیّه (س) ///
باغریمی غمله یاخمیوم نیلیوم
گوزدن قانیاش بوراخمیوم نیلیوم
یتیم لر یتیمانه باخاللار
یتیمانه بس باخمیوم نیلیوم
.
.
.
.
.
/// حضرت زینب (س) ///
گول بیر غنچه لبون گل تک آچیلسون
گوزوم گلسِتانینه گل ساچیلسون
دور بیر دولان بالاجا قزلاریله
بلکه دوتولموش اورگین آچیلسون
.
.
/// حضرت رقیّه (س) ///
خزان گورَن غنچه گولمز آچیلماز
گوزلر گلشنینه گل تک ساچیلماز
مین لر بهار اولا مینلر گل گوله
گنه یتیمه نین قلبی آچیلماز
.
.
.
.
.
/// حضرت زینب (س) ///
علت ندور اورک سوزون دیمورسن
عمّه وه ده درد دلون دیمورسن
یمه ماقلیق سالدی سنی ایاقدان
آج قالوسان گنه غذا یمورسن
.
.
/// حضرت رقیّه (س) ///
غم لر منی غم یماقا سچوبدی
سالوب ایاقدان قانیمی ایچوبدی
میلیم آپارمیری غذا میل ایدم
غم غصه لر بوغازیمی بیچویدی
.
.
.
.
.
/// حضرت زینب (س) ///
دریای درد و غمه آز بات قزیم
آز آغلا آز بی بیوی آغلات قزیم
قوری یرده اگر یوخون گلموری
دور گل منیم سینم اوسته یات قزیم
.
.
/// حضرت رقیّه (س) ///
سوزی سوزه قاتانمورام ای عمه
بابام عشقین آتانمورام ای عمّه
دائم بابام قوجاقینده یاتاردیم
قوری یرده یاتانمورام ای عمّه
.
.
.
.
.
///تخلص///
تائب سنه یار اولموری سعادت
گیدوب قبرین ایلیه سن زیارت
یالوار اوزی دعوت ایتسون او خانم
اوردا تاپار دعالرون اجابت
.
.
.
.
.
نظر دهید