راه شام و زبانحال حضرت رقیّه (س)
..
..
مرحوم کریمی مراغه ای
..
..
کاروانی ساخلا گئتمه قالمیشام صحراده عمّه
بیکسم طفل یتیمم یالقوزام گل داده عمّه
..
..
حالیمه عمّه جهاندا قلبی داغلی قزلار آغلار
قالمیشام یالقوز بو چولده حالیمه یالقوزلار آغلار
بختیمه باخ آیدا باتدی آهیمه اولدوزلار آغلار
دویما بو تئزلیقدا مندن لطف ائله سال یاده عمّه
..
..
بسکه تشنه یدیم بو دشتی سو سراغینده دولاندیم
تاپمادیم آخر مغیلان سایه سینده دالدالاندیم
یوز قویوب توپراقه یاتدیم کاروان گئتدی اویاندیم
بو قضایانی گوروردوم عالم رؤیاده عمّه
..
..
نیلیوم یوخ بیر انیسیم قورخولی صحرا قرانلوق
قویمیوب منده توانا گردبادیله دومانلوق
هر طرف خار مغیلان سنگ خارادور تیکانلوق
یل سپر باشیمه توپراق گلّم آه و داده عمّه
..
..
آغلارام یاهو چکنده حالیمه آهولر آغلار
سس چکوب وحشیلر آغلار قمری لر طیهولر آغلار
باشیمی قویّام داش اوسته بو غمه پر قولر آغلار
هاردادور گورسون بو حالی اکبر شهزاده عمّه
..
..
صبحه تک قالسام بو چولده قورخودان ئولّم اماندور
همدمیم اؤز آه و ناله م مونسیم اشک رواندور
ای خدا قالدیم بو چولده ایمدی عمّم ناگراندور
نیلسون مغلول اولوبدی لشگر بیداده عمّه
..
..
بس بابام تاپشورمامیشدی بو یتیمی گوزدن آتما
بو قزی یوخلاتمینجا باجی سن آسوده یاتما
قالمیشام آواره گئتمه سن منی یاددان چیخاتما
یا اوزون گل یا خبر وئر قاسم داماده عمّه
..
..
عمّه جهد ایله دالیمجا اشقیانی قویما گلسون
شمری یا زجر ابن قیسی یا سنانی قویما گلسون
ئولدورر تاپسا بو زاری ساربانی قویما گلسون
اولماسا زحمت خبر وئر قارداشیم سجّاده عمّه
..
..
هارداسان ای ماه تابان گل منه ایله حمایت
نوریوی سال بیر بو دشته برطرف اولسون بو ظلمت
ناقه ردّین یرده گورسم ایلرم طیّ مسافت
نه باجی وار نه آنام وار نه گلور فریاده عمّه
..
..
ای اَسَن یللر ،کبوترلر، اوچان قوشلار هواده
حالیمی خوشدور یتیرسوز محضر زین العباده
عرض ائدون قالدی رقیّه اول مکان غم فزاده
کیم یانار سندن صورا بو حالیمه دنیاده عمّه
..
..
صبحه تک کاش ئولمییدیم گون چیخوب اولدوز باتیدی
هر طرفدن بو اوجالمیش قورخولی سسلر یاتیدی
عمّه جان ایکاش او پوزقون کاروانه ال چاتیدی
قالمییدی ذلّتیله پیکریم اثناده عمّه
..
..
نذریم اولسون ئولمیوم من تا یتوم شامه سلامت
شامده ویرانسراده ایلیوم بیر استراحت
جانیمی قربان وئروم من اکبره با میل و رغبت
شاهد اول سنده بو عهده موقع ایفاده عمّه
..
..
من شه بطحا قزیدیم چرخی دونسون روزگارین
رسمدور گویا دالیجا بیر خزان وار هر بهارین
بیرده گورسیدیم جداده اکبرین قانلی عذارین
آرزوم قالمازدی اصلا بو دل شیداده عمّه
..
..
ایمدی قزلار یوخلیوبلار بستر دیباده عمّه
من سوسوز آج پابرهنه قالمیشام صحراده عمّه
من کیمی بیر غم کشیده کیم گوروب دنیاده عمّه
کاش ازلدن گلمییدیم عالم ایجاده عمّه
..
..
بیرده گویده اولدوز آخسا آی دوتولسا گون دوتولسا
هاردا گورسن بیر قزل گل آچمامیش گلشنده سولسا
بیر قوشون بیر داش اورکلی شهپرین ظلمیله یولسا
آغلا سسلن وای رقیّه سال بو طفلی یاده عمّه
..
..
افتخار ایلر «کریمی» نوکر آل عبادور
گر چه وار چوخ چوخ گناهی عاصیدی اهل خطادور
قویماروخ یانسون جهیمه ناظم مدح و رثادور
صرف ائدوب عمر عزیزین یازدیقی طغراده عمّه
..
..
#راه_شام #کریمی_مراغه_ای #ترکی #زبدةالاشعار
نظر دهید