مسموم ایلیوبلر جگریم قاندی الهی #جوادیه_صابر_تبریزی

زبانحال حضرت جواد علیه السلام
.
.
.
مرحوم صابر تبریزی
.
مسموم ایلیوبلر جگریم قاندی الهی
یوخدور سو ویرن دل دوداقیم یاندی الهی
.
.
اوز محرمیم آخِر منه اوز ایتدیقون ایتدی
بیله بولور ئولدوردی منی مقصده یتدی
دنیاده هم عقباده اونون عزّتی گیتدی
گوگلوم کیمی امّید ایوی ویراندی الهی
.
.
بیر ظلمیله ئولدوردی منی دختر مامون
مثلین نه گوروبدور نه گورر دیده ی گردون
مقصودی وورا تهمت ایده دردیمی افزون
معصومه بو تهمت مگر آساندی الهی
.
.
قلبیمده الیم، گوشه ی منزلده جگر خون
شرمنده سرشکیمدن اولا وار یری جیحون
دیواریده قالموش یوزوم ای خالق بیچون
دل آتش حسرتده الولاندی الهی
.
.
عمّیم حسنی ایلدی اوز محرمی مسموم
امّا من مظلوم تک او اولمادی مظلوم
آچمیشدی باشی اوسته باشین زینب و کلثوم
یر گوی او غمه ایمدیده گریاندی الهی
.
.
غربتده یانیمدا نه آنام واردی نه خواهر
ال قلبیده، گوز یولدا، گوزی یاشلی مکدّر
دشمن منه هر ظلم الیندن گله ایلر
هرگز دیمز آخِر بو مسلماندی الهی
.
.
بیگانه اگر ظلم ایلیه سهل اولی سانماق
مشکلدی ولی ظلم احبّایه دایانماق
حقیّتیمی داندی نگاریم نجه دانماق
حق دشمنینین قولینه تولاندی الهی
.
.
من جان ویرورم بی کس و مایوس اوز ایویمده
یوخ بیر نفر اولسون منه مانوس اوز ایویمده
اوز محرمیم ایلوب منی محبوس اوز ایویمده
بو ایو منه بیر گوشه ی زنداندی الهی
.
.
آهیم شرریندن یری وار اودلانا دنیا
ئولدوردی بو ملعونه منی ایتمدی پروا
باغلوب قاپونی قویدی بو ایوده منی تنها
فکر ایلمدی جان ویرور عطشاندی الهی
.
.
اوز ئولماقیما آغلامارام ایتمرم افغان
جان اوسته فغان ایلرم اوز جدّیمه هر آن
گون ایسّی یارالی بدنیله اوزی عطشان
عشق اهلینه عشقی عجب عنواندی الهی
.
.
یخدی بدنین کرب و بلا خاکینه دشمن
سانسیز یارا ووردی بدن پاکینه دشمن
دورت مین ووروب اوخ سینه ی صدچاکینه دشمن
باخمازدیلا گل پیکری شان شاندی الهی
.
.
مامون لعینون قیزی اول جعده ی ثانی
مسموم ایلدی حضرتی یاندوردی جهانی
تا حاصل اولوب معتصمین کام نهانی
بولمم بو نجه کینه ی پنهاندی الهی
.
.
توهین ایلیوب جسم همایون امامه
امر ایتدی چخاتسونلا اونون نعشینی بامه
بام اوستن آتوبلار بدنین معبر عامه
بیر کس دیمدی حجّت یزداندی الهی
.
.
یر اوزره قالوب اوچ گجه گوندوز او بدن زار
نه آغلیانی اولدی نه بیر کیمسه عزادار
وارث اولوب اوز جدّی حسینه او دل افکار
مظلوم جهان شاه شهیداندی الهی
.
.
اوچ گون بدنی قالدی حسینین قوری یرده
خار و خس و خاشاک چکوب جسمینه پرده
بو محنت عظمی گتیروب زینبی درده
قارداش بدنین گوردی که عریاندی الهی
.
.
ای خالق بی مثل و بدل قادر و صابر
دربارینه سائل به کف اشراف و اکابر
قویما اولا دنیاده ذلیل اهل منابر
ظاهرده بولار دینه نگهباندی الهی
.
.
.
#جوادیه_شهادت
#مسموم_ایلیوبلر_جگریم_قاندی_الهی
#صابر_تبریزی
#ترکی #جوادیه
#زبدةالاشعار