دوباره شدت غمدن گلور درد و غمه دنیا #اربعین_محمدرضاصادقی

اربعین
..
..
..
محمد رضا صادقی
..
..
..
دوباره شدت غمدن گلور درد و غمه دنیا (1)
بو درد و غمدن افغانه گلور هر لحظه مافیها
..
باشیندا شور و ناله یاس سالار شهیدانه
گلور معناده طشتین ایچره باشی ذبح اولان یحیی
..
دئیور روح القدس ای وای حسینیم عرش اعلاده
گلور ناله سسیندن نالیه افلاکیان یکجا
..
بو نه غمدور توکور گوزیاشی یکسر انبیا آغلور
بو نه مجلسدی کی باشه ورور عیسی یانور موسی
..
اوخور افغانیله ذبح عظیمین نوحه سین داوود
دَلور اسماعیلین قلبین بیر اوخ تک محنت عُظما
..
فراته یوخ دئین دشت ملاله سو سسین سالما
مگر موجیله یاسه گورموسن یکسر گلور دریا
..
بو غمده روح الفت فیض مطلق نور حق باهم
گلوللر گوزده گوزیاشی ائدوللر آه و واویلا
..
حقیقت کویونه قویموش قدم اُول سیدسجاد
گلور، اُول خطبه سیله ائیلییَن باطل لری رسوا
..
دیلینده نغمۀ آزادی ، باشدا شوق وصل یار
گلور بو سُولمییَن گلزاره بیرده بلبل شیدا
..
بلا صحراسینه حاکم اولوبدور بیر سکوت محض
گلور اما قولاقه بو سکوت ایچره حزین نجوا
..
عطیّه آغلوری جابر دئیور ایوای حبیبم وای
آخان اُول گوزلریندن گوزیاشی یوخ، قانیدور گویا
..
دوتوبدور بیر طرفده مریمیله آسیه ماتم
گلور غرق محن بیر سمتیدنده هاجر و سارا
..
گلور بیر سمتیدن ایوای بالادیلده شه مردان
گلور بیر سمتیدن عمامه الده سرور بطحا
..
دیلینده یا حسین بیر سمتیدن زینب گلور، بیرده
گلور بیر سمتیدن باشینده قاره حضرت زهرا
..
الا ای دشت غم ای کربلا ای قان اولان توپراق
مهیا اول گلور بو ماتمه چون زینب کبری
..
اورکدن قوزاناندا ناله سی عرش معلایه
چکور یر صیحه افغان ائیلور اُول گنبد مینا
..
او سَسیز موکبه تا سس وئرور هر ناقه نین زنگی
دَیور یئل توپراقا سیزقین گلور آه و غمه صحرا
..
اولوب قید اسارتدن رها بیر آیری فکریله
گلور اُول جان طاها قبری اوسته عترت طاها
..
گلن کیمدور گلنلر کیمسه دور بیر کیمسه سی بولمور
گلور چون اربعینه وار بو قدری سرّ عاشورا
..
آچون یول زلفی الده دیلده هر دم اکبرین آدی
گلور آغلار او یوللار یورقونی اوغی ئولن لیلا
..
دییور لایلای بالام اصغر آناسی گه ائدور افغان
گلور گه دیلده ایوای جان بالا قلبی ایدور غوغا
..
دئیور چوخ نسگیل اولدی آچمادون دیل من سنه قربان
آخان قانی کسلیمش یاره وین سویله گوروم آیا
..
دییور بیر قیز کی عمه وار هراسیم سویلور آهیله
بئله فکر ائیلورم ایمدی گلور ورسون بیزی اعدا
..
آچوب دیل قیزلارا بیر قئز دیور ساکت اولون چون کی
گلور پیشواز ائده بیزدن بئله حس ائیلورم سقا
..
دوتون الده پیاله چگنینه سالموش عَموم مشکی
گلور ، اُول لشکری کفری پوزان غیظیله بی پروا
..
نه حکمت وار کی زینب دینموری صبر ائیلور اما
گلور گوزیاشلاری گوز چشمه سیندن گرچه سیل آسا
..
بولورکی ئولدورللر ئوزلرون قیزلار دئسه نوحه
اودور ذهنه گلور اولسون حفاظت تا ذوی القربا
..
گهی آهسته سسلور زینبون باخ حالینه قارداش
نه نوعی گور گلور ای فضل و علمی شرح کرمنّا
..
دئیردیم زینبون اوخ تک دَلَر غملر #دل‌ِپاکین ☆
اجل وئرمز امان بو واله و #شیدا گلور اما
..
..
..
..
..
(1) اقتباس از شعرآقای استاد رضا غلامپور(دلپاک ) :شدت غمدن دوباره نالیه دنیا گلور