عمه جان بو گردش دور زمانین داد الیندن #حضرت_رقیه_شبیری

زبانحال حضرت رقیّه (س)
به حضرت زینب کبری (س)
..
..
..
..
سعید شبیری
..
..
..
..
عمّه جان بو گردش دور زمانین داد الیندن
شاهد اول دنیاده بیر آن اولمادیم من شاد الیندن
..
..
..
..
ای ایدن حالین پریشان زلفی تک دشمن جفاسی
رسمدور دنیاده یوخسا ای مصیبتلر آناسی
بیر قیزین ئولسه آتاسی اولماسا بیر آشناسی
بیر نفر الله رضاسی عمّه دوتماز یاد الیندن
..
..
..
..
بیر اوزون مدتدی عمّه درد و غمدن خسته ام من
دردیمی بیر سن بولورسن چون سنه وابسته ام من
گوئیا دنیا قفسدور بلبل پربسته ام من
کاش اجل گلسون بو دنیانون اولوم آزاد الیندن
..
..
..
..
عمّه جان من بیر غزالم دیده گریان سینه سوزان
رحم سیز صیاد الینده قالموشام زار و پریشان
یوخسا بو شام ایچره عمّه بیر نفر یوخدور مسلمان
تا گلوب من بینوانی قورتارا صیاد الیندن
..
..
..
..
عمّه بو ویرانه ده نه همدمیم نه یولداشیم وار
روز و شب مونس منه بو قانه دونموش گوز یاشیم وار
نه آتام وار نه عموم وار عمّه جان نه قارداشیم وار
بس کیمه ایلوم شکایت دشمن بیداد الیندن
..
..
..
..
باخما عمّه درد الیندن داد و افغان ایلرم من
صبریله هر مشکلی دنیاده آسان ایلرم من
صبریمه صبر ایلین ایوبی حیران ایلرم من
آلموشام تصدیقیمی چون سن کیمی استاد الیندن
..
..
..
..
اوندا کی عالمده هر ذیروحه حقدن دم یتیشدی
بلبله خوش سس نصیب اولدی گله شبنم یتیشدی
سهم دنیادن منه ای عمّه گویا غم یتیشدی
یوخ گلایم اوزگه دن اوز بختیمون فریاد الیندن
..
..
..
..
چوخ محقر دور بو منزل ظاهرأ ویراندور عمّه
باطنا چوخ باصفادور روضۀ رضواندور عمّه
اهلی یاحق گودی گویا مجلس عرفاندور عمّه
درس آلوب استاد اولوب هر تک تکی سجاد الیندن
..
..
..
..
عمّه جان من بیر قیزام بو عالمین دلسوزلاریندان
دردمندم دردیم آرتوخدور گویون اولدوزلاریندان
چوخ گلایم وار آتام گلسه بو شامین قیزلاریندان
بی سبب داد ایتمورم بو شام بد بنیاد الیندن
..
..
..
..
یولّاناندا غم قطاری عمّه جان دشت بلایه
یعنی الله قسمت ایتسه بیرده گیتسوز کربلایه
سیز او یرده یوز قویاندا شوقیله پایین پایه
منده بوردا ناله قیلّام بو دل ناشاد الیندن
..
..
..
..
ای شبیری ایستسون اشعارون اولسون ناب و ممتاز
شرح بسطه طالب اولما سعی ایله آز یاز گوزل یاز
بیرده قصد قربتیله ایله هر عنوانی آغاز
قصد قربت اولسا چیخماز شاعرین ایراد الیندن
..
..
..
..
#حضرت_رقیه #شبیری #حضرت_رقیه_شهادت #ترکی #زبدةالاشعار