غصب خلافت و بیعت ناحق
شهادت حضرت زهرا (س)
..
..
مرحوم حاج حیدر خسروشاهی (حزین)
..
..
تا ختم رسل ترک ائلدی دار فنانی
ظلم ایلماقا اهل جفا قویدی بنانی
..
بیر مجلس شوری قوروب اصحاب سقیفه
رأى آلدیلا خاموش ائده لر نور هدانی
..
رأى آلدیلا بدعت قویالار دین مبینده
اسلام آدینا گور هدف اهل ریانی
..
رأى آلدیلا غصب ایلیه لر حق علینی
اونلار که اطاعت ائلدی نفس و هوانی
..
رأى آلدیلا ثقلینی آییرسینلا دریغا
یا اینکه ائشیتمیشدیله «لَنْ یفْتَرقا» نی
..
رأى آلدیلا اسلامده مرسوم اولا کینه
رأى آلدیلا منسوخ ائده لر صلح و صفانی
..
رأى آلدیلا بنیان عدالت اولا ویران
اسلامده شایع ائده لر ظلم و خطانی
..
رأى آلدیلا مظلوم ائده لر آل رسولی
دنیا بویی ظلم ایلماقا اولدولا بانی
..
رأی آلدیلا اگلشدیره لر ائوده علینی
بیر جمع منافق که اینانموردی جزانی
..
پیغمبر حقین نچه ایل لیق زحماتین
ضایع ائلیوب ائتمدیلر عهده وفانی
..
ناحق یره حق مسندینی ائتدیله اشغال
بیعت ائده امت اولارا اولدی تبانی
..
عنوان ائلیوب بیعتی بیر جمع منافق
گلدی که دل آزرده ائده آل عبانی
..
گلدی دایانوب باب همایون علیده
تهدید ائده مولانی بلند ائتدی صدانی
..
گلدی قاپویا عصمت کبری اوزی شاید
شرم ایلیه لر آچمیالار دست جفانی
..
افسوس صد افسوس که شرم ائتمدی دشمن
یاندیرماقا تهدید ائلدی باب رجانی
..
صدّیقه ولایتدن ائده دفع تعدّى
آماج بلیّاته سپر ایلدی جانی
..
بیر مرحلیه ایش دایانوب اولدی تهاجم
یوخ دلده توان شرح ائلیوم اول جریانی
..
یاندی قاپی اشرار توکولدی اولان اولدی
زهرانون اوجالدی گویه گل فضّه فغانی
..
تندیس حیا هوشه گیدوب ، حاله گلنده
گوردی آپاروبلار شرف ارض و سمانی
..
بانوی عفافه ائدوب امداد خانملار
یاددان چیخادوبدور او قدر رنج و عنانی
..
مجروح وجودیله قویوب مسجده یوز تا
سلطان ولایتدن ائده دفع بلانی
..
گلدی نه گوروب حجت داور ایاق اوسته
قالمیش باش آچوق کاش اولا بو عالمی فانی
..
گور کیم کیمی ساخلور ایاق اوسته قاباقیندا
یارب ندی بیر سن بولوسن امر قضانی
..
دشمن قلج الده الئور ئولدورماقا تهدید
غیظیله او غافل لره ائتدی بو ندانی
..
مظلوم عم اوغلومدان اگر چکمیه سوز ال
نفرینه مبدّل ائدرم حال دعانی
قهر اوسته بو گون قادر قهاری گتورّم
بیر کیمسه نون اولماز قالا ایمنده گمانی
..
تا صحبت نفرین ائلدی بانوی محشر
آثار بلا اولدی عیان سیر ائله شانی
..
تا گوردی او احوالی دوشوب وحشته اشرار
ناچار رها ایلدیلر شاه ولانی
..
آزرده وجودیله او بانوی مکرّم
ظالملر الیندن قوتاروپ شیر خدانی
..
باهم قییدوبلر گله لر منزله ایوای
منزل نجه منزل که غم و غصه مکانی
..
منزل نجه منزل که جماعت توکولنده
اولموشدی نه لرشرحی پوزار اهل ولانی
..
منزل نجه منزل که ائدور گوزده مجسم
ظلم و ستم قنفذ بی شرم و حیانی
..
منزل نجه منزل دئیه سن گلشن شاداب
جبریله گوروب فصل بهارینده خزانی
..
منزل نجه منزل اوزی بیر مقتله بنزر
اولموش نه کشاکش هله واردور هیجانی
..
منزل نجه منزل در و دیواری ائدور فاش
بیر فاجعه و کشمکش و ظلم عیانی
..
منزل نجه منزل که اولوب اهلینه جبراً
هر نقطه سی بیرخاطرۀ تلخ نشانی
..
نه خاطرۀ تلخ که هیچ خاطره گلمز
اول خاطرۀ تلخ لرون شرح و بیانی
..
مولا او غم افزا ائوی اول وضعی گورنده
ایراد ائلمه گیتدی دیسم تاب و توانی
..
نه حالته قالدی بیر اؤزی بولدی بیر آللاه
خاصه که گوروردی یارالی خیر نسانی
..
یانمیش قاپونون قانلیدی مسماری گورنده
یاندیرسا یریدی شرر آهی جهانی
..
تا سالدی نظر قتلگه محسنه مولا
گوردی خانیمون واراو مکاندا هله قانی
..
قانلی در و دیوار او اوضاع و او احوال
نه حاله سالار گور او شه کون و مکانی
..
ایوای تصور ائلماق اولمور او حالی
محروم اولاسان رحمت حقدن سنی ثانی
..
زهرا یوزونه باخدی نجه شاه ولایت
بی امن گورن وقتده اول دار امانی
..
آلسیدی خبر محسنی دفن ایلدی هاردا
زهرایه نشان ویرسون او اثناده هارانی
..
یر قانلی، قاپی قانلی، حیا هیکلی مجروح
آثار جنایت بورویوب صحن سرانی
..
تا گوردی آتایله آنانی زینب و کلثوم
صبر ائتدیله یا باشلادیلار شور و نوانی؟
..
مولاده او وحشت زده اطفالی گورنده
گیزلندی و یا ائتدی عیان سوز نهانی؟
..
باغلیدی یداله الى دینه گوره یوخسا
جرئت تاپا بیلمزدیلر اول فرقه جانی
..
گوردی او جنایاتی دوشوب بستره زهرا
جسمین غم اریتدی اولوب آزرده روانی
..
جانه دویوب آللاهدان اؤلوم ائتدى تمنا
چون گورموب اؤلومدن صورا اول درده دوانی
..
گلزار رسالت گلی خار و خس الیندن
دوران بهارینده گوروب جور خزانی
..
دلسوز شریک غم سلطان ولایت
وقت اولدی که ترک ایلیه بو دار فنانی
..
گوز آچدی باشی اوسته گوروب سرور مظلوم
حسرتله توکر گل یوزونه اشگ روانی
..
قهراً بیرالیله سیلوب اول سرورین اشگین
چکدی یارالی سینیه اول عاطفه کانی
..
مرهمدی سینیق قلبه دیدی مظلومون اشگی
سن تک هانی مظلوم اولان ای عدل نشانی
..
حسرتله دیدی آغلاما زهرا سنه قربان
ایلر منه غمخانه غمون باغ جنانی
..
رخصت ویر ائدوم محضروه نچّه وصیّت
ای روحیمون آرامشی بو هجر زمانی
..
عرضیم بودور اوّل که حلال ائت منه حقّون
ای لطفنه مرهون هامی عالی و دانی
..
مندن صورا اطفالیمی قویما اولا پوزقون
ای عاطفه لر لفظینه مصداق معانی
..
بیرده گیجه وئرغسلومی گیزلین گیجه دفن ائت
اذن اللهیله ای بولن اسرار نهانی
..
اگنیمده اولان کوینگی غسلومدا چیخاتما
تا بلکه گوزون گورمیه جسمیمده یارانی
..
گرچه سنه بو مسئله بیر امر گراندور
لطفیله تقبّل ائله بو امر گرانی
..
هم دفنیمی گیزلین ائله هم قبریمی ایتگین
قوى حیرته سالسون بو حقیقت عُقلانی
..
قوى عالمه معلوم اولا اشرار زمانه
مظلومه ائدوبلر نجه زهرای جوانی
..
بو مسئله نی روشن ائدر منتقم اوغلوم
واضحدى اوغول غملی گوره بیلمز آنانی
..
عاصی لرون ای حشرده امّید نجاتی
سائل لره ای باغلامیان راه عطانی
..
باب کرموندن الى بوش ائتمه «حزینی»
ارباب کرم ناامید ائتمزله گدانی
..
..
..
نظر دهید