شام غریبان
..
..
..
..
..
سید بشیر حسینی میانجی
..
..
..
..
..
خولیه، مهمان اولوب شاهِ شهیدان بو گئجه
ساخلیوب زهرا خانیم شام غریبان بو گئجه
یاره لی باشه باخیر
گوزیاشی گوزدن آخیر
گه دییر لایلای حسین
گه دییر ایوای حسین
..
..
..
..
..
بو گئجه واردور یئری گؤزیاشیمیز القان اولا
بیر ائله سینه ویراق تا سینه میز سوزان اولا
یاس دوتان زهرا گلوب بو مجلسه مهمان اولا
تسلیت عرض ایلیاق مهمانه هر آن بو گئجه
آهیله دیل داغلیاق
یانه یانه آغلیاق
..
..
..
..
..
گول قویار باشین گئجه چاغینده سونبول اوستونه
سن کیمی مهمان گرَک باشین قویا گول اوستونه
میزبان قویماز قوناقین باشینی کول اوستونه
خولیه سن، من سنه مطبخ ده مهمان بو گئجه
محنتیم چوخدور بالا
طاقتیم یوخدور بالا
..
..
..
..
..
هر یئره من گئتمیشم مندن قاباق چوخ غم گلوب
من گلنده هاجر و سارائیله مریم گلوب
کاش گؤریدون بو آنون زهرانی، قدّی خم گلوب
اولموشام دشمن ائوینده دیده گریان بو گئجه
قورموشام ماتم حسین
آغلارام هر دم حسین
..
..
..
..
..
هر آنانین اوغلو ئولسه ای یارالی! سن کیمی
واردی حقّی آغلیا محشر اولونجا من کیمی
غم اودوندا قلبی یانسین اودلانان خرمن کیمی
بو نئجه وصلتدی بیلمم اولدو هجران بو گئجه
هئچ آنا چاتماز منه
هئچ اوغول چاتماز سنه
..
..
..
..
..
ناگران اولما بالالاروندان ای مظلوم بالا!
بو گئجه چول لرده زینب هئچ بیرین قویماز قالا
سؤز وئریب باجون اله عبّاس تک پرچم آلا
خیمه لر اطرافینه اولموش نگهبان بو گئجه
بو گئجه یاتماز باجون
فکریوی آتماز باجون
..
..
..
..
..
آغلارام چون کی قالوب یئر اوسته باش سیز پیکرون
جور و ظلمِ سارباندان قطع اولوبدور ال لرون
ساخلیوب شام غریبان قتلگه ده دخترون
شمع تک سس سیز سکینه ایلور افغان بو گئجه
گه دییر ایوای بابا
گه دییر لایلای بابا
..
..
..
..
..
هر قدَر عمری اولا باشه قرا باغلار «بشیر»
آتش آهیله قلبین دم به دم داغلار «بشیر»
خلوت ائتسه هر گئجه یاس ساخلیوب آغلار «بشیر»
ایلییر سنله گئنه تجدید پیمان بو گئجه
درگهوندن قووما سن
ای شهید بی کفن
..
..
..
..
..
#شام_غریبان #تنورخولی
#خولیه_مهمان_اولوب_شاه_شهیدان_بو_گئجه
#سیدبشیرحسینی
#ترکی
#زبدةالاشعار
خولیه مهمان اولوب شاه شهیدان بو گیجه #تنورخولی_سیدبشیرحسینی
نظر دهید