هر یارانمیش ئوله جک یوخدی بو معناده سوزوم #زینبیه_بیدقداری

زبانحال حضرت زینب سلام الله علیها در حال احتضار
..
..
..
..
مرحوم بیدق داری
..
..
..
..
هر یارانمیش ئوله جک یوخدی بو معناده سوزوم
وصل یاره نئچه مدّتدی که مشتاقم اؤزوم
قتلگهده ولی بیر منظره نی گوردی گوزوم
اوندا ئولدوم او چوخور یئرده ئولن شاهه گوره
داغ دوزنمزدی ولی دوزموشم اللهه گوره
..
..
..
..
قتلگه منظره سی گوز یاشیمی قان ائلدی
قدّیمی اگدی، منه عالمی زندان ائلدی
کافر ائتمزدی او ظلمی که مسلمان ائلدی
دوندروبدور یوزی اوسته یارالاانمیش بدنی
دالیدان کسدی باشین آیری غمه سالدی منی
..
..
..
..
بیر سوزوم واردی اورکده سوزی یاخشی بیلَنه
بئله مرسومیدی آغلار هامی تازه ئولنه
کربلا دشتی ولی یکسره آغلوردی منه
قالدیم آواره ائله اولمادی داده گَلَنیم
آغلیوردی دَوَه لر حالیمه میداندا منیم
..
..
..
..
نه گوزلدور ئولنه، سوره ی قرآن یارالی
اوخونا لذّت آلا جان وئره آسان یارالی
یدّی قارداش باجیسی جان وئرور الان یارالی
ممکن اولسا گل اوزون شامیده چون یوخدی کَسیم
غربت ائلده منه قرآن اوخی آخر نَفسیم
..
..
..
..
زینبم کرب و بلا گلشنینون گل اَکَنی
همّتیم باعث اولوب سولمادی عشقین چمنی
سیندیرا بیلمدی دشمن او کشاکشده منی
غربت اما ائله سیندیردی منی یخدی حسین
نقدر صبر ائله میشدیم عوضین چخدی حسین
..
..
..
..
موج دریا که وورار صخره یه باشین داغیلار
یئل اَسن وقته که داغلاردان آشار سس اوجالار
ائله بیلّم که اولاردا دوداقون یاده سالار
او دوداقلار منه چوخ سوزلری آندوردی حسین
آیریلاندا قوروموشدی منی یاندوردی حسین
..
..
..
..
فلکین چرخی منی غربته سالدی یارالی
دردی درد اوسته یغوب صبریمی آلدی یارالی
هر نئی آلدی فقط غم منه قالدی یارالی
غم اوزی زینبیوین صبرینه حیراندی حسین
من سنه آغلیورام غم منه گریاندی حسین
..
..
..
..
اورگیم دردینی من اولمادی همراهه دئیم
گونه ابراز ائلیم یا گئجه لر ماهه دئیم
بعضی سوز واردی آتام مثلی گرک چاهه دئیم
بو او سوزلردی که تاریخیده گیزلینده قالوب
قهرمان زینبیوین قدّین اگوب درده سالوب
..
..
..
..
دردیمی داغلارا وئرسیدیله سینمیشدی عیان
یا آخان سئللره آپارسیدی بو اسراری نهان
آتش غمده اولاردی هاموسی شعله فشان
گور نئجه صبر ائلدیم جانه دوشن اخگره باخ
غربت ائلده یورولان زینب غم پروره باخ
..
..
..
..
#زینبیه #بیدقداری #زینبیه_شهادت #ترکی #زبدةالاشعار